އެމްއެންޔޫގެ "ސާގާފީ ސައި" ހަރަކާތް ފަށައިފި

ދިވެހިރާއްޖޭގެ ޤައުމީ ޔުނިވާސިޓީ (އެމްއެންޔޫ) އިން އެ ޔުނިވާސިޓީގައި ކިޔަވާ ބައިނަލްއަޤުވާމީ ދަރިވަރުންނަށް ޚާއްޞަކޮށް "ސާގާފީ ސައި – އިންޓަނޭޝަނަލް ކޮމިއުނިޓީ ގެދަރިން" ގެ ނަމުގައި ސަގާފީ ބައްދަލުވުމެއް ބާއްވައިފިއެވެ.

ތަފާތު ޤައުމުތަކާއި ސަގާފަތްތަކުން އެމްއެންޔޫގައި ތަޢުލީމު ޙާޞިލުކުރާ ދަރިވަރުން އެއް ޕްލެޓްފޯމަކުން ގުޅުވައިލުމުގެ ބޭނުމުގައި ބޭއްވި މި ހަރަކާތް މިހާރު ވެފައި ވަނީ ޔުނިވާސިޓީގައި ގަވާއިދުން ކުރިއަށް ގެންދާ ޙަރަކާތަކަށެވެ. ދަރިވަރުންގެ މެދުގައި ގާތް ގުޅުމެއް ބިނާކޮށް ސަގާފީ ހޭލުންތެރިކަން އިތުރުކުރުމަކީ މި ހަރަކާތުގެ މައިގަނޑު މަޤުޞަދެވެ.

ހަރަކާތުގައި ބައިވެރިންނަށް ދިވެހިންގެ މެހުމާންދާރީއާއި އެކުވެރިކަން ރަމްޒުކޮށްދޭ ސާގާފީ ސައި ތަޢާރަފްކޮށްދީފައިވެއެވެ. ސައިގެ އިތުރުން ސަގާފީ ޙަރަކާތްތަކާއި ކުޅިވަރުތަކާއި ހުށަހެޅުންތައް ހިމެނޭ ޕްރޮގްރާމެއް ހިންގައި ދަރިވަރުންނަށް ތިމާގެ ސަގާފަތް ޙިއްޞާކޮށް ދިވެހި ސަގާފަތް ދެނެގަތުމުގެ ފުރުޞަތު ފަހިކޮށްދީފައިވެއެވެ.

ބައްދަލުވުމުގައި ވާހަކަފުޅު ދައްކަވަމުން އެމްއެންޔޫގެ ވައިސް ޗާންސެލާ ޑރ. ޢާއިޝަތު ޝެހެނާޒް އާދަމް ވަނީ ބައިނަލްއަޤުވާމީ ދަރިވަރުންނަށް މަރުޙަބާ ވިދާޅުވެ ތަފާތު ޤައުމުތަކުން އަންނަ ދަރިވަރުންނަށް ގުޅުންތެރި އަދި ބައިވެރިވުން އޮންނަ މާޙައުލެއް ޤާއިމުކުރުމުގެ މުހިންމުކަން ފާހަގަކުރައްވައިފައެވެ.

މި ހަރަކާތް ކުރިއަށް ގެންގޮސްފައި ވަނީ އެމްއެންޔޫގެ ދަރިވަރުންގެ ޔޫނިއަން (އެމްއެންޔޫއެސްޔޫ) ގެ އެއްބާރުލުމާ އެކުގައެވެ. ސާގާފީ ސައި ފަދަ ޙަރަކާތްތައް މެދުވެރިކޮށް ކެމްޕަސް ތެރޭގައި ސަގާފީ ގުޅުންތައް ވަރުގަދަކޮށް ދަރިވަރުންގެ މެދުގައި ނިސްބަތްވުމުގެ އިޙުސާސް ހަރުދަނާކުރުމުގެ މަސައްކަތް އެމްއެންޔޫއިން ކުރިއަށް ގެންދެއެވެ.