ވަކި ސިޔާސީ ފިކުރެއް ޕްރޮމޯޓް ކުރަން ކައުންސިލްގެ މުދަލާއި ބިން ބޭނުންނުކުރަން އެލްޖީއޭއިން އެދިއްޖެ

ވަކި ސިޔާސީ ފިކުރެއް ކުރިއެރުވުމުގެ ބޭނުމުގައި ކައުންސިލް އިދާރާތަކުގެ މުދަލާއި ބިން ބޭނުންކުރުމަކީ ލާމަރުކަޒީ ޤާނޫނާ ޚިލާފު ކަމެއް ކަމަށް ބުނެ އެފަދަ ޢަމަލުތައް ނުކުރުމަށް ލޯކަލް ގަވަމެންޓް އޮތޯރިޓީ (އެލްޖީއޭ) އެދިއްޖެއެވެ.

އެލްޖީއޭގެ ސީއީއޯ މުޙައްމަދު ނިމާލް ސޮއިކުރައްވައި ސިޓީތަކާއި ރަށު ކައުންސިލްތަކުގެ ރައީސުންނަށް ފޮނުއްވި ސިޓީގައި ފާހަގަކުރައްވާފައިވަނީ ކައުންސިލްތަކުގެ ބެލުމުގެ ދަށުގައި ހުންނަ ވަސީލަތްތައް ހޭދަކުރަންޖެހޭނީ ޤާނޫނުން އެ އިދާރާތަކާ ޙަވާލުކޮށްފައިވާ ޒިންމާތައް އަދާކުރުމަށް އެކަނި ކަމަށެވެ. ހަމައެހެންމެ ޚިދުމަތް ފޯރުކޮށްދިނުމުގައި އެއްވެސް މީހެއްގެ ނިސްބަތްވާ ކުލައަށް ނުވަތަ ޢާއިލާއަށް ނުބަލައި ހަމަހަމަ އުސޫލެއް ގެންގުޅެންޖެހޭނެ ކަމަށް ޤާނޫނުގައި ބަޔާންކޮށްފައިވާ ކަމަށް ވެސް އެ ސިޓީގައި ބުނެފައިވެއެވެ.

އަދި ކައުންސިލް އިދާރާގެ ގޯތިތެރެއާއި ޢާންމު ޚިދުމަތްތަކަށް ކަނޑައެޅިފައިވާ ބިންތައް ޕާޓީއެއްގެ ފިކުރު ފެތުރުމަށް ބޭނުންކުރުމަކީ ޤާނޫނާ ޚިލާފު ކަމެއްގެ ގޮތުގައި އެ އޮތޯރިޓީން ދެކޭ ކަމަށާ އެފަދަ ކަންކަމަކީ ކައުންސިލަރުންގެ ސުލޫކީ މިންގަނޑާ ވެސް ފުށުއަރާ ޢަމަލެއް ކަމަށް ސިޓީގައި ފާހަގަކޮށްފައިވެއެވެ.

"ކައުންސިލް އިދާރާއަކީ ރައްޔިތުން ހިދުމަތް ހޯދުމަށް އަންނަ މުހިއްމު އިދާރާއެއްކަމުން އެފަދަ ތަންތަނުގައި ސިޔާސީ ހަރަކާތްތައް ހިންގުމަކީ ރައްޔިތުންގެ ހިތުގައި ނުތަނަވަސްކަން އުފެދިގެންދާނެ ކަމެއް ކަމުގައި ވެސް ދެކެމެވެ. ކައުންސިލްތަކަކީ ލާމަރުކަޒީ އުސޫލުން ދައުލަތުގެ ހިދުމަތްތައް ދިނުމަށް ގާނޫނުން ގާއިމްކޮށްފައިވާ ފަށަލައަކަށްވާއިރު ކައުންސިލުން ފޯރުކޮށްދޭ ހިދުމަތްތައް ދިނުމުގައި ސިޔާސީ ފިކުރެއް ޕްރޮމޯޓުނުވާނެހެން ކައުންސިލްތައް އަމަލުކުރުމަކީ މި ނިޒާމަށް ރައްޔިތުން ކޮށްފައިވާ އިތުބާރު ގެއްލޭނެ އަމަލެއްކަމުގައި މި އޮތޯރިޓީން ދެކެމެވެ.“ އެލްޖީއޭގެ ސިޓީގައި ބުނެފައިވެއެވެ.

އެލްޖީއޭއިން މިފަދަ އެންގުމެއް އަންގާފައިވާއިރު، މިމަހު 1 އިން 3 އަށް ބޭއްވި އިދިކޮޅު އެމްޑީޕީގެ ކޮންގްރެސް ބާއްވާފައިވަނީ މާލެ ސިޓީ ކައުންސިލްގެ ހޯލުގައިކަން ފާހަގަކޮށްލަންޖެހެއެވެ. އެޕާޓީން ބުނި ގޮތުން އެތަނުގައި ކޮންގްރެސް ބާއްވަންޖެހުނީ އިތުރު އެއްވެސް ތަނެއް ނުލިބިގެންނެވެ.