ޕްރިންސަސް ކޭޓް އަށް ކެންސަރު ޖެހިފައިވާކަން ހާމަ ކުރައްވައިފި

އިނގިރޭސިވިލާތުގެ ވަލީ އަހުދު، ޕްރިންސް ވިލިއަމްސް ގެ އަނބިކަބަލުން ޕްރިންސަސް ކޭޓް މިޑަލްޓަން އަށް ކެންސަރު ޖެހިފައިވާކަން ހާމަކުރައްވައިފިއެވެ.

ސޯޝަލްމީޑިއާއަށް ކޭޓް ދޫކޮށްލެއްވި ވީޑިއޯގައި ވިދާޅުވީ، މި އަހަރުގެ ޖެނުއަރީމަހު އެކަމަނާ ލަންޑަނުގައި ބަނޑުގެ އޮޕްރޭޝަނެއް ކުރި އިރު، އޭރު ކެންސަރު ހުރިކަން ފާހަގަ ނުކުރެވޭ ކަމަށެވެ. ނަމަވެސް އޮޕަރޭޝަނަށް ފަހު ހެދި ޓެސްޓްތަކުން އެކަމަނާ އަށް ކެންސަރު ޖެހިފައިވާކަން ހާމަވެގެން ދިޔަ ކަމަށް ވެސް ކޭޓް ވިދާޅުވިއެވެ.

ކޭޓް އަށް ޖެހިވަޑައިގަތީ ކޮންކަހަލަ ކެންސަރުގެ ބާވަތެއް ކަން ވިދާޅުނުވި ނަމަވެސް ކެންސަރުގެ ބަލިމަޑުކަން ފެނުމާއި އެކު އެކަމަށް ފަރުވާ ހޯދަން ފެށި ކަމަށާއި، އެގޮތުން މެޑިކަލް ޓީމުގެ އިރުޝާދުގެ ދަށުން ކީމޯތެރަޕީގެ ފުރަތަމަ މަރުހަލާ މިހާރު ފަށްޓަވާފައިވާ ކަމަށް ކޭޓް ވިދާޅުވި އެވެ.

އުމުރުފުޅުން 42 އަހަރުގެ ކޭޓް "ގެއްލިގެން" ކަމަށް ބުނެ ގިނަ ބަޔަކު ކަންބޮޑުވުން ފާޅުކުރަމުން އަންނަނިކޮށް ކޭޓް ދެއްވި މި ހަބަރަކީ ގިނަ ބަޔަކަށް ހައިރާންކަން ގެނެސްދިން ހަބަރެކެވެ. މިދިޔަ އަހަރުގެ ޑިސެންބަރު މަހުން ފެށިގެން އެކަމަނާ އާންމުންގެ ތެރެއަށް ނިކުމެފައި ނުވާއިރު، ކެންސިންގޓަން ޕެލަސް އިން ވަނީ މި އަހަރުގެ އޭޕްރިލްމަހުގެ ކުރިން ޕްރިންސަސް ކޭޓް އާންމުންގެ ތެރެއަށް ނުކުމެ ބައްދަލު ނުކުރައްވާނެ ކަމަށް ވެސް މީގެ ކުރިން ބުނެފައެވެ.

ޕްރިންސަސް ކޭޓް އަށް ކެންސަރުގެ އާލާސްކަންފުޅު ޖެހިފައިވާކަން ހާމަކުރެއްވި އިރު، އިނގިރޭސިވލާތުގެ ރަސްގެފާނު ޗާލްސް ތިންވަނަ ވެސް ދަނީ ކެންސަރުގެ އާލާސްކަންފުޅަށް ފަރުވާ ހޯއްދަވަމުންކަން ފާހަގަކޮށްލަންޖެހެއެވެ.