ސިވިލް ސަރވިސް މުވައްޒަފުންނަށް ގަޑި ނުޖެހޭގޮތަށް 30 މިނިޓުގެ 'ބަފަރ ޓައިމް' އެއް ދީފި

ދިވެހި ސިވިލް ސަރވިސްގެ މުވައްޒަފުންނަށް ދިމާވާ ޚާއްޞަ ހާލަތްތަކާ ގުޅިގެން، ރަސްމީ ގަޑި ފެށޭ ވަގުތަށް އޮފީހަށް ހާޒިރުނުވެވޭ ދުވަސްތަކުގައި "ބަފަރ ޓައިމް" ގެ ގޮތުގައި 30 މިނިޓު ދޭ ގޮތަށް ސިވިލް ސަރވިސްގެ ގަވާއިދަށް އިޞްލާޙު ގެނެސްފިއެވެ.

ދިވެހި ސިވިލް ސަރވިސްގެ ގެނައި އިޞްލާޙުގައިވާ ގޮތުން، ބަފަރ ޓައިމަކީ އިތުރު ހުއްދައަކާ ނުލައި މަސައްކަތު ގަޑި އެޖަސްޓުކުރުމަށް މުވައްޒަފުންނަށް ލިބޭ ވަގުތެކެވެ.

އައު ގަވާއިދުގައި ބަޔާންކޮށްފައިވާ މުހިންމު ބައިތައް:

ގަޑި އެޖަސްޓުކުރުން

މުވައްޒަފަކު ރަސްމީ ގަޑި ފެށޭ ވަގުތަށްވުރެ ލަހުން ހާޒިރުވެއްޖެނަމަ، އެ ލަސްވި ވަގުތު އޮފީސް ނިމޭ ގަޑިއަށް އިތުރުކުރެވޭނެއެވެ. މިސާލަކަށް، ހެނދުނު 8:00 ގައި މަސައްކަތް ފަށަންޖެހޭ މުވައްޒަފަކު 8:15 ގައި ހާޒިރުވެއްޖެނަމަ، އެ މުވައްޒަފަކު އޮފީހުން ނިކުންނަންޖެހޭނީ ރަސްމީކޮށް އޮފީސް ނިމޭ ގަޑިއަށް 15 މިނިޓު އިތުރުކުރުމަށްފަހުގައެވެ.

އެންގުމާއި އުސޫލު

ބަފަރ ޓައިމްގެ ގޮތުގައި ލިބޭ 30 މިނިޓުގެ ތެރޭގައި މުވައްޒަފު ހާޒިރުވާނަމަ، އެކަން (ބަފާ ޓައިމް ނަގާކަން) ސަބަބާއެކު އެ ދުވަހެއްގެ ރަސްމީ މަސައްކަތު ގަޑި ނިމުމުގެ ކުރިން އޮފީހުގެ ހިއުމަން ރިސޯސް ސެކްޝަނަށް ނުވަތަ ކަނޑައެޅިފައިވާ ފަރާތަކަށް އަންގަންޖެހޭނެއެވެ. ނަމަވެސް 30 މިނިޓަށްވުރެ ލަސްވާނަމަ ބަލާނީ ގަޑިޖެހުނީ ކަމުގައެވެ.

އިސްތިސްނާވާ މުވައްޒަފުން

މި ލުއި ހުރިހާ މުވައްޒަފުންނަކަށް ނުލިބޭނެއެވެ. ބަފަރ ޓައިމް ބޭނުންނުކުރެވޭނެ ފަރާތްތަކުގެ ތެރޭގައި ހިމެނެނީ:

- އޮފީސް ހުޅުވައި ލެއްޕުމުގެ ޒިންމާ ހަވާލުކޮށްފައިވާ މުވައްޒަފުން.

- ޝިފްޓް ޑިއުޓީ ނުވަތަ ދަންފަޅި އުސޫލުން މަސައްކަތްކުރާ މުވައްޒަފުން.

- މިސްކިތު މުވައްޒަފުން.

- އާންމު ރައްޔިތުންނަށް ސީދާގޮތެއްގައި އޮފީހުގެ ރަސްމީ ގަޑިއާ އެއްގޮތަށް ޚިދުމަތް ދޭންޖެހޭ މުވައްޒަފުން.

މީގެ އިތުރުން، މަގާމުގެ ގޮތުން އިސްތިސްނާކުރަންޖެހޭ ފަރާތްތައް ސިވިލް ސަރވިސް ކޮމިޝަނަށް ހުށަހަޅައިގެން އިސްތިސްނާކުރުމުގެ އިޚްތިޔާރު ކޮމިޝަނަށް ލިބިގެންވެއެވެ.