ހުޅުމާލެ ފޭސް ދޭއްގެ މޫދަށް އެރޭ ސަރަހައްދަކާއި މަސްބާނާ ޕްލެޓް ފޯމެއް ހެދުމަށް ހިޔާލް ހޯދަނީ
ހުޅުމާލޭ ފޭސް 2 ގެ ބީޗް ސަރަހައްދުގައި ރައްކާތެރިކަމާ އެކު މޫދަށް އެރެވޭނެ ތަނަކާއި މަސްވެރިކަމަށް ޚާއްޞަ ޕްލެޓްފޯމެއް ބިނާކުރުމާ ގުޅޭ ގޮތުން ރައްޔިތުންގެ ޚިޔާލު ހޯދުމުގެ ސަރވޭއެއް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން މިއަދު ފަށައިފިއެވެ.
މި މަޝްރޫޢުގެ ތިމާވެށީގެ އަސަރު ވަޒަންކުރުމުގެ ރިޕޯޓް (އީއައިއޭ) ތައްޔާރުކުރުމުގެ މަސައްކަތް އެޗްޑީސީން ކުރިއަށް ގެންދާ އިރު އެ ރިޕޯޓަށް ބޭނުންވާ ޑޭޓާ ހޯދުމުގެ ވަސީލަތެއްގެ ގޮތުގައި ބޭނުންކުރަނީ މި ސަރވޭއެވެ. ރައްޔިތުން މިހާރު އެ ގޮނޑުދޮށް ބޭނުންކުރަމުންދާ ގޮތާއި ސަރަހައްދުގެ މިހާރުގެ ހާލަތު ދެނެގަތުމުގެ އިތުރުން ހުށަހެޅިފައިވާ އާޓިފިޝަލް ސްވިމިން ޒޯނާއި މަސްބާނާ ޕްލެޓްފޯމާ މެދު އާންމުން ދެކޭ ގޮތް ސާފުކުރުމަކީ މި ސަރވޭގެ އެންމެ ބޮޑު އެއް މަޤުޞަދެވެ.
އެޗްޑީސީން ހުށަހަޅާފައިވާ ޕްލޭނުގައި މައިގަނޑު ދެ ބައެއް ހިމެނެއެވެ. ފުރަތަމަ ބަޔަކީ ފްލޯޓިން ޕޮންޓޫނެއް ހިމެނޭ ގޮތަށް ފަރުމާކުރެވޭ ސްވިމިން ސަރަހައްދެކެވެ. އެ ސަރަހައްދުގައި އައުޓްޑޯ ފެންވަރާ ތަނަކާއި މޫދަށް ފައިބަން ފަސޭހަ ރޭމްޕެއް ހުންނާނެއެވެ. ދެވަނަ ބައިގައި ހިމެނެނީ ކޮންކްރީޓް ޑެކެއް ވޯކްވޭއެއް ހިޔާކޮށްފައިވާ ބެންޗުތައް އަދި މަސް ކަނޑަން ޚާއްޞަ ތަނެއް ހިމެނޭ މަސްބާނާ ޕްލެޓްފޯމެކެވެ.
ސަރވޭ މެދުވެރިކޮށް ލިބޭ މަޢުލޫމާތު އީއައިއޭ ރިޕޯޓުގެ ހުށަހެޅުންތައް ފައިނަލް ކުރުމަށާއި މުޖުތަމަޢުގެ ބޭނުންތަކާ އެއްގޮތަށް މަޝްރޫޢު ކުރިއަށް ގެންދިޔުމަށް ބޭނުންކުރާނެ ކަމަށް އެޗްޑީސީން ބުނެއެވެ. ފޭސް 2 ގައި ދިރިއުޅޭ ގިނަ ބަޔަކަށް ރައްކާތެރިކަމާ އެކު މުނިފޫހިފިލުވެވޭނެ ފުރުޞަތު ފަހިކޮށްދިނުމަކީ މި މަޝްރޫޢުގެ އެންމެ ބޮޑު އެއް ލަނޑުދަނޑި ކަމަށް އެ ކޯޕަރޭޝަނުން ފާހަގަކޮށްފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
