މާލޭ ބާޒާރުގައި އޮރެންޖުގެ އަގު 6 ރުފިޔާއަށް ދަށަށް ހިނގައްޖެ

އަގުއަރައިގެންދިޔަ އޮރެންޖުގެ އަގު މާލޭ ބާޒާރުގައި ވަރަށްބޮޑަށް ދަށަށް ހިނގައްޖެއެވެ.

މިފަހަރުގެ ރަމަޟާންމަސް ފެށުނުއިރު އަދި އޭގެ ކުރިންވެސް ބާޒާރުގައި އެންމެ އަގުބޮޑު ބާވަތެއްގެ ގޮތުގައި ފާހަގަކުރެވިފައި އޮތީ އޮރެންޖެވެ. ރޯދަ ފެށުނުއިރު ބާޒާރުގައި އޮރެންޖެއްގެ އަގު 10 ރުފިޔާގައި ހުރިއިރު، މިފަހަކުން އޮރެންޖުގެ އަގު ވަނީ 15 ރުފިޔާއަށްވެސް އަރާފައެވެ.

ބާާރުގައި އޮރެންޖުގެ އަގު އުފުލުނު މައިގަނޑު ސަބަބަކީ އޮރެންޖު ލިބުން ދަތުވުމެވެ. ބާޒާރުގައި އޮރެންޖުގެ އަގު އުފުލިގެން ދިޔައިރު، އެސްޓީއޯ ފިޔަވައި އެހެން ފިހާރަތަކުން އޮރެންޖު ވިއްކަމުން ގެންގޮސްފައިވަނީ 10 ރުފިޔާ އާއި 12 ރުފިޔާ އާ ދެމެދުގެ އަގުތަކެއްގައެވެ. ބާޒާރުން އޮރެންޖު ލިބުން ދަތިވެ، އެންމެ އަގު އުފުލިގެން ދިޔައިރު އެސްޓީއޯއިން އޮރެންޖު ވިއްކަމުްނ ދިޔައީ ކިލޯއެއް 40 ރުފިޔާ އަށެވެ. އޭރުން އޮރެންޖެއްގެ އަގު ވަކި ޖެހެނީ 6 ވަރަކަށް ރުފިޔާ އަށެވެ.

މާލޭ ބާޒާރުގައި އިއްޔެ އޮރެންޖުގެ އަގު ވެއްޓިފައިވާއިރު، މިހާރު އެންމެ އަގު ބޮޑުވެގެންވެސް އޮރެންޖެއް 6 ރުފިޔާއަށް ލިބެއެވެ. ބައެއް ތަންތަނުން އޮރެންޖު 5 ރުފިޔާއަށްވެސް ލިބެއެވެ. ހުޅުމާލޭ ފޭސް ދޭއްގެ ސުމަޕާޓުތަކުންވެސް މިހާރު އޮރެންޖު 6 ރުފިޔާއަށް ލިބެއެވެ.

ބާޒާރުގައި އޮރެންޖު ލިބުން އަގުހެޔޮވެފައިވާއިރު، މާލޭ ވިޔަފާރި ބަނދަރު ހިންގާ އެމްޕީއެލްއިން ވަނީ ރާއްޖެ ގެންނަ ތަރުކާރީ އާއި މޭވާގެ ބާވަތްތައް ކްލިއާކުރުން އަވަސްކޮށްފައެވެ. އެގޮތުން ފާއިތުވެދިޔަ ދެ ދުވަހުވެސް ރެކޯޑް މިންވަރަކަށް ކާބޯތަކެތި ކްލިއާކޮށްފައިވާަކަމަށް އެމްޕީއެލްގެ ތަފާސްހިސާބުތަކުން ދައްކައެވެ.

އޮރެންޖަކީ ރޯދަމަހު ފެޝަން ފުރުޓާއެކު ދިވެހިން އާއްމުކޮށް ފަނިގިރުމަށް ބޭނުންކުރާ ބާވަތެކެވެ. މާލޭ ބާޒާރުގައި އޮރެންޖެއްގެ އަގު 6 ރުފިޔާއަށް ވެއްޓުނު ނަމަވެސް، ބާޒާރުގައި ފެޝަންފުރުޓް ކިލޯއެއްގެ އަގު އުޅެނީ 120 ރުފިޔާ އާއި 150 ރުފިޔާ އާ ދެމެދުގެ އަގުތަކެއްގައެވެ.