ރައީސްގެ މާލީ ބަޔާން: އެކައުންޓްގައި 1.8 މިލިއަން، 1.3 މިލިއަންގެ ލޯނެއް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެމަނިކުފާނުގެ މާލީ ބަޔާން މިއަދު ރައީސުލްޖުމްހޫރިއްޔާގެ އޮފީހުގެ ވެބްސައިޓްގައި އާންމު ކުރައްވައިފި އެވެ.

އެމަނިކުފާނުގެ މާލީ ބަޔާނުގައި ވަނީ ވޭތުވެދިޔަ ހަ މަސް ދުވަހުގެ ތެރޭގައި ލިބިވަޑައިގެންނެވި އާމްދަނީ އާއި އެމަނިކުފާނުގެ އަނބިކަނބަލުން މެޑަމް ސާޖިދާ މުހައްދަށް ލިބިވަޑައިގެންފައިވާ އާމްދަނީ އާއި މިލްކިއްޔާތުގައި ހުރި މުދާ / ވިޔަފާރި މަސްލަހަތާއި ގުޅޭ މާލީ ހުރިހާ ތަފްސީލުތައް ވަނީ ހާމަކުރައްވާފަ އެވެ.

މާލީ ބަޔާނުގައިވާ ގޮތުން މިދިޔަ ހަ މަސް ދުވަހު މުސާރައިގެ ގޮތުގައި ރައީސަށް ލިބިވަޑައިގެންފައިވަނީ 282,024.00 ރުފިޔާ އެވެ. އަދި ހުޅުމާލޭ ރޯހައުސް އަކުން ކުލީގެ ގޮތުގައި 240,000 ރުފިޔާ ލިބިވަޑައިގެންފައިވެ އެވެ. އަދި މ. ފިޤް އިން 180,000 ރުފިޔާ ލިބިވަޑައިގެންފައިވެ އެވެ. މިއީ އެމަނިކުފާނަށް ހިބައިން ލިބިވަޑައިގެންފައިވާ ބިންކޮޅެކެވެ.

ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދަށް ރައީސުލްޖުމްހޫރިއްޔާގެ އަނބިމީހާއަށް ލިބޭ އެލަވަންސްގެ ގޮތުގައި 199,99.98 ރުފިޔާ ލިބިވަޑައިގެންފައިވެ އެވެ. އަދި އެކަމަނާއަށް ދިމްޔާތު ޕްރައިވެޓް ލިމިޑެޓުން މުސާރައިގެ ގޮތުގައި 78,000 ރުފިޔާ ލިބިވަޑައިގެންފައިވެ އެވެ. މީގެ އިތުރުން މިނިސްޓްރީ އޮފް ހެލްތު، ފެމިލީ އެންޑް ވެލްފެއަރގެ ކޮންސަލްޓަންޓްގެ މަގާމުގައި ހުންނެވުމުން މުސާރައިގެ ގޮތުގައި ހަ މަސްދުވަސްތެރޭ 4,927.32 ރުފިޔާ ލިބިވަޑައިގެންފައިވެ އެވެ.

ރައީސުލްޖުމްހޫރިއްޔާގެ މިލްކިއްޔާތު

ރައީސުލްޖުމްހޫރިއްޔާގެ މިލްކިއްޔާތުގައިވާ މ. ދިމްޔާތަކީ ވާރުތައިން ލިބިވަޑަައިގެންފައިވާ ބިމެއްކަން މާލީ ބަޔާނުގައި ފާހަގަކޮށްފައިވެ އެވެ. ހުޅުމާލެ އެމްބަރ ޓެރަސް 2 ގެ އަގަކީ 5,919,500.00 ރުފިޔާ އެވެ. ހއ. ވަަށަފަރުގައިވާ ރައީސްގެ ދިމްޔާތު ނަމަކަށްކިޔާ ބިމުގެ އަގަކީ 150,000 ރުފިޔާ އެވެ. މ. ފިޤްގެ ބައެއް ރައީސަށް ހިބައިން ލިބިވަޑައިގެންފައިވާ ކަމަށްވެސް މާލީ ބަޔާނުގައިވެ އެވެ.

މީގެ އިތުރުން 260,000 ރުފިޔާގެ ކާރެއް އެމަނިކުފާނުގެ މިލްކިއްޔާތުގައިވެ އެވެ.

މާލީ ބަޔާނުގައި ވަނީ ބޭންކުގައި ހުރި ފައިސާގެ ތަފްސީލުތައް ވެސް ހިއްސާކޮށްފަ އެވެ. އެގޮތުން ބަލާއިރު ބީއެމްއެލްގެ ދިވެހި ރުފިޔާ އެކައުންޓްގައި 184,845.52 ރުފިޔާ ހުރިއިރު ބީއެމްއެލްގެ ސޭވިސް އެކައުންޓްގައި 1,701,470.44 ރުފިޔާ އެބަހުއްޓެވެ. އަދި އިސްލާމިކް ބެންކުގެ ސޭވިންގްސް އެކައުންޓްގައި ވަނީ 1,000 ރުފިޔާ އެވެ.

މީގެ އިތުރުން މޯލްޑިވްސް ފައިނޭންސް އެންޑް ލީސިންގ ކޮމްޕެން ނެގި ލޯނަކަށް މިވަގުތާ ހަމައަށް ނުދެއްކި 1,319,265.13 ރުފިޔާ އޮތް ކަމަށްވެސް މާލީ ބަޔާނުގައިވެ އެވެ.