ސިނަމާލެ ބްރިޖް އެހެރީ ޑިޒައިނާއެއްގޮތަށް.ލޭނެއް މަދެއްނޫން: މުއްތަލިބް
ސިނަމާލެ ބްރިޖްގައި ލޭނު މަދުވާކަމަށް ގުޅޭގޮތުން ދައްކާ ވާހަކަތަކަށް އިމާރާތްކުރުމާއި ބިނާރާބެހޭ ވަޒީރު ޑރ.ޢަބްދުﷲ މުއްޠަލިބް ރައްދުދެއްވައިފިއެވެ.
ބްރިޖުން ލޭނުތަކެއް މަދުވެގެން ކަމަށް ބުނެ ރައީސް ޔާމީނު ޑރ.މުއިއްޒުއަށް ހަވަރަށް ދެއްވިކަމަށް ސަންގުޓީވީގައި ދެއްކެވި ވާހަކަތަކާ ގުޅިގެން މީސްމީޑިއާގައި އެކި ފަރާތްތަކުން ދައްކަމުން ގެންދަވާ ވާހަކަތާ ގުޅިގެން މުއްތަލިބް ވަނީ އެކްސްގައި އެކަން އޮތްގޮތް ސާފްކޮށްދެއްވާފައެވެ.
ބްރިޖް އިފްތިތާހްކުރުމަށް ބޭއްވި ރަސްމިއްޔާތުގައި ދެއްކި ބްރިޖްގެ ޑިޒައިން ވީޑިއޯއިން ނަގާފައިވާ މަންޒަރެއް އެކްސްގައި ހިއްސާކުރައްވަމުން މުއްތަލިބް ވިދާޅުވެފައިވަނީ، ބްރިޖް މަސައްކަތްކޮށް ނިންމާފައިވަނީ ފައިނަލް ޑިޒައިނާ އެއްގޮތަށް ކަމަށެވެ. ބްރިޖްގެ ފައިނަލް ކުރެހުމަށް އެއްވެސް ބަދަލެއް ގެނެސްފައި ނުވާނޭކަމަށްވެސް މިނިސްޓަރު މުއްތަލިބްގެ ޕޯސްޓްގައި ބުންޏެވެ.
ސިނަމާލެ ބްރިޖުން ލޭނެއް މަދުވެގެން އެ ވާހަކަ ބްރިޖް ހުޅުވި ދުވަސްވަރުވެސް ސިޔާސީ ބައެއް ފަރާތްތަކުން ވަނީ ދައްކާފައެވެ. މިހާރުގެ ރައީސް ޑރ.މުހައްމަދު މުއިއްޒުއަކީ ސިނަމާލެ ބްރިޖް މަޝްރޫޢުގެ މަސައްކަތް ކުރިއަށްދިޔައިރު، އެ މަސައްކަތުގައި ސަރުކާރުގެ ފަރާތުން އެކުލަވާލާފައިވާ ވިލަރެސް ކޮމިޓީގައި އެންމެ އިސްކޮށް ހުންނެވި ފަރާތެވެ. އަދި އޭރުގެ ހައުސިން މިނިސްޓަރަކީވެސް އަދުގެ ރައީސް ޑރ.މުއިއްޒުއެވެ.
ސިނަމާލެ ބްރިޖް މަޝްރޫޢުއަކީ ޗައިނާ ސަރުކާރުގެ އެހީގައި ކުރިއަށްގެންދިއަ މަޝްރޫޢުއެކެވެ. ބްރިޖް މަސައްކަތް 2016 ވަނަ އަހަރު ފެށިއިރު މަޝްރޫޢުގެ މަސައްކަތް ނިންމައި ބްރިޖް ރަސްމީކޮށް ހުޅުވާފައިވަނީ 2018 ވަނަ އަހަރުގެ އޮގަސްޓްމަހުގެ 31 ވަނަ ދުވަހުގެ ރެއެވެ. ބްރިޖް މަޝްރޫޢުއަށް ޖުމްލަ 210 މިލިއަން ޑޮލަރު ހަރަދުވިއިރު، މީގެ ތެރެއިން ބޮޑުބައި ހަމަޖައްސާފައިވަނީ، ޗައިނާ ސަރުކާރުގެ ހިލޭ އެހީގެ ދަށުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
