ކަނޑުތަކާ ބެހޭ ދުވަސް ފާހަގަކުރުމަށް ކުރިއަށްގެންދާ މޫދު ހަރަކާތްތައް ފަށައިފި
ލިޔުންތެރިޔާ
އަބްދުﷲ ހުސައިން
ބައިނަލްއަޤްވާމީ ކަނޑުތަކުގެ ދުަވސް ފާހަގަކުރުމުގެ ގޮތުން ކުރިއަށްގެންދާ މޫދު ހަރަކާތްތައް މިއަދު ފަށައިފިއެވެ.
މުޅި ރާއްޖޭގެ އެންމެނަށް ބައިވެރިވޭގޮތަށް ފެށި މި ހަރަކާތްތައް ރާއްޖޭގެ އެކި ކަންކޮޅުތަކުގައި މިއަދު ހެނދުނު ވަނީ ފަށާފައެވެ. މި ހަރަކާތްތައް ކުރިއަށްގެންދަނީ، ރާއްޖޭގެ އެކި ރަށްރަށުން އެއްވަގުތެއްގައި އެންމެން މޫދަށް އެރި ހަރަކާތްތައް ކުރިއަށްގެންދާ ގޮތަށެވެ.
"އެންމެން މޫދަށް" މިނަމުގެ ދަށުން މި ހަރަކާތް ރަސްމީކޮށް ފަށާފައިވަނީ ހުޅުމާލޭ ފޭސް އެކެއްގެ ގޮނޑުދޮށުންނެވެ. މިކަމަށްޓަކައި ކުރިއަށްގެްނދިޔަ ހަރަކާތުގައި މަސްވެރިކަމާ ބެހޭ ވަޒީރު އަހުމަދު ޝިޔާމް އާއި އެޗްޑިސީ ގެ މެނޭޖިންގ ޑިރެކްޓަރ ބްރިގޭޑިއަރ ޖެނެރަލް (ރ.ޓ.ޑ) އަލީ ޒުހަރުވެސް ބައިވެރިވެވަޑައިގެންނެވި އެވެ. އަދި ވުޒަރާގެ އިސްވެރިންނާއި ސަރުކާރުގެ ކުންފުނިތަކުގެ ބޭފުޅުން ބައިވެރިވެވަޑައިގެންނެވި އެވެ
މަސްވެރިކަމާ ބެހޭ ވުޒާރާއިން ބުނީ، މި ހަރަކާތަކީ، ސިޓީ ކައުންސިލްތަކާއި ރަށު ކައުންސިލްތަކާއި ދައުލަތުގެ އެކި މުއައްސަސާތަކާއި ގިނަ ރައްޔިތުން ގުޅިގެން، ރާއްޖޭގެ ކަނޑުފަޅުތަކުގެ މުހިންމުކަން ފާހަގަ ކުރުމަށް ހިންގާ ވަރަށް ޚާއްޞަ ހަރަކާތެއް ކަމަށެވެ.
ހުޅުމާލޭ ދިރާގު ބީޗު ސަރަޙައްދުގައި 'އޯޝަން ފެސްޓިވަލް' ގެ ނަމުގައި ފެށި މި ހަރަކާތްމިއަދު ހަވީރު 17:30 ގެ ނިޔަލަށް ކުރިއަށްދާނެއެވެ. ވުޒާރާއިން ބުނީ ކުރީ މިދިޔަ އަހަރެކޭ އެގޮތަށް މި ފެސްޓިވަލް ކުރިއަށްގެންދަނީ ކުޑަކުދިންނަށް ބައިވެރިވެވޭ ގޮތަށް ތަފާތު މޫދު ކުޅިވަރުތައް ހިމަނައިގެން ކަމަށެވެ. ހަރަކާތްތައް ކުރިއަށްދާއިރު، އެކި އޮފީސް އަދި ކުންފުނިތަކުގެ ސްޓޯލްތައްވެސް ވަނީ ބަހައްޓާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
