ހިޔާވެހި ފައިނޭންސް ސްކީމްގެ ސަބަބުން ދަތިހާލުގައި އުޅޭ ގިނަ އާއިލާތަކަކަށް ގެދޮރު ލިބޭނެ: ހައިދަރު

"ހިޔާވެހި ފައިނޭންސް ސްކީމް" ގެ ދަށުން މާލީ ތަނަވަސްކަން ނެތުމުގެ ސަބަބުން ދަތިހާލުގައި އުޅޭ ވަރަށް ގިނަ އާއިލާތަކަކަށް ގެދޮރުގެ ތަނަވަސްކަން ލިބިގެންދާނެކަމަށް ގެދޮރުވެރިކަމާއި ބިމާއި އުމްރާނީ ތަރައްޤީއާއި ބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ.

"ހިޔާވެހި ފައިނޭންސް ސްކީމް" އަކީ ގެ އަޅަން ބޭނުންވެ އެކަން ނުވެ ތިބި މީހުންނާއި، ގެދޮރު މަރާމާތު ކުރަން ބޭނުންވެ އެކަންވެސް ނުވެފައި ތިބި މީހުންނަށް ކުޑަ އިންޓަރެސްޓް ރޭޓްގައި ލޯނު ދޫކުރުމަށް ކުރިއަށް ގެންދާ ޚާއްސަ ސްކީމެކެވެ. މި ސްކީމް އިފްތިތާޙް ކޮށްފައިވަނީ އެކަމަށްޓަކައި މިއަދު ބޭއްވުމު ޚާއްސަ ރަސްމިއްޔާތެއްގައެވެ.

އެ ރަސްމިއްޔާތުގައި ވާހަކަ ދައްކަވަމުން ވަޒީރު ހައިދަރު ވިދާޅުވީ، "ހިޔާވެހި ފައިނޭންސް ސްކީމް" އަކީ ބޯހިޔާވަހިކަމުގެ މައްސަލަ ހައްލުކުރުމަށް ރައްޔިތުންނަށް މާލީ ގޮތުން ދިމާވެފައިވާ ދަތިތައް ހައްލު ކުރުމަށް ހުޅުވާލެވޭ ”ދޮރޯއްޓެއް“ ކަމަށެވެ.

"ރާއްޖޭގެ އެކި ރަށްރަށުގައި ގެދޮރުނޭޅި ފަޅަށްހުރި ގޯތިތަކުގައި ގެދޮރު އިމާރާތްކުރުމަށް %5 ގެ ސާރވިސް ޗާޖެއްގައި ފައިސާ ދޫކުރުމަށް އެކުލަވާލާފައިވާ "ހިޔާވެހި ފައިނޭންސް ސްކީމް". މި ސްކީމްގައި ހިމެނޭ ވަސީލަތްތަކުގެ އެހީގައި މާލީ ތަނަވަސްކަން ނެތުމުގެ ސަބަބުން ދަތިހާލުގައި އުޅޭ ވަރަށްގިނަ އާއިލާތަކަކަށް ގެ ދޮރުގެ ތަނަވަސްކަން ލިބިގެންދާނެކަމަށް ގަބޫލުކުރަން."

ވަޒީރު ހައިދަރު

”ހިޔާވެހި ފައިނޭންސް ސްކީމު“ ތިން ކެޓަގެރީއެއް ހިމެނެއެވެ. އެއީ

* ހުރިހާ ރަށަކަށް ދޫކުރެވޭ 1 މިލިއަން ރުފިޔާގެ ފައިސާއަށްވާ ގެދޮރު އިމާރާތް ކުރުމަށް ބޭނުންވާ ވަސީލަތްތަކާއި ހައުސިންގ ލޯން ވަސީލަތްތަކާއި،

* މާލޭ ސަރަހައްދަށް ދޫކުރެވޭ 6 މިލިއަން ރުފިޔާގެ ވަސީލަތްތަކާއި

* އާބަން ސަރަހައްދު ތަކަށް ދޫކުރެވޭ 3 މިލިއަން ރުފިޔާގެ ވަސީލަތްތައް

ވަޒީރު ވިދާޅުވި ގޮތުގައި، މި ވަސީލަތްތަކަކީ އާއިލާތަކަށް ފުރަތަމަ ބޯހިޔާވަހިކަން ހޯދުމަށް ލުއިފަސޭހަ ގޮތްތަކެއް ހޯދައިދިނުމުގެ ގޮތުން ސަރުކާރުން އެކުލަވާލި ފައިނޭންސް ސްކީމްގެ ދަށުން ދޫކުރެވޭނެ ތަކެތި ކަމަށެވެ.

ވުމާއެކު އެކަމަށް ހުށަހަޅާ ފަރާތުގެ ނަމުގައި އަމިއްލަ ނުވަތަ ދައުލަތުން ދޫކޮށްފައިވާ ބޯހިޔާވަހިކަމެއް އޮވެގެންނުވާނެކަމަށް ވަޒީރު ހައިދަރު ވިދާޅުވިއެވެ.

މި ލޯނަށް ކުރިމަތިލާން ޖެހެނީ ހިޔާވަހި ޕޯޓަލް މެދުވެރިކޮށެވެ. މާދަމާއިން ފެށިގެން ލޯނަށް އެދި ހުށަހެޅޭނެ އެވެ.