ގޯލްޑްކަޕް: ޝަމާލްގެ ހެޓްރިކާއެކު މީދޫ އަތުން ފުވައްމުލަކަށް ފަސޭހަ މޮޅެއް

މުޅި ރާއްޖެއަށް ހުޅުވާލައިގެން މިހާރު ކުރިއަށްދާ ގޯލްޑްކަޕް ފުޓްބޯޅަ މުބާރާތް 2024 ގެ ގުރޫޕް އޭގައި ހޮނިހިރު ދުވަހުގެ ރޭ ދ. މީދޫއާއި ފުވައްމުލައް ސިޓީ ވާދަކުރި މެޗުގެ ފަސޭހަކަމާއެކު 4-0 ގެ ނަތީޖާއަކުން ކާމިޔާބުކޮށް ފުވައްމުލަކުން މުބާރާތުގެ ދެވަނަ ބުރުގެ ޖާގައެއް ކަށަވަރުކޮށްފިއެވެ.

މުބާރާތުގައި ފުވައްމުލައް ކުޅުނު ފުރަތަމަ މެޗުގައި ދ.ކުޑަހުވަދޫ އަތުން 3-1 ގެ ނަތީޖާއަކުން މޮޅުވެފައިވާއިރު، ދެވަނަ މެޗުގައި ހއ.ދިއްދޫ އަތުން އެޓީމު މޮޅުވީ 7-3 ގެ ނަތީޖާއަކުންނެވެ. އަދި މީދޫގެ ފުރަތަމަ މެޗުގައި ގދ.ފަރެސްމާތޮޑާ އަތުން 4-1 ގެ ނަތީޖާއަކުން މޮޅުވިއިރު، މިއީ އެޓީމުގެ ދެވަނަ މެޗެވެ.

މެޗުގެ ފުރަތަމަ ހާފުގައި މޮޅަށްކުޅެ ފުވައްމުލަކުން މެޗު ޑޮމިނޭޓްކުރިއިރު، އެޓީމުން މެޗުގެ ލީޑުހޯދީ ފުރަތަމަ ހާފުގެ 15 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ އަލީ ޝަމާލް އަބްދުﷲ އެވެ.

މިއީ މީދޫގެ ހާފު މެދެއްހާ ހިސާބުން ލިބުނު ހިލޭ ޖެހުމެއްގައި އޭނާ ކާމިޔާބުކޮށްދިން ލަނޑެކެވެ. އަދި އޭގެ ތިން މިނެޓްފަހުން ޝަމާލް ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ފުވައްމުލައް ކުރީގައި އޮވެގެންނެވެ.

މެޗުގެ ދެވަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެންކުޅެ ފުވައްމުލަކުން މެޗު ޑޮމިނޭޓްކުރިއިރު، އެޓީމުގެ ތިންވަނަ ލަނޑު ފަހުހާފުގެ 86 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން އިނާން އަހްމަދު އެވެ. މިއީ މީދޫގެ ޕެނަލްޓީ އޭރިއާ ބޭރުން ލިބުނު ހިލޭޖެހުމެއްގައި ޝަމާލް ގޯލު ކުރިމައްޗަށް ހުރަސްކޮށްދިން ބޯޅައެއް ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިމެޗުގައި ޝަމާލް އޭނާގެ ހެޓްރިކް ފުރިހަމަކުރީ ފަހުހާފުގެ އިތުރު ވަގުތުގެ ތެރޭގައި އެޓީމަށް ލިބުނު ޕެނަލްޓީއަކުންނެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 4-0 ގެ ނަތީޖާއަކުން ފުވައްމުކައް ކުރީގައި އޮވެގެންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ފުވައްމުލައް ސިޓީގެ އަލީ ޝަމާލް އަބްދުﷲ އެވެ.

މިނަތީޖާއެކު ކުޅުނު ތިންމެޗުން ފުވައްމުލައް ސިޓީއަށް ނުވަ ޕޮއިންޓް ލިބިފައިވާއިރު ބާކީ އެއްމެޗު އޮއްވައި އެޓީމުން ވަނީ މުބާރާތުގެ ގުރޫޕް ސްޓޭޖު ދެވަނަ ބުރުން ޖާގައެއް ކަށަވަރުކޮށްފައެވެ. އަދި މީދޫ ކުޅުނު ދެމެޗުން އެޓީމަށް ލިބުނު ތިން ޕޮއިންޓާއެކު އެޓީމު މިވަގުތު އޮތީ ފަސް ޓީމު ހިމެނޭ ގުރޫޕް އޭގެ ތިންވަނައިގައެވެ.