ލޭ ހަދިޔާ ކުރުމަށް ހޭލުންތެރިކުރަން "ލޭ އެޕް"އިން އިސްނަގައިގެން ނެރޭ ”ލޭގެ ޞަދަޤާތް“ ލަވަ މާދަން ރިލީސް ކުރަނީ

ލޭ ހަދިޔާ ކުރުމަށް ހޭލުންތެރިކުރަން "ލޭ އެޕް"އިން އިސްނަގައިގެން ނެރޭ  ”ލޭގެ ޞަދަޤާތް“ ލަވަ މާދަން ރިލީސް ކުރަން ނިންމައިފިއެވެ.

މި ލަވަ ނެރުމަށް ހަމަޖެހިފައިވަނީ މާދަމާ މެންދުރު، ޓީވީއެއްގެ ”ހޭޔަންބޯ“ ޕްރޮގްރާމްގެ ތެރެއިންނެވެ.

މި ލަވައަކީ ލޭ ހަދިޔާ ކުރުމުގެ ހުރި މަތި ކަމާއި، އޭގެ މުހިންމު ކަމުގެ މައްޗަށް އަލިއަޅުވާލާފައިވާ ލަވައަކަށްވާއިރު، ލޭ ނުލިބުމުގެ މައްސަލައަކީ ރާއްޖޭގައި ވަރަށް ބޮޑު މައްސަލައެއްކަން ފާހަގަކޮށްލަންޖެހެއެވެ.

އެގޮތުން ތެލެސީމިއާ ހުންނަ ފަރާތްތަކާއި، އެނޫންވެސް އެހެނިހެން ޙާލަތްތައް މެދުވެރިވެ، ލޭ ބޭނުންވާ ދަނޑިވަޅުތަކުގައި ވަރަށް ގިނަ މީހުންގެ ހުންނަ ލޭގެ ގުރޫޕްތަކުގެ ލޭވެސް ހޯދަން ބުރަ މަސައްކަތްތަކެއް ކުރަންޖެހެއެވެ. އަމިއްލައަށް އިސް ނަގައިގެން ގަވާއިދުން ބްލައިޑް ބޭންކަށް ލޭ ހަދިޔާ ކުރާ މީހުން އަދިވެސް މަދެވެ.

އެހެންކަމުން، މިއީ އެކަމަށް ހިތްވަރުދީ، ލޭ ހަދިޔާ ކުރުމަށް ބާރު އެޅުމުގެ މަޤުސަދުގައި ނެރޭ ލަވައެއް ކަމުގައި ލަވަ އުފައްދާފައިވާ ފަރާތުން ބުނެއެވެ.

މިއީ ލޭ އެޕް އިން އިސްނަގައިގެން އެހީ ޖަމިއްޔާއާއި ގުޅިގެން ނެރޭ"އިސްލާމިކް ރިދަމް"ގެ އުފެއްދުމެކެވެ. މި ލަވައަކީވެސް އިސްލާމިކް ރިދަމްއިން މީގެ ކުރިން ނެރެފައިވާ ލަވަތަކެކޭ އެއްފަދައިން، ތަފާތު އަދި އަސަރުގަދަ މަސައްކަތަކަށް ވެގެންދާނެއެވެ.

މޫސާ ޝިފާއުގެ އަސަރުގަދަ އަޑުން ކިޔާފައިވާ މި ލަވައިގެ ޅެން ހަދާފައިވަނީ އީސާ ޝަރީފެވެ. ލަވައިގެ އޯޑިއޯ ރެކޯޑިންގްގެ މަސައްކަތް ޙުސައިން ތައުފީޤު ފުރިހަމަކޮށްފައިވާއިރު، ވީޑިއޯ ޕްރޮޑަކްޝަން ހަދާފައިވަނީ 'އޯކޭޒް އިންކް' އިންނެވެ. މި ލަވައިގެން މީޑިއާ ޕާޓްނަރަކީ 'ވޮއިސް' އެވެ.

އިސްލާމިކް ރިދަމް އަކީ މީގެ ކުރިންވެސް އާންމުންގެ ބޮޑު މަގުބޫލުކަމެއް ހޯދާފައިވާ ތަފާތު ލަވަތަކެއް ނެރެފައިވާ ބައެކެވެ. އެގޮތުން "ރޮއްވާފަ ލޯތައް" ލަވައަކީ ގިނަ ބައެއްގެ ހިތްތަކާ ކުޅެލި، އެންމެ ފާހަގަކޮށްލެވޭ އެއް މަސައްކަތެވެ. މީގެ އިތުރުން "އުޖާލާވެ އުދަރެސް"، "އޮއްސުމުން" އަދި "ކަރުނަ" ފަދަ ލަވަތަކަކީވެސް މަގުބޫލު އުފެއްދުން ތަކެކެވެ