ހުޅުދުއްފާރު ދެކުނު އަވަށުގައި މިސްކިތެއް ބިނާކުރުމަށް ބައިވެރިވުމުގެ ފުރުސަތު
ރ. ހުޅުދުއްފާރުގެ ދެކުނު އަވަށުގައި 250 މީހުންގެ ޖާގައިގެ މިސްކިތެއް ބިނާކުރުމަށް އެހީވުމުގެ ފުރުސަތު އާއްމުންނަށް ހުޅުވާލައިފިއެވެ.
މި މަޝްރޫޢުއަށް އިސްނެގި އާއިލާއިން ވަނީ ޖުމްލަ ޚަރަދުގެ 20 އިންސައްތައަށް ވާ ޢަދަދު ހަދިޔާކޮށްފައެވެ. އޮގަސްޓް 25 ވާ އަންގާރަ ދުވަހު މަޝްރޫޢުގެ ޢަމަލީ މަސައްކަތް ފެށުމަށް ވަނީ ރާވައިފައިވާއިރު، މި މަޝްރޫޢުގައި އެހީ ޖަމިއްޔާއާއި، އަލް އަސްރު އަދި ވޮއިސް ގުޅިގެން ބައިވެރިވެއެވެ.
ހުޅުދުއްފާރުގައި ގާތްގަނޑަކަށް ތިރީހަކަށް އަހަރު ކުރިން މީހުން އާބާދުވި ދުވަސްވަރު އެކުލަވައިލި ބިން ބޭނުންކުރުމުގެ ޕްލޭނުގައި ދެކުނު އަވަށުން މިސްކިތަކަށް ބިމެއް ޚާއްޞަކުރި ނަމަވެސް މިއަދާ ހަމައަށް އެ ބިމުގައި މިސްކިތެއް ބިނާކޮށްފައެއް ނުވެއެވެ. މިހާރު އެ ސަރަޙައްދުގައި ބޮޑު އާބާދީއެއް ދިރިއުޅެމުންދާ އިރު ފެނަކަ ފަދަ ގިނަ މުވައްޒަފުން ގޮވައިގެން ހިންގާ މުއައްސަސާތައް ވެސް ޤާއިމުވެފައި އެބަ ހުއްޓެވެ. ހަމައެހެންމެ ރަށުގެ ޤަބުރުސްތާނު އޮންނަނީ ދެކުނު ފަރާތުގައި ކަމުން ބަންގީގެ އަޑު އެ ހިސާބަށް ފޯރުމަށް ޓަކައި ވެސް ދެކުނުގައި މިސްކިތެއް ހުރުން މުހިންމުވެފައިވެއެވެ.
އިސްލާމިކް މިނިސްޓްރީން ފާސްކޮށްދީފައިވާ 8,000 އަކަފޫޓުގެ މި ބިން އޮންނަނީ ބޮޑުތަކުރުފާނު މަގާއި ޒިޔާރަތް މަގު ގުޅޭ ކަންމައްޗެވެ. މިސްކިތުގެ އިމާރާތުގައި ނަމާދުކުރާ މައި ހޯލުގެ އިތުރުން ޤުރުއާން ކްލާހަކާއި ލައިބްރަރީއަކާއި ހިނަވާގެއަކާއި އިމާމު ކޮޓަރިއަކާއި ސްޓޯރޭޖާއި ވުޟޫކުރާ ބަޔާއި ފާޚާނާއާއި ފެންވަޅާއި ޕާކިން އޭރިއާ އަދި ގޯތިތެރެ ހިމެނެއެވެ.
މި މަޝްރޫޢަށް ފައިސާ ހަދިޔާކުރުމަށް އެދޭ ފަރާތްތަކަށް އެހީ ޖަމިއްޔާގެ "އެދިހަ" ޕޯޓަލް ގައިވާ މިސްކިތު ޕޯސްޓް މެދުވެރިކޮށް ބައިވެރިވެވޭނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
