އަނެއްކާވެސް އިސްލާމިކް ރިދަމްގެ ތަފާތު ލަވައެއް؛ ”ލޭގެ ޞަދަޤާތް“ ޓްރެއިލާ ނެރެފި

"އިސްލާމިކް ރިދަމް"ގެ އާ ލަވަ "ލޭގެ ޞަދަޤާތް" ގެ ޓްރެއިލާ އާންމުކޮށްފިއެވެ.

މި ލަވައަކީވެސް އިސްލާމިކް ރިދަމްއިން މީގެ ކުރިން ނެރެފައިވާ ލަވަތަކެކޭ އެއްފަދައިން، ތަފާތު އަދި އަސަރުގަދަ މަސައްކަތަކަށް ވެގެންދާނެއެވެ.

މޫސާ ޝިފާއުގެ އަސަރުގަދަ އަޑުން ކިޔާފައިވާ މި ލަވައިގެ ޅެން ހަދާފައިވަނީ އީސާ ޝަރީފެވެ. ލަވައިގެ އޯޑިއޯ ރެކޯޑިންގްގެ މަސައްކަތް ޙުސައިން ތައުފީޤު ފުރިހަމަކޮށްފައިވާއިރު، ވީޑިއޯ ޕްރޮޑަކްޝަން ހަދާފައިވަނީ 'އޯކޭޒް އިންކް' އިންނެވެ. މި ލަވައަކީ 'އެހީ' އަދި 'ލޭ އެޕް' އާ ގުޅިގެން ގެނެސްދޭ ޕްރޮޑަކްޝަނެކެވެ. މި ލަވައިގެން މީޑިއާ ޕާޓްނަރަކީ 'ވޮއިސް' އެވެ.

މި ލަވައަކީ ލޭ ހަދިޔާ ކުރުމުގެ ހުރި މަތި ކަމާއި، އޭގެ މުހިންމު ކަމުގެ މައްޗަށް އަލިއަޅުވާލާފައިވާ ލަވައަކަށްވާއިރު، ލޭ ނުލިބުމުގެ މައްސަލައަކީ ރާއްޖޭގައި ވަރަށް ބޮޑު މައްސަލައެއްކަން ފާހަގަކޮށްލަންޖެހެއެވެ.

އިސްލާމިކް ރިދަމް އަކީ މީގެ ކުރިންވެސް އާންމުންގެ ބޮޑު މަގުބޫލުކަމެއް ހޯދާފައިވާ ތަފާތު ލަވަތަކެއް ނެރެފައިވާ ބައެކެވެ. އެގޮތުން "ރޮއްވާފަ ލޯތައް" ލަވައަކީ ގިނަ ބައެއްގެ ހިތްތަކާ ކުޅެލި، އެންމެ ފާހަގަކޮށްލެވޭ އެއް މަސައްކަތެވެ. މީގެ އިތުރުން "އުޖާލާވެ އުދަރެސް"، "އޮއްސުމުން" އަދި "ކަރުނަ" ފަދަ ލަވަތަކަކީވެސް މަގުބޫލު އުފެއްދުން ތަކެކެވެ.

މި ލަވަތަކުގެ އެންމެ ޚާއްޞަ ސިފައަކީ، ޅެމުގެ މާނަފުން މެސެޖުތަކަށް ޝިފާއުގެ އަސަރުގަދަ އަޑުން އިންސާފުކޮށްދޭއިރު، އެއާ ގުޅޭގޮތަށް ތައްޔާރުކޮށްފައިވާ ވީޑިއޯ އާއި ވިޝުއަލް އިފެކްޓްސް އެވެ.

އަލަށް ނެރުނު "ލޭގެ ޞަދަޤާތް" ގެ ޓްރެއިލާ މިހާރު ޔޫޓިއުބް މެދުވެރިކޮށް ބަލައިލެވޭނެއެވެ.