އެމްޑީޕީން ކުރަން އެއުޅެނީ ފަނާކުރަނިވި މުޒާހަރާއެއް: ގާސިމް
ލިޔުންތެރިޔާ
އަބްދުﷲ ހުސައިން
އެމްޑީޕީން މިރޭ ބޭއްވުމަށް ހަމަޖެހިފައިވާ މުޒާހަރާއިން ނުކުންނާނެ ހެވެއްނެތް ކަމަށާއި، ޖުމްހޫރީ ޕާޓީން އެކަމުގައި ބައިވެރި ނުވުމަށް އެޕާޓީގެ ލީޑަރު ގާސިމް އިބްރާހީމް މެމްބަރުންގެ ކިބައިން އެދިވަޑައިގަންނަވައިފިއެވެ.
ލޫޓުވައިފި ލޫޓުވައިފި ނަމުގައި އެމްޑީޕީން މިރޭ ބޭއްވުމަށް ތައްޔާރުވަމުންދާ މުޒާހަރައާ ގުޅޭގޮތުން އެކްސްގައި ގާސިމް ކުރެއްވި ޕޯސްޓްގައި ވިދާޅުވެފައިވަނީ، މިއަދު ބަޔަކު ބޭއްވުމަށް ތައްޔާރުވަމުންދަނީ ބިނާކުރަނިވި ކަމެއް ކުރުމުގެ ނިޔަތުގައި ކުރިއަށްގެންދާ ހަރަކާތެއް ނޫންކަމަށާއި އެއީ ފަނާކުރަނިވި މުޒާހަރާއެއްކަމަށެވެ.
ގާސިމް ވިދާޅުވީ އެމްޑީޕީން ކުރަން އެއުޅެނީ ވެރިކަން ހޯދަންވެގެން ކުރަން އުޅޭ ބޮޑު ނުބައިކަމެއްކަމަށާއި، ޤައުމަށް މިހާރު ދިމާވެފައިވާ ދަރަނިވެރި ހާލަތުން އަރައިގަތުމަށް ކަމެއް ކޮށްދިނުމުގެ ނިޔަތެއް އެމީހުންގެ ނެތްކަމަށެވެ. އަދި އެމީހުން އެއުޅެނީ ފިތުނަ އުފައްދައި، މި ވެރިކަމުގައި ޤައުމަށް ހެވެއް ވެދާނެތީ އެކަން ހުއްޓުވަންކަމަށްވެސް ގާސިމް ފާހަގަކުރެއްވިއެވެ.
ގާސިމް ވިދާޅުވީ މި ސަރުކާރަށް ކުރަންޖެހިފައިވާ ކަމަކީ އިސްވެދިޔަ ވެރިކަންތަކުގައި ނަގާފައިވާ ދަރަނިތައް އަދާކުރުން ކަމަށާއި، ޤައުމަށް ލިބޭ ފައިސާގެ ބޮޑު ބައެއް ހޭދަވަނީ އެ ދަރަނިތައް ދެއްކުމަށްކަމަށެވެ. އެގޮތުން ގައުމު ބަނގުރޫޓްވިޔަ ނުދިނުމަށް އިތުރު ޓެކްސްތައް ނަގައިގެންވެސް އެއީ ކުރަންޖެހޭ ކަމެއްކަމަށް ގާސިމް ވިދާޅުވިއެވެ.
ހިޔާނާތުގެ މައްސަލާގައި ގާސިމް ވިދާޅުވީ ކުރީ ސަރުކާރުތަކުން ހިޔާނާތްތައް ހިންގިނަމަވެސް އޭރު އެކަންކަން ބަލާފައި ނުވާއިރު، އެކަމަށް އެޅުނު ފިޔަވަޅެއް ނޭޅުނުތަނުގައި އެއްކަމެއްވެސް ނުކުރެވުނު ކަމަށެވެ. ނަމަވެސް މިހާރު އެފަދަ ކަންކަން ކުރާ މީހުން މަގާމުތަކުން ވަކިކުރާތަން ފެންނަމުންދާކަމަށާއި، އެބާވަތުގެ ކަންކަން ނުކުރުމަށް ރައީސް ޑރ.މުއިއްޒު ނަސޭހަތް ދެއްވުމުގެ އިތުރުން ސަރުކާރުން ހިންގާ ހިޔާނާތްތައް ތަހްގީގުކުރަމުންދާތަން މިހާރު ފެންނަކަމަށެވެ.
އެހެންކަމުން އެމްޑީޕީގެ މުޒާހަރާއިން ނިކުންނާނެ ހަމައެކަނި ނަތީޖާއަކީ ގައުމު އަނދަވަޅަކަށް ވެއްޓުން ކަމަށާއި މިކަމުން ރައްޔިތުން އިތުރަށް ދަރަނިވެރިނޫންކަމެއް ފެންނާނެތޯ ގާސިމް ވަނީ ސުވާލު އުފައްދަވާފައެވެ.
އެމްޑީޕީ އުފެދުނުއިރު އެ ޕާޓީގެ ހަރަކާތްތަކުގައި އިސްކޮށް ހުންނެވި ގާސިމް ވިދާޅުވީ މިއަދުގެ މުޒާހަރާގައި ބައިވެރި ނުވާން އެދޭކަމަށާއި، މިއަދުގެ ހަރަކާތް ދެކެނީ ޤައުމު އިނދަ ޖައްސާލުމަށް ހިންގާ ހަރަކާތެއްގެ ގޮތުގައި ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
