ޖެޓްތައް އަންނާތީ، މާފަރު އެއާޕޯޓްވެސް ބިޒީވެއްޖެ

ފެށޭ އައު އަހަރާ ދިމާކޮށް މާފަރު އިންޓަރނޭޝަނަލް އެއާޕޯޓަށްވެސް ގިނަ އަދަދެއްގެ ޖެޓްތައް އަންނަން ފަށައިފިއެވެ.

މިކަމާ ގުޅޭގޮތުން މާފަރު އިންޓަރނޭޝަނަލް އެއާޕޯޓް ހިންގާ އައިލެންޑް އޭވިއޭޝަނުން ބުނީ، މިފަހަރުގެ އައު އަހަރާ ދިމާކޮށް މާފަރު އިންޓަރނޭޝަނަލް އެއާޕޯޓް ފެންނަނީ ވަރަށް ބިޒީކޮށްކަމަށެވެ. އެގޮތުން މިފަހަރުވެސް ގިނަ އަދަދެއްގެ ޖެޓްތައް އެ އެއާޕޯޓަށް އަންނަމުންދާކަމަށް އައިލެންޑް އޭވިއޭޝަނުން ބުންޏެވެ. މާފަރު އެއާޕޯޓަކީ ވެލާނާ އިންޓަރނޭޝަނަލް އެއާޕޯޓަށްފަހު އަމިއްލަ ޖެޓްތައް އެންމެގިނައިން ޖައްސާ އެއް އެއާޕޯޓެވެ.

މިދިޔަ އަހަރުގެވެސް އައު އަހަރާ ދިމާކޮށް މާފަރު އިންޓަރނޭޝަނަލް އެއާޕޯޓަށް ގިނަ އަދަދެއްގެ އަމިއްލަ ޖެޓްތައް ޖެއްސިއެވެ. ތަފާސްހިސާބުތަކަށް ބަލާއިރު، މިދިޔަ އަހަރު މާފަރު އެއާޕޯޓަށް ޖުމްލަ 353 އަމިއްލަ ޖެޓް ވަނީ ޖައްސާފައެވެ. އެއީ އޭގެ ކުރީ 2022 ވަނަ އަހަރަށްވުރެ 125 ޖެޓްގެ އިތުރުވުމެކެވެ. މިދިޔަ އަހަރުގެ ކުރީއަހަރު މާފަރު އެއާޕޯޓަށް ޖައްސާފައިވަނީ 228 ޖެޓެވެ.

މާފަރު އެއާޕޯޓް ރަސްމީކޮށް ބޭނުންކުރަން ފަށާފައިވަނީ 2020 ވަނަ އަހަރުގެ ޖުލައިމަހުގެ 1 ވަނަ ދުވަހުއެވެ. މާފަރު އެއާޕޯޓަށް ގިނަ އަދަދެއްގެ ޖެޓްތައް އަންނައިރު، މަތީފަންތީގެ ގިނަ ރިސޯޓްތަކެއް ނ.އަތޮޅުގައި ހިންގަމުން އަންނަކަން ފާހަގަކޮށްލެވެއެވެ. މިއަހަރުގެ އައު ސީޒަނާކުރިމަތިލިއިރު، މާފަރު އެއާޕޯޓްގެ ރަންވޭ ބޮޑުކުރުމުގެ މަސައްކަތް ވަނީ ކުރިއަށްގެންގޮސްފައެވެ. މިދިޔަ އަހަރުގެ މެއިމަހު ރަންވޭ ބޮޑުކުރުމަށް ފެށި މަސައްކަރް ނިންމާލީ މިއަހަރުގެ އޮކްޓޯބަރުމަހުއެވެ.

މާފަރު އެއާޕޯޓަށް އަލަށް ގެނައި ބަދަލާއެކު މިހާރު އެ އެއާޕޯޓްގައި އެއްވެސް ދަތިކަމެއްނެތި އެއްފަހަރާ 26 ޖެޓް ޕާކުކުރެވޭނޭކަމަށް އައިލެންޑް އޭވިއޭޝަނުން ވަނީ ބުނެފައެވެ. މީގެ ކުރިން ޕާކްކުރެވެނީ 13 ޖެޓެވެ.