މި ސަރުކާރުން ދޫކުރާ ފްލެޓާއި ގޯއްޗަށް ކުރިމަތިލާން މިއަހަރުގެ ތެރޭގައި ހުޅުވާލާނަން: މުއްތަލިބް

މި ސަރުކާރުގެ ބޯހިޔާވަހިކަމުގެ ސިޔާސަތުގެ ތެރެއިން ދޫކުރުމަށް ނިންމާފައިވާ ފްލެޓާއި ގޯއްޗަށް ކުރިމަތިލުމުގެ ފުރުސަތު މިއަހަރުގެ ތެރޭގައި ހުޅުވާލާނޭކަމަށް މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވިދާޅުވީ، މި ސަރުކާރުގެ ބޯހިޔާވަހިކަމުގެ ސިޔާސަތުގެ ތެރެއިން ދޫކުރުމަށް ހަމަޖެހިފައިވާ ފްލެޓާއި ގޯތި ދޫކުރާނޭ އުސޫލްތަކެއް މިހާރު އެކުލަވާލައި ނިމިފައިވާކަމަށެވެ. މުއްތަލިބް ވިދާޅުވީ އުސޫލުތައް މިހާރު ވާނީ ސަރުކާރުގެ ކަމާބެހޭ އިދާރާތަކުގެ ހިޔާލު ހޯދުމަށް ފޮނުވާފައިކަމަށާއި، އެ މަސައްކަތް ނިމި މިއަހަރުގެ ތެރޭގައި ފްލެޓާއި ގޯއްޗަށް ކުރިމަތިލުމަށް ހުޅުވާލެވޭނޭކަމަށެވެ.

އަޅުގަނޑުމެންގެ އަމާޒަކީ މި ދަންނަވާ އެޕްލިކޭޝަން ޕްރޮސެސްގެ ތެރެއިން ވެއިޓިން ލިސްޓެއް ހަދައި އިމާރާތް ކުރެވެމުންދާ މިންވަރަކުން އެފަރާތްތަކަށް ފްލެޓްތައް އެލޮކޭޓްކޮށް ދީ ނިންމުން

މުއްތަލިބް ވިދާޅުވިއެވެ

މިނިސްޓަރު ވިދާޅުވީ މި ސަރުކާރުގެ ބޯހިޔާވަހިކަމުގެ ސިޔާސަތުތައް ހަމަޖެހިފައިވަނީ، ބޯހިޔާވަހިކަން ބޭނުންވާ ހުރިހާ ފަރާތްތަކަކަށްވެސް ފުރުސަތު ލިބޭގޮތަށް ކަމަށެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ތެރެއިން ބޮޑު އާމްދަނީ ލިބޭ މުއްސަނދި ފަރާތްތަކަށް ލަގްޒަރީ އެޕާޓްމަންޓާއި ގޯތި ގަތުމުގެ ފުރުސަތު ތަނަވަސްކޮށްދޭއިރު، ތަނަވަސްކަން ކުޑަ ފަރާތްތަކަށް އިޖްތިމާޢީ ބޯހިޔާވަހިކަމުގެ ތެރެއިން ފްލެޓް ޢިމާރާތް ކުރުމުގެ މަސައްކަތް ކުރުމަށް ވަނީ ނިންމާފައެވެ. އެގޮތުން އެ މަޝްރޫޢުގެ ދަށުން އިންޑިއަން އެގްޒިމް ބޭންކުގެ ލައިން އޮފް ކްރެޑިޓްގެ ތެރެއިން ގުޅިފަޅުގައި 4000 ހައުސިންގ ޔުނިޓް އިމާރާތް ކުރުމަށް ވަނީ ސަރުކާރުން ނިންމާފައެވެ.

މީގެ އިތުރުން ޗައިނާގެ އިންޓަރެސްޓް ފްރީ ލޯނެއްގެ ދަށުން ފްލެޓް ޢިމާރާތްކުރުމަށް ޕްރޮޕޯޒަލެއް ހުށަހެޅިފައިވާއިރު، ޗައިނާގެ އެގްޒިމް ބޭންކުގެ ތެރެއިން 5000 ޔުނިޓް އެޅުމަށް ބޭނުންވާ ލޯން ހަމަޖެއްސުމަށް މަސައްކަތް ކުރަމުންދާކަން ފާހަގަކޮށްލެވެއެވެ.