ކުލަގަދަ ރަސްމިއްޔާތަކާއެކު އެމްޖޭއެސް ރާބަދި ޗެލެންޖް 2025 ގެ ގުރުލުން ބާއްވައިފި

މީދޫ ޖަމްޢިއްޔަތުއް ޞަލާޙުގެ ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓާ ރިސޯޓް ފުޓްސަލް ޗެލެންޖު "ރާބަދި ޗެލެންޖް 2025" ގެ ގުރުލުން ބާއްވައިފިއެވެ.

ހޮނިހިރު ދުވަހުގެ ރޭ މީދޫ ބަނދަރުމަތީގައި ބޭއްވުނު މުބާރާތުގެ ކުރުލުމުގެ ރަސްމިއްޔާތު ޝަރަފްވެރިކޮށްދެއްވީ ރާއްޖޭގެ ފުޓްބޯޅަ ލެޖެންޑެއް ކަމަށްވާ އަލީ ޝިހާމް (ހުރާ އައްޔަ) ގެ އިތުރުން ރ.އަތޮޅު އަތޮޅު ކައުންސިލްގެ ރައީސް ހުސެއިން ނާސިފް އެވެ.

މީގެ އިތުރުން މިރަސްމިއްޔާތުގައި މުބާރާތުގައި ވާދަކުރާ ޓީމުތަކުގެ ކުޅުންތެރިންނާ އޮފިޝަލުންގެ އިތުރުން ގިނަ އަދަދަކަށް އާންމުން ވަނީ ބައިވެރިވެފައެވެ.

25 އެޕްރީލް 2025 އިން 10 މެއި 2025 ގެ ނިޔަލަށް ކުރިއަށްދާ މިމުބާރާތުގައި މިއަހަރު ޖުމްލަ 15 ރިސޯޓަކުން ބައިވެރިވެފައިވާއިރު، އޭގެ ތެރޭގައި ހިމެނެނީ އާރަށް، ޖޯލި މޯލްޑިވްސް، ކުޑަފުށި، ދިގަލި މޯލްޑިވްސް، އެމެރަލްޑް މޯލްޑިވްސް، ޖޯލި ބީއިންގް، ރީތިފަރު، މީދުއްޕަރު، ކޯރާ ކޯރާ މޯލްޑިވްސް، އަލައިލާ ކޮތައިފަރު މޯލްޑިވްސް، ރާޔާ ބައި އެތްމޯސްފެއާ މޯލްޑިވްސް، އެމަރަލް ފާރުފުށި، މާމުނަގައު، ޔޫ އެންޑް މީ އަދި ފުރަވެރި މޯލްޑިވްސް އެވެ.

މީގެ އިތުރުން މިމުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 15 ޓީމު ހަތަރު ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ކުއާޓާ ފައިނަލަށް ހޮވޭގޮތަށެވެ.

ރާބަދި ޗެލެންޖް އެންމެ ފުރަތަަމަ ބާއްވާފައިވަނީ 2019 ވަނަ އަހަރު އެވެ. އެ އަހަރު މުބާރާތުގެ ފައިނަލުގައި މީދުއްޕަރު 4-3 ގެ ނަތީޖާއަކުން ބަލިކޮށް ޗެމްޕިއަންކަން ހޯދީ ދިގަލި މޯލްޑިވްސްއެވެ. އަދި އެކި ސަބަބުތަކާ ހުރެ 2020 އަދި 2021 ވަނަ އަހަރު މުބާރާތް ނުބޭއްވި ދިއުމަށް ފަހު 2022 ވަނަ އަހަރު ފެށުގެން އަލުން ރާބަދި ޗެލެންޖް ވަނީ ބާއްވަން ފައްޓާފައެވެ.