ފީއަލީ ބޯޓުގައި ރޯވުން: ބޯޓުގައި ހުރި އެކަކު ވަރަށް ބޮޑަށް ފިހުނު، ހާލު ސީރިއަސް

ފ.ފީއަލީ ބަނދަރުގައި އޮތް ތެޔޮ ބޯޓެއްގައި ރޯވެ ހިނގި އަލިފާނުގެ ހާދިސާގައި ބޯޓުގައި ހުރި އެކަކު ވަރަށް ބޮޑަށް ފިހިފައިވާ ކަމަށާ، އޭނާގެ ހާލު ސީރިއަސް ކަމަށް މައުލޫމާތު ލިބިއްޖެއެވެ.

ފުލުހުން ބުނީ، މި ހާދިސާގެ ރިޕޯޓް ލިބުނީ މިއަދު 09:15 އެހައިކަންހާއިރުކަމަށެވެ.

ފީއަލީގައި ހުރި މީހަކު ”ވޮއިސް“ އަށް މައުލޫމާތު ދީފައިވާގޮތުން، މި ހާދިސާ ހިނގި އިރު ބޯޓުގައި ދެމީހުން ތިއްބެވެ. އެތަނުން އެކަކު ފިހިފައިވާއިރު، ބޯޓުގައި އަލިފާން ރޯވުމާއެކު ދެމީހުންވެސް މޫދަށް ފުންމާލީއެވެ. ފިހިފައިވަނީ ބިދޭސީއެކެވެ.

”ފިހުނު މީހާ ފުދޭ ވަރަކަށް ފިހިފައި އޮތީ. އޭނާވެސް މޫދަށް ފުންމާލީ. މިހާރު އޭނާއަށް ދަނީ ހޮސްޕިޓަލުގައި ފަރުވާ ދެމުން. އޭނާގެ ހާލު ސީރިއަސް ކަމަށް މައުލޫމާތު ލިބެނީ. އަދި އިތުރު ފަރުވާއަށް މާލެއަށް ފޮނުވާލުމުގެ މަސައްކަތް ދަނީ ކުރަމުން“ ފީއަލިން ވޮއިސް އަށް މައުލޫމާތު ދިން މީހާ ބުންޏެވެ.

އެމީހާ އިތުރަށް ބުނި ގޮތުގައި ތެޔޮ ބޯޓުގައި އަލިފާނުގެ ހާދިސާ ހިނގުމުގެ ކުރީން ބާރުގަދަ އަޑެއް އިވުނެވެ. އެއާއެކު ބޯޓުގައި އަލިފާންރޯވެފައިވާއިރު، ބޯޓާއި ޖެހިގެންހުރި ދެ ދޯންޏެއްގެ އިތުރުން ދެ ޑިންގީއެއްގައިވެސް ވަނީ ރޯވެފައެވެ.

އަދި އެތަނުގެ ކައިރީގައި ހުރި އައިސްޕްލާންޓްގައިވެސް ވަރަށްބޮޑަށް ރޯވެފައިވާއިރު، އެތަނާ ޖެހިގެންހުރި ޕެޓްރޯލް ޝެޑާ ހަމައަށްވެސް އަލިފާންގަނޑު ވަނީ ފެތުރިފައި ކަމަށް ބުނެފައިވެއެވެ.

”އަލިފާންގަނޑު އަދިވެސް ކޮންޓްރޯލް ނުވޭ. ތެޔޮ ބޯޓުގައި ހުރި އެއްޗެހި ގޮވަމުންދާތީ އެތަނާ ކައިރިވެސް ނުވެވޭ. އެހެންވެ ނިއްވަންވެސް ދަތިތަކާ ކުރިމަތިވަމުންދަނީ. ބަނދަރު ކައިރީ ސަރަހައްދުގައި އުޅޭ މީހުން މިހާރު ދުރު ހިސާބަށް ވަނީ ގެންގޮސްފައި.“ އެމީހާ ބުންޏެވެ.

އަލިފާންގަނޑު ނިއްވާލުމަށް އެސަރަހައްދުގައި ފުލުހުންނާއި ސިފައިން އަދި ކަމާގުޅުން ހުރި އިދާރާތަކުން މިހާރު ދަނީ ހަރަކާތްތެރިވަމުންނެވެ.