ލަނޑު ޖެހުމުގެ ރެކޯޑް ދަމެހެއްޓަން ރޮނާލްޑޯ އަމާޒު ހިފާފަ

2011 ވަނަ އަހަރުން ފެށިގެން ގައުމީޓިމު އަދި ކްލަބަށް ކްރިސްޓިއާނޯ ރޮނާލްޑޯ އަންނަނީ މަދުވެގެން 50 ލަނޑު ޖަހައިދެމުންނެވެ.

ރެއާލް މެޑްރިޑް، ޔުވެންޓަސް އަދި ޕޯޗުގަލްއަށް ކުޅެގެން މިއަހަރު ރޮނާލްޑޯއަށް މިހާތަނަށް ޖެހިފައިވަނީ ޖުމްލަ 46 ލަނޑެވެ. އެހެންކަމުން، 50 ލަނޑު ހަމަކުރުމަށް ޔުވެންޓަސްއާއެކު ކުރިއަށް އޮތް ރޯމާ، އެޓްލާންޓާ، އަދި ސަމްޕްޑޯރިއާއި ބައްދަލުކުރާ މެޗު ތަކުގައި ރޮނާލްޑޯ ހަތަރު ލަނޑު ޖަހަންޖެހެއެވެ.

ރޮނާލްޑޯގެ އިތުރުން އެއް ސީޒަނަށްވުރެ ގިނަ ސީޒަނުގައި 50 ލަނޑު ހަމަކޮށްފައިވާ އަނެއް ދެ ކުޅުންތެރިންނަކީ ލިއޮނަލް މެސީ އަދި ކުރީގެ ޖަރުމަން ތަރި ޖާޑް މުލާއެވެ.

ރޮނާލްޑޯގެ އިތުރުން ފަސް ފަހަރު ބެލޮންޑިއޯ ކާމިޔާބު ކޮށްފައިވާ މެސީވަނީ މިއަހަރު 50 ލަނޑު ހަމަކޮށްފައެވެ. މީގެ ތެރޭގައި ހަތަރު ހެޓްރިކްވެސް ހިމެނެއެވެ.

ބޮޑު ޓްރާންސްފާ ފީއަކަށް ރެއާލްއުން ޔުވެންޓަސްއަށް ބަދަލުވި ރޮނާލްޑޯއަށް އިޓަލީ ލީގުގައި ކުޅުނު ފުރުތަމަ ތިން މެޗުގައި ލަނޑެއް ކާމިޔާބު ކުރެވިފައެއް ނުވެއެވެ. ނަމަވެސް އޭގެ ފަހުން އޭނާވަނީ ހުރިހާ މުބާރާތެއްގައި ޔުވެންޓަސްއަށް 12 ލަނޑު ޖަހައިދީފައެވެ.

މިހާރު އުމުރުން 33 އަހަރުގެ ރޮނާލްޑޯ މިހާތަނަށް އެންމެ ގިނައިން ލަނޑު ޖަހާފައިވަނީ 2013 ވަނަ އަހަރުއެވެ. އޭރު ރެއާލްއަށް ކުޅުނު ރޮނާލްޑޯ އެ އަހަރު ޖުމްލަ 69 ލަނޑު ޖަހާފައިވެއެވެ.