މިނިވަން ފަސްދޮޅަހުގެ ޖަލްސާއަށް ކުރީގެ ރައީސުންނާއި ނައިބުންނަށް ދައުވަތު
ލިޔުންތެރިޔާ
އަހުމަދު ހަމީދު އާދަމް
މިނިވަން ފަސްދޮޅަހުގެ ރަސްމީ ޖަލްސާއަށް، ކުރީގެ ރައީސުންނާއި ނައިބު ރައީސަށް ދައުވަތު އަރުވަން ނިންމައިފި އެވެ.
ވޮއިސްއާ ވާހަކަ ދައްކަވަމުން މިނިސްޓަރު އާދަމް ނަސީރު އިބްރާހިމް ވިދާޅުވީ މިނިވަން ފަސްދޮޅަހުގެ ރަސްމީ ޖަލްސާ ތައްޔާރު ވުމުގެ މަސައްކަތް އެ މިނިސްޓްރީން ކުރަމުން ގެންދާ ކަމަށެވެ. މި ޖަލްސާއަށް ކުރީގެ ރައީސުންނާއި ނައިބު ރައީސަށް ދައުވަތު އަރުވަން ނިންމާފައިވާ ކަމަށް ވިދާޅުވި އެވެ.
"މިނިވަން ދުވަހަކީ މުޅި ދިވެހި ޤައުމުގެ ދުވަހެއް. މި ސަރުކާރުގެ ސިޔާސަތަކީ ގައުމީ ޚިދުމަތުގެ އަގުވަޒަން ކުރުން. ގައުމުގެ ހިދުމަތްތެރީންގެ އަގުވަޒަން ކުރުން," މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ މި ގައުމަށް ހިދުމަތް ކުރައްވާފައިވާ ކުރީގެ ރައީސުންނާއި، ކުރީގެ ނައިބު ރައީސުންނަށް ހައްގު އިހްތިރާމާއި ގަދަރުކުރުމަކީ ރައީސް ޑރ. މުޙައްމަދު މުޢިއްޒު މި ގައުމަށް ގެންނަވަން ބޭނުންފުޅުވާ އަހްލާގީ ބަދަލުގެ އެއް ނަމޫނާ ކަމަށެވެ.
މިނިވަން ދުވަހަކީ ޖުލައި މަހުގެ 26 ވަނަ ދުވަަހު އެވެ. މި އަހަރަކީ ރާއްޖޭގެ މިނިވަން ކަމަށް 60 އަހަރު ފުރޭ އަހަރެވެ. އެ މުނާސަބާ ކުލަގަދަ ކޮށް ފާހަގަ ކުރަން ނިންމާފައިވާއިރު މިނިވަން ފަސްދޮޅަހުގެ ރަސްމީ ޖަލްސާ އޮންނާނީ 26 ވަނަ ދުވަހުގެ ރެ އެވެ.
މިނިވަން ކަމަށް 60 އަހަރު ފުރޭ ތާރީހީ މުނާސަބަތާއި ގުޅުވާ ވީއައިއޭގެ އާ ޓާމިނަލް ހުޅުވަން ވެސް ދަނީ ތައްޔާރު ވަމުންނެވެ. އެ ރަސްމިއްޔާތަށް ވެސް ހުރިހާ ރައީސުންނަށް ދައުވަތު ދިނުމަށް ވަނީ ނިންމާފަ އެެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
