އެމްޑީޕީ ޗެއާޕާސަން އިންތިޚާބު: ޝާހިދު ވިދާޅުވީ ވަކިކޮޅެއް ނެގުމަކީ ޤަބޫލުކުރައްވާ އުޞޫލެއް ނޫންކަމަށް

އެމްޑީޕީގެ އެތެރޭގެ އިންތިޚާބުތަކުގައި ޕާޓީގެ ރައީސްގެ ޙައިސިއްޔަތުން ވަކި ކެންޑިޑޭޓަކަށް ތާއީދުކުރައްވައި ވަކިކޮޅެއް ނެގުމަކީ ޤަބޫލުކުރައްވާ އުޞޫލެއް ނޫންކަމަށް އެމްޑީޕީގެ ރައީސް ޢަބްދުالله ޝާހިދު ވިދާޅުވެއްޖެއެވެ.

ޝާހިދު މިހެން ވިދާޅުވީ އެމްޑީޕީގެ ޗެއާޕާސަން ހޮވުމަށް ބާއްވާ އިންތިޚާބާ ގުޅޭގޮތުން އެކްސްގައި ކުރެއްވި ޕޯސްޓެއްގައެވެ.

ޝާހިދު ވިދާޅުވީ އެމްޑީޕީއަކީ ސިޔާސީ ޕާޓީތަކުގެ ފަލްސަފާ ރާއްޖެއަށް ގެނެސްދީ، ޕާޓީތައް ހިންގާނެ ގޮތް އުނގަންނައިދިން ޕާޓީ ކަމަށެވެ. އަދި ކުރިއަށް އޮތް ދާއިރާތަކުގެ އިންތިޚާބާއި އެކި މަޤާމުތަކަށް ވާދަކުރައްވާ ހުރިހާ ބޭފުޅުންނަށް ކާމިޔާބީއަށް އެދިވަޑައިގަންނަވާ ކަމަށްވެސް އެމަނިކުފާނު ވިދާޅުވިއެވެ.

ޝާހިދު އިތުރަށް ފާހަގަކުރެއްވި ގޮތުގައި މި އިންތިޚާބަކީ ޕާޓީގެ މެންބަރުން އެކަތިގަނޑަކަށްވެ، 2028 ވަނަ އަހަރުގެ ރިޔާސީ އިންތިޚާބު ކާމިޔާބުކުރުމަށް ޕާޓީން ކުރާ މަސައްކަތުގެ މުހިންމު ފެށުމަކަށް ވާނެއެވެ.

"ޕާޓީގެ ރައީސްގެ ޙައިސިއްޔަތުން ޕާޓީގެ އެތެރޭގެ އިންތިޚާބުތަކުގައި ވަކިކޮޅެއް ނެގުމަކީ އަޅުގަނޑު ޤަބޫލުކުރާ އުޞޫލެއް ނޫން. އަޅުގަނޑުގެ އެދުމަކީ ޕާޓީގެ ވީހާވެސް ގިނަ މެމްބަރުން އެތެރޭގެ އިންތިޚާބުގައި ބައިވެރިވެ، ކެންޑިޑޭޓުންނަށް ވޯޓު ދެއްވުން. އެމްޑީޕީއަކީ ވޯޓުން އުފާވެރިކަން ހޯދާ ޕާޓީ.،" ޝާހިދު ވިދާޅުވިއެވެ.

އެމްޑީޕީގެ ޗެއާޕާސަންގެ މަޤާމަށް މިހާތަނަށް ތިން ބޭފުޅަކު ވަނީ ޝައުޤުވެރިކަން ފާޅުކުރައްވާފައެވެ. އޭގެ ތެރޭގައި ހިމެނެނީ ކުރީގެ ރައީސް މުޙައްމަދު ނަޝީދާއި، ރައްޔިތުންގެ މަޖިލީހުގެ މެންބަރު މީކާއީލް ނަސީމްގެ އިތުރުން ޕާޓީގެ ކުރީގެ ނައިބު ރައީސް އަލްހާން ފަހުމީއެވެ.

ތިން ބޭފުޅުންވެސް މިހާރު ވަނީ ރަސްމީކޮށް އިންތިޚާބުގައި ވާދަކުރައްވާނެކަން އިޢުލާނު ކުރައްވައި، އާންމު މެންބަރުންގެ ތާއީދު ހޯއްދެވުމަށް ކެންޕެއިން ފައްޓަވާފައެވެ.

ނަޝީދަށް ތާއީދު ކުރައްވާ ބޭފުޅުންގެ ތެރޭގައި ޕާޓީގެ ކުރީގެ ދެ ޗެއާޕާސަނުން ކަމަށްވާ ފައްޔާޒް އިސްމާޢީލާއި މާރިޔާ އަޙްމަދު ދީދީ ހިމެނިވަޑައިގަންނަވައެވެ.

އަނެއްކޮޅުން، މެންބަރު މީކާއީލް ނަސީމަށް ކުރީގެ ރައީސް އިބްރާހީމް މުޙައްމަދު ޞާލިޙާއި، ކުރީގެ ނައިބު ރައީސް ފައިޞަލް ނަސީމްގެ އިތުރުން އެމްޑީޕީ ޕީޖީ ގްރޫޕްގެ ގިނަ މެންބަރުންތަކެއް ތާއީދު ކުރައްވާކަން ވަނީ ހާމަވެފައެވެ. މީކާއީލަކީ މީގެ ކުރިން ވަގުތީ ޗެއާޕާސަނަކު ހޮވުމަށް ކުރެވުނު މަސައްކަތުގައިވެސް ވާދަކުރެއްވުމަށް ޝައުޤުވެރިކަން ފާޅުކުރެއްވި ބޭފުޅެކެވެ.