މަތީ ތަޢުލީމު ހާސިލުކުރާ ދަރިވަރުންގެ ކަންބޮޑުވުންތައް ހިއްސާ ކުރުމަށް ޚާއްސަ އެޕެއް ފަރުމާކުރަނީ

މަތީ ތަޢުލީމު ހާސިލުކުރާ ދަރިވަރުންގެ ކަންބޮޑުވުންތައް ހިއްސާ ކުރުމަށާ އެކަންކަމަށް އަވަހަށް ޖަވާބުދާރީވުމަށް ޚާއްސަ އެޕެއް ތައްޔާރުކުރަމުންދާ ކަމަށް މަތީ ތަޢުލީމާބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ވަނީ ލޯނާއި ގުޅިގެންނާއި އެނޫންވެސް ކިޔެވުމާއި ގުޅުން ހުރި ކަންކަމާއި ގުޅިގެން ދަރިވަރުން މިނިސްޓްރީއަށް ގުޅުމުން އަދި މެއިލް ކުރުމުންވެސް ޖަވާބު ނުލިބޭ ކަމުގެ ޝަކުވާ އެ ދަރިވަރުން ކުރާ ކަން ފާހަގަކުރައްވައި އެކަން ހައްލު ކުރުމަށް ކުރައްވާ މަސައްކަތާއި ގުޅޭ ގޮތުން ވަޒީރު ހައިދަރާ ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން ހައިދަރު ވިދާޅުވީ، ގުޅައިގެންނާއި މެއިލް މެދުވެރިކޮށް ނޫން އިތުރު ގޮތް ގޮތުން ދަރިވަރުންނަށް އެ ވުޒާރާއާ މުޢާމަލާތް ކުރެވޭނެ މަގުތައް ފަހި ކުރުމުގެ މަސައްކަތް މިހާރު ކުރިއަށްދާ ކަމަށެވެ.

އެގޮތުން މިހާރު އެ ވުޒާރާގެ ވަޓްސްއަޕް ނަންބަރެއް ތަޢާރަފް ކޮށްފައިވާ ކަމަށާ ، އަދި 50 ދަރިވަރުންނަށް ވުރެ ގިނަ ދަރިވަރުން ކިޔަވަމުންދާ ޤައުމުތަކަށްވެސް ވަކިން ޚާއްސަ ވަޓްސްއަޕް ނަންބަރެއް ކަނޑައަޅުއްވާނެ ކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ، މިހާރު ތަޢާރަފް ކުރެވިފައިވާ ވަޓްސްއަޕް ނަންބަރަށް ގުޅުމުން އަދި މެސެޖު ކުރުމުން ވަގުތުން ޖަވާބު ދެމުންދާކަން ދަރިވަރުންގެ ފަރާތުން މިހާތަނަށް މައުލޫމާތު ލިބިފައިވާ ކަމަށެވެ.

ދެން ހަމަ އެއާއެކުގައި އަޅުގަނޑުމެން އެބަ ތަޢާރަފްކުރަން ހަޔަރ އެޑިޔުކޭޝަން މެނޭޖްމަންޓް ސިސްޓަމްކިޔާ އެޕެއް. އެ އެޕާއެކު އަޅުގަނޑުމެންނަށް ވަރަށް އަވަހަށް ދަރުވަރުންގެ ރިކުއެސްޓް ތަކަށް ނޫނިއްޔާ ކޮމްޕްލެއިންސް ތަކަށް އެޑްރެސް ކުރެވޭނެ.

ވަޒީރު ޑރ ޢަލީ ހައިދަރު އަޙްމަދު

ވަޒީރު ވިދާޅުވީ އެ އެޕްލިކޭޝަންގެ މަސައްކަތް މި އަހަރުގެ އޮކްޓޯބަރު މަހުގެ ނިޔަލަށް ނިމޭނެ ކަމަށެވެ.