ރާއްޖެއިން އަނބުރާ ކޮމަންވެލްތާއި ގުޅެން ނިންމައިފި

ދިވެހިރާާއްޖޭގެ ސަރުކާރުގެ ފަރާތުން އަނެއްކާވެސް ކޮމަންވެލްތާއި ގުޅުމަށް ނިންމައިފިއެވެ.

ސަރުކާރުން މި ނިންމުން ނިންމާފައިވަނީ މިއަދުގެ ވަގުތެއްގައި ބޭއްވި ކެބިނެޓް ބައްދަލުވުމުގެ ތެރޭގައެވެ. ކޮމަންވެލްތާއި ރާއްޖެ އަލުން ގުޅުމަކީ އާ ރައީސްގެ ސަރުކާރުގެ ފުރަތަމަ ސަތޭކަ ދުވަހުގެ މުހިންމު ވައުދުތަކުގެ ތެރޭގައި ހިމެނޭ ކަމެކެވެ.

ކެބިނެޓްގެ ފަރާތުން ކޮމަންވެލްތްގައި ބައިވެރިވާން ނިންމިކަމުގައިވިޔަސް، ރައްޔިތުންގެ މަޖިލީހުން އެކަން ފާސްކޮށްގެން މެނުވީ، ކޮމަންވެލްތްއަށް އަލުން ނުވަދެވޭނެއެވެ.  ބެލެވޭ ގޮތުގައި ކޮމަންވެލްތްއަށް އަލުން ވަނުމުގެ ގަރާރެއް ވަރަށް އަވަހަށް މަޖިލީހަށް ހުށައެޅިގެންދާނެއެވެ.

ދެވަނަ ބޮޑު ހަނގުރާމައިގެ ދުވަސްވަރު، އިނގިރޭސި ސަރުކާރުގެ ކޮލޮނީ އަދި ޕްރޮޓެކްރޭޓްގެ ގޮތުގައި ތިބި ގައުމުތައް ހިމަނައިގެން އުފައްދާފައިވާ ޖަމާއަތެކެވެ.

ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ދައުރުގައި ރާއްޖެއިން ކޮމަންވެލްތުން ވަކިވީ، ރާއްޖޭގެ ދާޚިލީ ކަންކަމުގެ ތެރެއަށް ނުފޫޒު ފޯރުވާކަމަށް ބުނެއެވެ. 2012 ވަނަ އަހަރު ކުރީގެ ރައީސް މުހައްމަދު ނަޝީދުގެ ވެރިކަން ބަދަލުވުމަށްފަހު، ކޮމަންވެލްތްގެ މިނިސްޓީރިއަލް އެކްޝަން ގްރޫޕް، ސީމެގްގެ އެޖެންޑާގައި ރާާއްޖެ ހިމެނުމަށް އެތައް ފަހަރަކު ވަނީ މަސައްކަތް ކޮށްފައެވެ.