މަޤާމުން ވަކިކުރަން އުޅެނީ ނުފޫޒު ނުފޯރުވޭތީ: ޝަމީމް

މަޤާމުން ވަކިކުރުމުގެ މަސައްކަތް ކުރައްވަން އުޅުއްވަނީ މަޤާމަށް ނުފޫޒު ނުފޯރުވޭތީކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.

ޕްރޮސެކިއުޓާ ޖެނެރަލް (ޕީޖީ)ކަމުން ހުސައިން ޝަމީމް ވަކިކުރަން ރައްޔިތުންގެ މަޖިލީހުގެ ޖުޑިޝަރީ ކޮމިޓީން މިއަދު ވަނީ ފާސްކޮށްފައެވެ. މިކަމާ ގުޅޭގޮތުން ޕީޖީ އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ޝަމީމް ވިދާޅުވީ އޭނާގެ މައްޗަށް ތުހުމަތުތަކެއްކޮށް މަޤާމުން ވަކިކުރުމުގެ މަސައްކަތް ކުރަމުން އެދަނީ އެއްވެސް ކަހަލަ އަސާސެއްގެ މައްޗަށް ބިނާކޮށް ނޫންކަމަށެވެ.

ޝަމީމް ވިދާޅުވީ އޭނާ ޕީޖީގެ މަގާމުން ވަކިކުރުމުގެ މަސައްކަތް ކުރައްވަން އުޅުއްވަނީ ނުފޫޒު ނުފޯރުވޭތީ ކަމަށާއި، އެއީ ނުވާނޭ ކަމެއް ކަމަށެވެ. ޝަމީމް ވިދާޅުވީ މަޖިލީހުގެ ޖުޑިޝަރީ ކޮމިޓީއަށް ޖަވާބުދޭން ޖެހިފައިވާ ތުހުމަތުތައް ސާފުނުވާކަމަށާއި، ކޮމިޓީން މިކަމުގއި އަމަލުކޮށްފައިވަނީ އުސޫލްތަކާ ހިލާފަށްކަމަށެވެ.

މަޖިލީހުން އަޅުގަނޑަށް ފޮނުވާފައިވަނީ ހުލާސާ ސިޓީއެއް.އޭގައި ތުހުމަތުކުރެވޭ ކަމެއްގެ ތަފްސީލެއްނެތް.

ޕީޖީ ޝަމީމް ވިދާޅުވިއެވެ.

ޕީޖީ އާ ގުޅޭގޮތުން ސަރުކާރު ހިންގާ ޕީއެންސީއަށް ނިސްބަތްވާ މަޖިލީހުގެ ހުޅުދޫ ދާއިރާގެ މެންބަރު މުޙައްމަދު ޝާހިދު ވަނީ ބޮޑެތި ތުހުމަތު ތަކެއް ކުރައްވާފައެވެ. އެކަމާ ގުޅޭގޮތުން ޝަމީމް ވިދާޅުވީ ތުހުމަތުތައް އެކުރަނީ ސިޔާސީގޮތުން ކަމަށާއި، ރީތިކޮށް ބުނިނަމަ މަގާމުން އިސްތިއުފާ ދެއްވީސްކަމަށެވެ.

ނުފޫޒު ފޯރުވަން މަސައްކަތް ކުރި ނަމަވެސް އެކަން ކާމިޔާބު ނުވާނެ ކަމަށާއި، އެއްވެސް މީހެއްގެ ނުފޫޒަށް ލެބެންޖެހޭ ސަބަބެއް ނެތް ކަމަށް ޝަމީމް ވިދާޅުވިއެވެ. ޝަމީމް ވިދާޅުވީ 2008 ވަނަ އަހަރުން ފެށިގެން ޕީޖީ އޮފީހުގައި މަސައްކަތްކުރަމުންދާއިރު، ސަރުކާރުތަކާއި އެކު މަސައްކަތްކުރަން ޖެހޭ ގޮތް އޭނާއަށް ވަރަށް ރަނގަޅަށް އެނގިވަޑައިގަންނަވާ ކަމަށެވެ.

ޝަމީމް ވިދާޅުވީ އޭނާ އަކީ އެއްވެސް އިރެއްގައި ޕީޖީގެ މަގާމަށް ދަހިވެތިވެގެން އެމަޤާމުގައި ދެމިހުންނަން ބޭނުންވެގެން އުޅޭ މީހެއް ނޫންކަމަށާއި، މިމަގާމުގައި ނެތް ނަމަވެސް މާތަނަވަސް ކޮށް މާ އަރާމުގައި އުޅެވެން ވެސް އެބައޮތްކަމަށެވެ.

ޝަމީމް އިތުރަށް ވިދާޅުވީ، ނުފޫޒަށް ލެބެން ޖެހޭ ސަބަބެއް ނެތް ކަމަށާއި، މިދާއިރާގައި 20 އަހަރު އުޅޭއިރު، ކުޑަ ކުޑަކަމެއްގައި މީހަކަށް ނުފޫޒުފޯރުވައިގެން ނަން ހަޑިވާން ބޭނުންފުޅު ނުވާކަމަށެވެ.