ކަޅު ބާޒާރުގައި ޑޮލަރު ވިއްކާ 12 ބިދޭސީއެއް، ނުވަ މީހަކު އަތުލައިގެންފި

ގަވާއިދާ ހިލާފަށް ބޭރު ފައިސާ ގަނެ ވިއްކާ ނެޓްވޯކްތަކާއި ގުޅޭގޮތުން މިހާތަނަށް ލިބިފައިވާ މައުލޫމާތުގެ އަލީގައި ނުވަ މީހަކު ހައްޔަރުކޮށްފައިވާ ކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެ އެވެ.

ރައީސުލްޖުމްހޫރިއްޔާގެ އޮފީހުގައި މިއަދު އޮތް ނޫސްވެރީންގެ ބައްދަލްވުމުގައި މިނިސްޓަރު އިހްސާން ވިދާޅުވީ ރާއްޖޭގައި ގަވާއިދާ ހިލާފަށް ބޭރު ފައިސާގެ މުއާމަލާތްކުރާ ފަރާތްތަކުގެ މައުލޫމާތު ހިއްސާކުރުމަށް ހާއްސަކުރި ހޮޓްލައިނަށް އެކި ފަރާތްތަކުން ގުޅާ މައުލޫމާތު ހިއްސާކުރަމުންދާ ކަމަށެވެ.

އެގޮތުން 12 ބިދޭސީއެއްގެ މައްސަލަ ސަމާލު ކަމަށް އައިސް އެ މީހުންގެ މައްސަލަތައް ތަހުގީގު ކުރަމުންދާ ކަމަށް ވިދާޅުވި އެވެ. މިހާތަނަށް ނުވަ މީހަކު ވަނީ އަތުލައިގެންފަ އެވެ.

މިނިސްޓަރު ވިދާޅުވި ގޮތުގައި މި މީހުންގެ މައްސަލަތައް ބެލުމަށް ފަހު އެކަން ސާބިތުވާނަމަ ހަރުކަށި ފިޔަވަޅު އަޅާނެ އެވެ. އަދި ބިދޭސީ މީހާ ގެނައި ދިވެހި މީހާ 50،000 ރުފިޔާއިން ޖޫރިމަނާ ކުރެވޭނެ ކަމަށް ވިދާޅުވި އެވެ.

ފުލުހުން މީގެ ކުރީން ވަނީ އަތުލައިގަތް ގަވާއިދާ ހިލާފަށް ބޭރު ފައިސާ ގަނެ ވިއްކާ ނެޓްވޯކެއްގައި ހިމެނެނީ ބަންގްލަދޭޝްގެ 6 ފިރިހެނުން ހައްޔަރުކޮށްފަ އެވެ. އެ މީހުންގެ ފޮޓޯއާ ވަނަވަރު ވަނީ އާންމުކޮށްފަ އެވެ.

ފުލުހުން ބުނީ މިހާތަނަށް ތަހުގީގަށް އެއްކުރެވިފައިވާ މައުލޫމާތުން މި ތިން މީހުންގެ އެކައުންޓަށް މިދިޔަ ތިން އަހަރުތެރޭ މިލިއަން ޑޮލަރާއި އެތައް މިލިއަން ރުފިޔާއެއް ޖަމާކޮށް ދައުރުކޮށްފައިވާ ކަމަށެވެ.

* 54،429،550 މިލިއަން ރުފިޔާ

* 1،627،810 މިލިއަން ޑޮލަރު

ފުލުހުން ބުނީ މި މީހުންނަކީ ހުއްދަ ދީފައިވާ ދާއިރާއިން ބޭރުން، ބޭރު ފައިސާ ގަނެވިއްކުމުގެ ދާއިރާގައި ހަރަކާތްތެރިވާ ބައެއް ކަމަަށެވެ.

ރާއްޖޭގައި އަބަދުވެސް ޑޮލަރުގެ ކަޅު ބާޒާރެއް އޮވެ އެވެ. ނަމަވެސް މަދު ބަޔަކު ރާވައިގެން ކަޅު ބާޒާރު ފުޅާކޮށް ބޮޑު އަގުގައި ދަނީ ފައިސާ ވިއްކަމުންނެވެ. އެކަމުން އެ ބަޔަކު ދަނީ ބޮޑު މަންފާއެއް ހޯދަމުންނެވެ.