ގެދޮރުވެރިޔާގެ ލިސްޓަށް އެއްވެސް ފަރާތެއް އިތުރުނުކުރަން: ވަޒީރު މުއްތަލިބު

މިދިޔަ ސަރުކާރު ނިމެންދަނިކޮށް 15 ނޮވެމްބަރު 2023 ގައި އިއުލާންކުރި ގެދޮރުވެރިޔާގެ ލިސްޓަކީ ފައިނަލް ލިސްޓުކަމަށާއި، އެ ލިސްޓަށް އިތުރު އެއްވެސް ފަރާތެއް އިތުރުކޮށްފައިނުވާނެ ކަމަށް ގެދޮރުވެރިކަމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބު ވިދާޅުވެއްޖެއެވެ.

ގެދޮރުވެރިޔާ ސްކީމުގެ ދަށުން ދީފައިވާ ފްލެޓްތަކުގެ ބައެއް ވަގަށް ވިއްކަންއުޅޭ ކަމަށް ބުނެ ރާއްޖޭގެ ބައެއް ނޫސްތަކުންނާއި ސޯޝަލް މީޑިޔާގައި ދަނީ ދައުރުވަމުންނެވެ.

އެކަމާ ގުޅިގެން އެކްސްގައި ކުރެއްވި ޕޯސްޓެއްގައި ވަޒީރު ވިދާޅުވީ، 15 ނޮވެމްބަރުގައި އިއުލާނުކުރި ލިސްޓަކީ އެންމެ ފައިނަލް ލިސްޓު ކަމަށާއި، ފްލެޓް ދިނުމުގައި ވެސް އަމަލުކުރާނީ އެ ލިސްޓާއެކު ކުރެވުނު އިއުލާނުގައިވާ ގޮތަށް ކަމަށެވެ. އެގޮތުން ޝަރުތު ހަމަނުވާ ފަރާތްތައް ލިސްޓުން އުނިވި ނަމަވެސް، ގެޒެޓުގައިވާ ލިސްޓާއި އިޢުލާނާ ޚިލާފަށް ފަހުން ލިސްޓަށް އެއްވެސް ފަރާތެއް އިތުރުކުރެވިފައި ނުވާނެ ކަމަށް ވަޒީރު ވިދާޅުވިއެވެ.

އަދި އެފަދައިން ލިސްޓަށް އައު ބަޔަކު އިތުރުކުރުމުގެ ފުރުސަތު ވެސް އެއްވެސް ފަރާތަކަށް ނޯންނާނެ ކަމަށް ވެސް ވަޒީރު ވިދާޅުވިއެވެ.

ވަޒީރު އެފަދައިން ވިދާޅުވިއިރު، މިދިޔަ ސަރުކާރުން ހިންގި ގެދޮރުވެރިޔާ އަދި ބިންވެރިޔާ ސްކީމާ ގުޅޭ މައްސަލަތަކުގައި ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކުރަމް ކަމާލުއްދީނާއި، އުސިން މިނިސްޓްރީގެ ކުރީގެ ސީނިއަރ އެގްޒެކެޓިވް ޑިރެކްޓަރ އަދި ގެދޮރުވެރިން ކޮމިޓީގެ މެންބަރު މުޙައްމަދު ޢާރިފް، ޑިރެކްޓަރ ޖެނެރަލް އަޙްމަދު ވިޝާން ނަސީމް، އަދި ސީނިއަރ އެގްޒެކެޓިވް ޑިރެކްޓަރު ޟިރުޣާމް ވަޙީދުގެ މައްޗަށް ދައުވާކުރަން ޕީޖީއަށް ވެސް ވަނީ ފޮނުވާފައެވެ.

އެގޮތުން އެމީހުންގެ މައްޗަށް ކުރަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދަޢުވާއެވެ. މިއީ ޤާނޫނުލްޢުޤޫބާތުގެ 513 ވަނަ މާއްދާގެ ދަށުން ކުރެވޭ ދަޢުވާއެކެވެ.

އެގޮތިން އެ މައްސަލައިގައި އެމީހުންގެ މައްޗަށް ތުހުތަމުކުރެވެނީ 2022ވަނަ އަހަރުގެ ޖޫން މަހު އިޢުލާނުކުރި ބިންވެރިޔާ އަދި ގެދޮރުވެރިޔާ ސްކީމްގެ ދަށުން، ގޯއްޗާއި ފްލެޓަށް އެދި ހުށަހެޅި ބައެއް ފަރާތްތަކަށް އުސޫލާ ޚިލާފަށް ޕޮއިންޓް ދީ، ޝަރުތު ފުރިހަމަނުވާ ފަރާތްތަކެއް ލިސްޓުގައި ހިމަނާފައިވާ މައްސަލައެވެ.

ގެދޮރުވެރިޔާގެ ދަށުން ޢިމާރަތްކުރަމުން އަންނަ ފްލެޓްތައް ޢިމާރަތްކުރަނީ އިންޑިޔާގެ ދެ ކުންފުންޏަކުންނެވެ. އެ ފްލެޓްތަކުގައި ދެ ކޮޓަރީގެ އެޕާޓްމެންޓްތަކާއި ތިން ކޮޓަރީގެ އެޕާޓްމެންޓުތައް ހުންނައިރު، ދެ ކޮޓަރީގެ އެޕާޓްމަންޓުތައް ދޫކުރަނީ 7،000 ރުފިޔާއަށެވެ. އެ ތަންތަނުގެ މެއިންޓެނަންސް ފީގެ ގޮތުގައި 1،000 ރުފިޔާ ނަގާއިރު، ސެކިއުރިޓީ ޑިޕޮސިޓުގެ ގޮތުގައި ދައްކަން 15،000ރ. ދައްކަން ޖެހެއެވެ.

އަދި ތިން ކޮޓަރީގެ އެޕާޓްމެންޓުތައް 9،500 ރުފިޔާއަށް ދޫކުރާއިރު، މެއިންޓެނެންސް ފީގެ ގޮތުގައި 1،5000 ރުފިޔާ އަދި ސެކިއުރޓީ ޑެޕޮސިޓްގެ ގޮތުގައި 25،000 ރުފިޔާ ދައްކަން ޖެހެއެވެ.

އެ ފަރާތްތަކަށް ތަޅުދަނޑި ހަވާލުކުރާނީ ޓަވަރުތަކުގެ އެއްބަސްވުމުގައި ސޮއިކުރުމަށްފަހު ސެކިއުރިޓީ ޑިޕޮސިޓް ދެއްކާ ފަރާތްތަކަށެވެ.