މިއަހަރު ތެރޭ އިތުރު 6 ރިސޯޓް ހުޅުވިގެންދާނެ: ޓޫރިޒަމް މިނިސްޓަރ
މިއަހަރު ތެރޭ 6 ރިސޯޓް ހުޅުވިގެންދާނެ ކަމަށް ލަފާކުރެވޭ ކަމުގައި ޓޫރިޒަމް މިނިސްޓަރ ޠާރިޤު އިބްރާހީމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ރޭ ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުންނެވެ.
ދާދި ފަހުން ފަތުރުވެރިކަމުގެ ދާއިރާއާއި ހަވާލުވެވަޑައިގަތް މިނިސްޓަރ ޠާރިޤު ވިދާޅުވީ މިހާރުވެސް ރާއްޖޭގައިި 176 ރިސޯޓްގެ އޮޕަރޭޝަންތައް ހިންގަމުންދާ ކަމަށެވެ. އޭގެ އިތުރުން 165 ރިސޯޓް ހެދުމުގެ މަސައްކަތް އެބަކުރިއަށްދާ ކަމަށް މިނިސްޓަރ މައުލޫމާތު ދެއްވިއެވެ. ނަމަވެސް ބައެއް ރިޒޯޓްތަކުގެ މަސައްކަތް ހުއްޓިފައިވާކަން މިނިސްޓަރ ހާމަކުރެއްވިއެވެ.
އޭގެ ތެރެއިން ގާތްގަނޑަކަށް 6 ރިސޯޓް މިއަހަރު ހުޅުވިގެންދާނެ ކަމަށް މިނިސްޓަރ ލަފާކުރެއްވިއެވެ.
"އަޅުގަނޑުމެން ވަރަށް ގާތުން މި ބަލަނީ ޝެޑިއުލްތަކުންނާއި އެބޭފުޅުން ކުރައްވާ މަސައްކަތްތަކަށް. މިދެންނެވި އަހަރަށް ހުޅުވޭއިރު އިތުރު 1290 އެނދު އިތުރުވެގެންދާނެ"
މިނިސްޓަރ ޠާރިޤު އިބްރާހީމް
މިނިސްޓަރ ވިދާޅުވީ މި ކުރިއެރުމާއެކު ވަޒީފާގެ ފުރުސަތުތައްވެސް އިތުރުވެގެންދާނެ ކަމަށެވެ. މިހާތަނަށް ތިމާވެށީގެ ވުޒާރާ ހިންގަވަމުން ގެންދެވި ޠާރިޤު ވަނީ ތިމާވެއްޓާ ރައްޓެހި އަދި ދެމެހެއްޓެނިވި ގޮތަކަށް ފަތުރުވެރިކަން ކުރުމަށް އިސްކަން ދެއްވުން މުހިންމުކަމަށް ވިދާޅުވެފައެވެ. އަދި އެފަދަ ރިޒޯޓްތަކަށް ޒިޔާރަތްކުރުމަކީ ފަތުރުވެރިންގެ މެދުގައި މަގްބޫލު ޓްރެންޑެއްގެ ގޮތުގައި މިނިސްޓަރ ސިފަކުރެއްވިއެވެ.
ދާދި ފަހުން ޓޫރިޒަމް މިިނިސްޓްރީއާއި އެންވާރަމެންޓް މިިނިސްޓްރީ އެއްކުރި ވާހަކައަށްވެސް މިނިސްޓަރ ވަނީ މި ޕްރޮގްރާމް ތެރެއިން އިޝާރާތްކުރައްވާފައެވެ. އެގޮތުން، ދެ މިނިސްޓްރީ އެއްކޮށްލި ނަމަވެސް ފަތުރުވެރިކަމަށް ސަރުކާރުން ދޭ އަހައްމިއްޔަތުކަން ކުޑަނުވާނެ ކަމުގެ ޔަގީންކަން މިނިސްޓަރ ދެއްވާފައި ވެއެވެ. ދެ ވުޒާރާ އެއްކޮށްލީމަ، މަސައްކަތުގެ ދާއިރާގައި އަދި ރާއްޖޭގެ ތިމާވެށީގެ ދާއިރާއަށް ލިބޭ ފައިދާ މާ ބޮޑުކަމަަށް ގަބޫލުކުރައްވާ ކަމަށް މިނިސްޓަރ ވިދާޅުވެފައި ވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
