އެރަށެއްގެ ޓެކްސް ފައިސާއިން ވަކި އިންސައްތައެއް، އެ ރަށަކަށް ލިބޭގޮތް ހަދަން ގާނޫނު އިސްލާހުކުރާނަން: ރައީސް މުޢިއްޒު

ރަށްރަށުގައި ހިންގާ ގެސްޓްހައުސް ތަކާއި، އެނޫންވެސް އެކިއެކި ދާއިރާތަކުން، ދައުލަތަށް ނެގޭ ޓެކްސް ފައިސާގެ ވަކި އިންސައްތައެއް އެ ރަށެއްގެ ކައުންސިލަށް ދިނުމަށް ގާނޫނަށް އިސްލާހު ގެންނަވާނެ ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.

މިއަދު ވ. ކެޔޮދޫ ރައްޔިތުންނާއި ބައްދަލު ކުރެއްވުމަށް ބޭއްވި ޖަލްސާގައި ވާހަކަ ދައްކަވަމުން ރައީސުލްޖުމްހޫރިއްޔާ ވިދާޅުވީ، ތަރައްގީގެ މަޝްރޫއުތައް ކުރިއަށް ގެންދެވޭނީ އާމްދަނީ އިތުރުކޮށްގެން ކަމަށެވެ. އަދި އާމްދަނީ އިތުރު ކުރެވޭނީ ދާއިރާތައް ފުޅާކޮށްގެން ކަމަށާ، ސަރުކާރުން މިހާރު އަންނަނީ ރާއްޖެއަށް އެންމެ ފައިދާވާ، ފަތުރުވެރިކަމާއި، މަސްވެރިކަމާއި، ދަނޑުވެރިކަމުގެ އިތުރުން އެނޫންވެސް ދާއިރާތައް ފުޅާކުރުމުގެ މަސައްކަތް ކުރަމުން ކަމަށް ރައީސް މުޢިއްޒު ވިދާޅުވި އެވެ.

މިކަންކަން ކުރެވޭ އިރުގައި، އަޅުގަނޑު ބޭނުންވަނީ ލާމަރުކަޒީ ނިޒާމްގެ ތެރެއިން އޭގެ ފުރިހަމަ ނަފާ ރައްޔިތުންނަށް ލިބޭ ގޮތަށް ކަންކަން ބައްޓަން ކުރަން.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މިއާއެކު ރައީސް މުޢިއްޒު ވަނީ ކައުންސިލް ތަކަށް އިތުރު ޢާމްދަނީ ހޯދޭނެ މަގުފަހި ކުރުމަށް ކޮންމެ ރަށަކަށްވެސް ފަޅު ރަށްތައް ހޯދުމަށް އެދުމުގެ ފުުރުސަތު ހުޅުވާލާފައިކަން ފާހަގަކުރައްވާފައެވެ.

ކައުންސިލް ތަކަށް އާމްދަނީ އިތުރުވީމާ، އޭރުން ސީދާ ރައްޔިތުން ބޭނުންވާ ގޮތަށް ކަންކަން ކޮށްދެވޭނީ. ސަރުކާރަށްވެސް އޭގެން ފައިދާތަކެއް ވޭ. އެއީ ކައުންސިލްތައް ބާރުވެރި ކުރުވީމާ، ސަރުކާރުން ރަށްރަށަށް ކުރަންޖެހޭ ޚަރަދުތަކަށް ލުއިތަކެއް އެބަ ކިބޭ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް މުޢިއްޒު ވިދާޅުވީ، އެމަނިކުފާނު ބޭނުންފުޅުވަނީ ހަގީގީ މާނައިގައި ލާމަރުކަޒީ ކޮށް، ލިބޭ އާމްދަނީ އިން ރައްޔިތުންނަށް ވޭހާވެސް ބޮޑަށް ފައިދާވާގޮތް ހެދުމަށް ކަމަށެވެ.

ކުރިއަށް އޮތް ތަނުގައި އެގޮތަށް އަދި އިތުރު ކަންކަން ކުރަންވެސް ގަސްތުކުރަން. އެގޮތުން ރަށްރަށުގައި ހިންގާ ގެސްޓްހައުސް ތަކަށް، ލޯކަލް ޓޫރިޒަމްގެ ތެރެއިން ލިބޭ ޓީޖީއެސްޓީން ވަކި އިންސައްތައެއް ކައުންސިލްތަކުގެ އާމްދަނީއަށް އިތުރު ކުރުމަށް ލާމަރުކަޒީ ގާނޫނާއި ޓޫރިޒަމް ގާނޫނަށް އިސްލާހު ގެނައުމަށް ހުށަހަޅަން އަޅުގަނޑު ގަސްތު ކުރަން

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

އެފަދައިން ކަން ކުރުމުން، ދައުލަތުގެ ބަޖެޓުން ކައުންސިލްތަކުގެ މަސައްކަތްތަކަށް ކުރާ ޚަރަދަށްވެސް ލުއި ތަކެއް ލިބިގެންދާނެ ކަމަށް ރައީސުލްޖުމުހޫރިއްޔާ ވިދާޅުވި އެވެ. އަދި ރައްޔިތުން ބޭނުންވާ ގޮތަށް ސަރުކާރާއި ގުޅިގެން ކަންކަން ކުރިއަށް ގެންދިޔުމަށް ކައުންސިލަރުންނަށް ވެސް ފުރުސަތު ލިބިގެންދާނެ ކަމަށް އެމަނިކުފާނު ވިދާޅުވި އެވެ.