ކައްދޫ އެއާޕޯޓް، މާލީގޮތުން ދައުލަތަށް ބޮޑު ބުރައަކަށް ވެފައި

ލ. ކައްދޫ އެއާޕޯޓް ހިންގާ ކުންފުންޏަށް މިހާތަނަށް 325 މިލިއަނަށް ވުރެ ގިނަ ރުފިޔާގެ ބޮޑު ގެއްލުމެއް ވެ، އެ ކުންފުނި ހިންގުން ދައުލަތުގެ ބަޖެޓަށް ބޮޑު ބުރައަކަށް ވެއްޖެއެވެ.

އޮޑިޓަރ ޖެނެރަލް ނެރުއްވި އޮޑިޓް ރިޕޯޓުގައި ބަޔާންކޮށްފައިވާ ގޮތުގައި، ރިޕޯޓްކުރި ތާރީޚާ ހަމައަށް ކައްދޫ އެއާޕޯޓް ކޮމްޕެނީއަށް ޖުމްލަ 325,4 ރުފިޔާގެ ގެއްލުން ވަނީ ވެފައެވެ. މީގެ ތެރޭގައި ހިނގަމުންދާ އަހަރު އެ ކުންފުނީގެ ހިންގުމުން ލިބުނު 29,7 ރުފިޔާގެ ގެއްލުން ވެސް ހިމެނެއެވެ.

އޮޑިޓް ރިޕޯޓަށް ބަލާއިރު، ކުންފުނި އަމިއްލައަށް ހިންގުމަށް ބޭނުންވާ ފައިސާ ހޯދުމަށް ނުކުޅެދިފައިވާތީ، ކުންފުނީގެ ދުވަހީ މަސައްކަތްތައް ކުރިއަށް ގެންދިއުމަށް މުޅިންހެން ބަރޯސާވާން ޖެހިފައިވަނީ ދިވެހި ސަރުކާރުން ދޭ މާލީ އެހީތެރިކަމަށެވެ. އެގޮތުން، ކުންފުނީގެ ހިންގުމުގެ ޚަރަދުތައް ހަމަޖެއްސުމަށްޓަކައި މިދިޔަ އަހަރުގެ ތެރޭގައި ވެސް ސަރުކާރުން ވަނީ 4.5 މިލިއަން ރުފިޔާގެ މާލީ އެހީއެއް އެ ކުންފުންޏަށް ދީފައެވެ.

މީގެ އިތުރުން، ކުންފުނީގެ މާލީ ހިސާބުތަކުގެ ސައްހަކަމާ މެދު ވެސް އޮޑިޓް ރިޕޯޓުގައި ވަނީ ސުވާލު އުފައްދާފައެވެ. އެގޮތުން، 31 ޑިސެމްބަރު 2024 ގެ ނިޔަލަށް ކުންފުނީގެ ދޫކޮށްފައިވާ އަދި ފައިސާ ދައްކާފައިވާ ހިއްސާގެ ރައުސްމާލުގެ ގޮތުގައި 367,5 މިލިއަން ރުފިޔާ ރެކޯޑުކޮށްފައިވާއިރު، މި އަހަރުގެ ތެރޭގައި ސަރުކާރުން ހިއްސާގެ ގޮތުގައި ދޫކުރި 4.5 މިލިއަން ރުފިޔާ ކުންފުނިން ރެކޯޑުކޮށްފައިވާ ކަމަށް ބަޔާންކޮށްފައިވެއެވެ.

ނަމަވެސް، މި މުއާމަލާތްތަކާ ގުޅިގެން ކަމާބެހޭ މިނިސްޓްރީއާއެކު ކުރެވިފައިވާ މުއާމަލާތްތަކުގެ އެއްވެސް ލިޔެކިޔުމެއް ނުވަތަ ކަށަވަރުކޮށްދޭ ލިޔުމެއް ނެތުމާއި، ކުންފުނީގެ ހިއްސާ ރަޖިސްޓްރީ ކުރުމުގެ ސެޓިފިކެޓުތައް ލިބެން ނެތްކަން އޮޑިޓް ރިޕޯޓުގައި ފާހަގަކޮށްފައިވެއެވެ. މި ސަބަބުތަކާ ހުރެ، އެ އަދަދުތަކުގެ ސައްހަކަމާއި އަގު ކަނޑައަޅާފައިވާ ގޮތާ ގުޅޭގޮތުން އެކަށޭނަ އޮޑިޓް ހެއްކެއް ލިބިފައިނުވާތީ، 2024 ވަނަ އަހަރުގެ މާލީ ހިސާބުތަކަށް އެއްވެސް އިސްލާހެއް ގެންނަންޖެހޭތޯ ކަނޑައެޅުމަށް އުޒުރުވެރިވެފައިވާ ކަމަށް އޮޑިޓަރ ޖެނެރަލްގެ ރިޕޯޓުގައި ވަނީ ފާހަގަކުރައްވާފައެވެ.

ވޭތުވެދިޔަ އަހަރުތަކުގައި ކައްދޫ އެއާޕޯޓަށް ގެއްލުންވަމުން ގޮސްފައިވާއިރު އަދުގެ ސަރުކާރުން ވަނީ، މިދިޔަ އަހަރު ކައްދޫ އެއާޕޯޓް، ބައިނަލްއަގްވާމީ އެއާޕޯޓެއްގެ ގޮތުގައި ތަރައްގީ ކުރުމަށް މޯލްޑިވްސް އެއާޕޯޓްސް ކޮމަޕެނީ ލިމިޓެޑާއި ހަވާލުކޮށްފައެވެ.

ސަރުކާރުން ބުނެފައިވަނީ ކުރިއަށްއޮތް ތިން އަހަރުގެ ތެރޭގައި ކައްދޫ އެއާޕޯޓް ތަރައްޤީކޮށް ނިންމާލެވޭނެ ކަމަށެވެ. އެގޮތުން ބައިނަލްއަގްވާމީ ފެންވަރަށް ތަރައްގީކުރާ ކައްދޫ އެއާޕޯޓަށް ބޭނުންވާ ބިން ހިއްކާނީ ކައްދޫގައި ހުރި މޯލްޑިވްސް ނޭޝަނަލް ޑިފެންސް ފޯސް، އެމްއެންޑީއެފްގެ މަރުކަޒު ބަދަލުކުރަން ނުޖެހޭ ގޮތަށް ކަމަށްވެސް ސަރުކާރުން ވަނީ ބުނެފައެވެ.