މާފުށީ ޖަލުގައި ތިބޭ ގައިދީން ސްކޭމް ހިންގާ: 33 ފޯނާއި އެތައް ސާމާނެއް އަތުލައިފި

ސްކޭމްގެ އެކި މައްސަލަތަކުގައި މާފުށީ ޖަލުގައި ބަންދުކުރެވިފައި ތިބޭ ގައިދީން ބައިވެރިވާ ކަމަށާ އެކަމާއި ގުޅިގެން ޖަލުގައި ހިންގި އޮޕަރޭޝަނެއްގައި ގިނަ އަދަދެއްގެ ފޯން އަތުލައިގެންފައިވާ ކަމަށް ފުލުހުން ބުނެފި އެވެ.

ފުލުހުންގެ ހިދުމަތުން މިރޭ ބުނީ އެ ހިދުމަތަށް ހުށަހެޅޭ ސްކޭމް މައްސަލަތަކާ ގުޅިގެން ކުރެވުނު ތަހުގީގު ތަކުން އެނގިފައިވާ ގޮތުގައި، މިފަދަ ބައެއް މައްސަލަތަކުގައި މާފުށީ ޖަލުގައި ބަންދުކުރެވިފައި ތިބޭ ގައިދީން ބައިވެރިވާކަން ފާހަގަކުރެވިފައިވާ ކަަމަށެވެ.

އެކަމާއި ގުޅިގެން ސެޕްޓެމްބަރު 11 ވަނަ ދުވަހު މާފުށީ ޖަލުގައި އޮޕަރޭޝަނެއް ހިންގާފައިވާ ކަމަށް ފުލުހުން ބުންޏެވެ. މި އޮޕަރޭޝަންގައި އެކި ބްރޭންޑްތަކުގެ 33 މޯބައިލް ފޯނާއި، އިއާޕޮޑާއި ހެޑްސެޓާއި ފޯނު ޗާޖުކުރާ ކޭބަލާއި އަދި ސިމްކާޑު ފެނިފައިވާ ކަމަށް ފުލުހުން ބުންޏެވެ.

މި މައްސަލަ ފުލުހުން ގެންދަނީ ތަހުގީގު ކުރަމުން ކަމަށް ވެސް ބުންޏެވެ.

ސްކޭމް މަދުކުރުމަށްޓަކައި ފަށާފައިވާ ހާއްސަ މަސައްކަތުގެ ތެރެއިން މި ފަދަ އިތުރު އޮޕަރޭޝަންތައް މޯލްޑިވްސް ކަރެކްޝަނަލް ސަރވިސްއާ ގުޅިގެން ކުރިއަށް އޮތް ދުވަސްތަކުގައިވެސް ކުރިއަށް ގެންދިއުމަށް ރޭވިފައިވާ ކަމަށް ފުލުހުން ބުންޏެވެ.

ސްކޭމްގެ މައްސަލަތަކުގައި އެތައް ބަޔަކަށް ބޮޑެތި ގެއްލުންވެފައިވާއިރު އެކަން ކުރުމުގައި އިސްކޮށް ތިބީ ޖަލުގައި ތިބޭ ގައިދީން ކަމަށް އާންމުން ބުނާތާ އެތައް ދުވަހެއް ވެއްޖެ އެވެ. ނަމަވެސް ޖަލަށް ފޯނު ވެއްދުން ހުއްޓަވަން ކަމާބެހޭ އިދާރާތައް ވަނީ ނުކުޅެދިފަ އެވެ. ގައިދީންނަށް އެތަކެތި ފޯރުކޮށް ދިނުމުގައި ބައެއް އޮފިސަރުން ބައިވެރިވެ އެވެ.