އީގަލް ހިލްސް މަޝްރޫއު ރަނގަޅު، އަޅުގަނޑުގެ ވެރިކަމުގައި ވެސް އެ ފުރުސަތު ލިބުނު: ނަޝީދު
ލިޔުންތެރިޔާ
އަހުމަދު ހަމީދު އާދަމް
ޔުނައިޓެޑް އަރަބް އެމިރޭޓްސް (ޔޫއޭއީ) ގެ އަބޫދާބީއަށް ނިސްބަތްވާ މަޝްހޫރު ޑިވެލޮޕަރ، އީގަލް ހިލްސްއިން ދިވެހި ސަރުކާރާއެކު ހިންގަން ނިންމި 20 ބިލިއަން އެމެރިކާ ޑޮލަރުގެ ބިޔަ ވޯޓާފްރަންޓް އަދި މެރީނާ މަޝްރޫއުއަކީ އުސޫލެއްގެ ގޮތުން ރަނގަޅު މަޝްރޫއުއެއް ކަމަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މި މަޝްރޫއުއަށް އިދިކޮޅު ބައެއް ލީޑަރުން ވަރަށް ބޮޑަށް ސުވާލު އުފައްދާ ފާޑުކިޔުން އަމާޒުކޮށްފައި ވަނިކޮށް މިއަދު އޮތް ނޫސްވެރީންގެ ބައްދަލްވުމެއްގައި ނަޝީދު ވިދާޅުވީ އެ މަޝްރޫއުއަކީ އުސޫލެއްގެ ގޮތުން ރަނގަޅު މަޝްރޫއުއެއް ކަމަށެވެ.
ރާއްޖޭގެ ތާރީހުގައި ހިންގޭ އެންމެ ބިޔަ މަޝްރޫއުއަށް މި މަޝްރޫއު ވެގެންދާއިރު ނަޝީދު ވިދާޅުވީ ރާއްޖެއަށް ބޭނުންވަނީ ދިވެހީންނަށް ތަނަވަސްކަން ލިބޭނެ ފަދަ ބޮޑެތި މަޝްރޫއުތައް ކަމަށެވެ. މިއީ އެފަދަ މަޝްރޫއުއެއް ކަމަށާ އެމަނިކުފާނުގެ ވެރިކަމުގައި ވެސް އެފަދަ މަޝްރޫއުއަކާއި ގުޅޭގޮތުން މަޝްވަރާ ކުރެވުނު ކަމަށެވެ.
އަދި ވިދާޅުވީ އޭރު އޮތް ކަންބޮޑުވުން މިހާރުވެސް އެބަ އޮތް ކަމަށެވެ. އެއީ އެފަދަ މަޝްރޫއުއެއް މާލެ ސަރަހައްދުގައި ހިންގުން ކަމުގައި ވިދާޅުވި އެވެ. އެއީ ރާއްޖެއަށް އެންމެ ރަނގަޅު ގޮތް ނޫން ކަމަށާ އެފަދަ މަޝްރޫއަކުން އަނެއްކާ ވެސް މާލެ ސަރަހައްދުގެ ތޮއްޖެހުން ވާނީ ބޮޑު ކަމަށެވެ.
"އަޅުގަނޑު އެއިރުގައި ފާހަގަކުރީ އެ ބާވަތުގެ ބޮޑު މަޝްރޫއެއް ރަނގަޅޭ. އެހެން ނަމަވެސް އަޅުގަނޑުމެން އެދެނީ މާލެ ސަރަހައްދުގައި [އެފަަދަ މަޝްރޫއުއެއް] ނުހިންގުމަށޭ،" ނަޝީދު ވިދާޅުވި އެވެ.
އީގަލް ހިލްސްއިން މަޢުލޫމާތު ދޭ ގޮތުގައި އެކި ފިޔަވަހިތަކަކަށް ބަހާލައިގެން ކުރިއަށް ގެންދާ މި އިންޓަގްރޭޓެޑް ޑިވެލޮޕްމަންޓް މަޝްރޫޢުގެ ތެރޭގައި ބައިނަލްއަޤްވާމީ ފެންވަރުގެ ހޮޓާތަކާއި ރިސޯޓުތައް، ޕްރީމިއަމް އަދި ބްރޭންޑެޑް ރެޒިޑެންސްތައް، ދުނިޔޭގެ ފެންވަރުގެ މެރީނާއެއް، ވޯޓާފްރަންޓް ޕްރޮމެނާޑްތައް، ރެސްޓޯރެންޓްތަކާއި ފިހާރަތަކުގެ އިތުރުން ވެލްނަސް ސެންޓަރުތައް ހިމެނެއެވެ.
އަދި މި މަޝްރޫޢުގެ ސަބަބުން ރާއްޖެއަށް ގިނަގުނަ އިޤްތިޞާދީ ފައިދާތަކެއް ލިބިގެންދާނެ ކަމަށް ވަނީ ލަފާކޮށްފައެވެ
މަޝްރޫޢުގެ ދައުރުގެ ތެރޭގައި ޖުމްލަ 30 ބިލިއަން ޑޮލަރަށް ވުރެ ގިނަ ބޭރުގެ އިންވެސްޓްމަންޓް ރާއްޖެއަށް ލިބޭނެ ކަމަށް ލަފާކުރެވޭއިރު، އޭގެ ތެރެއިން 18 ބިލިއަން ޑޮލަރަކީ ސީދާ ރާއްޖެއަށް ލިބޭނެ ނެޓް އިންވެސްޓްމަންޓެވެ.
54،000 އަށް ވުރެ ގިނަ ސީދާ އަދި ނުސީދާ ވަޒީފާގެ ފުރުޞަތު އުފެދިގެންދާނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
