ބީއެމްއެލްގެ އިސް މަގާމުތަކަށް ދިވެހިން ލެވޭތޯ ބަލަންޖެހޭ: ނާޒިމް

ބޭންކް އޮފް މޯލްޑިވްސް (ބީއެމްއެލް) ގެ އިސް މަގާމުތަކަށް ދިވެހިން ލެވޭތޯ ބަލަން ޖެހޭ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމް ވިދާޅުވެއްޖެއެވެ.

މިއަދު ބޭއްވި ދައުރުން ބޭރު ދެވަނަ ޖަލްސާގައި ކުންފުނީގެ ގާނޫނަށް ގެނައި އިސްލާހުގެ ބިލަށް ބަހުސްކުރައްވަމުން ނާޒިމް ވިދާޅުވީ، ބީއެމްއެލްގެ ކާޑުތަށް ލިމިޓްކުރި ދުވަހު ބޭންކުގެ އެންމެ އިސް ތިން ބޭފުޅުން ރާއްޖޭގައި ނެތް ކަމަށެވެ. މިގޮތުން  ބޭންކުގެ އޮޕަރޭޝަންސް ޑިރެކްޓަރާއި ކްރެޑިޓް ކޮންޓްރޯލު މެނޭޖަރާއި ރިސްކު މެނޭޖަރުގެ އެ ދުވަހު ރާއްޖޭގައި ނެތް އިރު، މަހު މުސާރައިގެ ގޮތުގައި އެ މީހުންނަށް 15 ހާސް ޑޮލަރުގެ ބޮޑު މުސާރައެއް ހޭދަވާކަމަށެވެ. އެހެންކަމުން އެފަދަ މަގާމުތަކަށް ދިވެހިން ގެނައުން މުހިންމު ކަމަށް ނާޒިމް ވިދާޅުވިއެވެ.

"އެހެންވީމާ ޕީސީބީއިން ވެސް ފިނޭންސް މިނިސްޓްރީއިން ވެސް، އެއީ ދައުލަތުގެ ހިއްސާތަކުގެ ބެލެނިވެރި ފަރާތްކަމުގައި ވާތީ، މި ކުންފުނިތަކުގެ ކަންތައްތައް ދުވަހުން ދުވަހަށް ހިނގާ ގޮތް ވަރަށް ރަނގަޅަށް ބައްލަން އެބަ ޖެހޭ. އެ މަގާމުތަކަށް ދިވެހިން ލެވޭތޯ އަޅުގަނޑުމެން މަސައްކަތްކުރަންޖެހޭ،"

ނާޒިމް ވިދާޅުވިއެވެ.

ބީއެމްއެލްގެ ބޯޑުގެ މެންބަރުން މަދުވުމާއި ގުޅިގެން، އާ ބޯޑު މެންބަރުން އައްޔަންކުރަން އެކްސްޓްރާ އޯޑިނަރީ ޖެނެރަލް މީޓިން (އީޖީއެމް) އެއް ބާއްވަން ބޭންކުން ތާވަލުކޮށްފައި ވަނިކޮށް، ބޭންކްގެ ސީއީއޯ މަގާމުން އިސްތިއުފާދެއްވިކަން ފާހަގަކުރައްވަމުން ނާޒިމް ވިދާޅުވީ، އާ ސީއީއޯއެއް އައްޔަންކުރަން އިތުރު އީޖީއެމެއް ބާއްވަން ޖެހޭނެކަމަށާއި، ކުންފުނިތަކުގެ ބިލު އިސްލާހުކުރުމުން އިތުރު އީޖީއެމެއް ކުރު މުއްދަތެއްގައި ބޭއްވިގެންދާނެކަމަށެވެ.

ކުންފުނިތަކުގެ ގާނޫނަށް އިސްހާލު ގެނައުމަށް ފޭދޫ އުތުރު ދާއިރާގެ މެންބަރު އިސްމާއިލް ނިޒާރު ހުށަހަޅުއްވާފައިވާ ބިލުގައިވާ ގޮތުން، ކުންފުނިތަކުގެ ޖަލްސާ ބޭއްވުމަށް އެދި ލިޔުން ލިބޭތާ ތިން ދުވަހުގެ ތެރޭ ދައުވަތު ދޭން ޖެހޭނެއެވެ. އަދި ޖަލްސާ ބޭއްވުމަށް އެދި ހުށަހަޅާތާ 10 ދުވަހުގެ ތެރޭ ޖަލްސާ ބާއްވަން ޖެހޭނެއެވެ.

ހަމައެއާއެކު، ކުންފުނިތަކުން ހާއްސަ އާންމު ޖަލްސާ ބޭއްވުމަށް ކަނޑައެޅިފައިވާ ދުވަހުގެ މަދުވެގެން ހަތް ދުވަސް ކުރިން ކުންފުނީގެ މެންބަރުން ނޯޓިސް ފޮނުވަން ޖެހޭނެއެވެ. ކުންފުނީގެ ގާނޫނުގައި ބަޔާންކުރާ އަދަދަށް ކުންފުނިތަކުގެ ޑިރެކްޓަރުންގެ ބޯޑުގައި މެންބަރުން ނެތް ނަމަ، ނުވަތަ އެ އަދަދަށް ޑިރެކްޓަރުން ނެތިގެން އެ އަދަދަށް ޑިރެކްޓަރުން އައްޔަންކުރަން ރަޖިސްޓްރާ އަންގަވައިފިނަމަ 10 ދުވަހުގެ ތެރޭ ޑިރެކްޓަރުން އައްޔަންކޮށް ރަޖިސްޓްރާއަށް އެކަން އަންގަން ޖެހޭނެ ކަމަށް ވެސް މި ބިލުގައި ބަޔާން ކުރެއެވެ.