ފާސްނުކުރާ ލޭންޑް ޔޫސް ޕްލޭނަކަށް އަމަލުކުރަން މަސައްކަތްކުރާތީ ތޮއްޑޫ ދަނޑުވެރިން މުޒާހަރާ ކުރަނީ

އއ. ތޮއްޑޫ ކައުސިލުން، ފާސްނުކުރާ ލޭންޑް ޔޫސް ޕްލޭނަކަށް އަމަލުކުރަން މަސައްކަތްކުރާތީ ތޮއްޑޫ ދަނޑުވެރިން ކައުންސިލް އިދާރާ ކައިރި މުޒާހަރާ ކުރަން ފަށައިފިއެވެ.

ތޮއްޑޫއިން "ވޮއިސް" އަށް މައުލޫމާތު ދިން މީހަކު ބުނީ ރައްޔިތުން ފާސްނުކުރާ ލޭންޑް ޔޫސް ޕްލޭނަކަށް އަމަލުކުރުމަށް ރަށުގެ ކައުންސިލުން މަސައްކަތްކުރަނީ ރައްޔިތުންގެ ބައްދަލުވުމެއްވެސް ނުބާއްވާ ކަމަށެވެ. އެކަމާއި ގުޅިގެން، ކައުންސިލްގެ ރަސްމީ ގަޑީގައި، މެންދުރު 1 ޖަހާ އެހާކަންހާއިރު ކައުންސިލުންނާއި ބައްދަލުކުރަން ދިޔުމުން، އެ އިދާރާގެ ދޮރު ބަންދުކޮށް ފުލުހުން ގެނެސްފައިވާ ކަމަށާއި، އެތެރޭގައި ކައުންސިލުން ތިބީ ދޮރުވެސް ތަޅުލައިގެން ކަމަށް އޭނާ ބުންޏެވެ.

މި ލޭންޑް ޔޫސް ޕްލޭނަކީ ތޮއްޑޫ ބެހިފައިވާ ދެ ބިން ކަމަށްވާ މައި ރަށު ބިމާއި ގޮއި ބިމުގެ ތެރެއިން، ވަރުވާއަށް ދޫކޮށްފައި އޮންނަ ގޮއި ބިމާއި ބެހޭ ލޭންޑް ޔޫސް ޕްލޭނެކެވެ. މި ނޫހަށް މައުލޫމާތު ދިން ފަރާތުން ބުނީ، ވަރުވާ އަށް އެ ބިން ދޫކުރަނީ ފަސް އަހަރަށް ކަމަށާއި، އެ މުއްދަތު މިހާރު ހަމަވެފައިވާ ކަމަށެވެ.

ކައުންސިލުން ލޭންޑް ޔޫސް ޕްލޭނާއި އެއްގޮތަށް ބިން ދޫކުރާނެ ކަމަށް ބުނި ނަމަވެސް މުއްދަތު ހަމަވިތާ ގާތްގަނޑަކަށް ތިން މަސްވެގެން ދިޔައިރުވެސް ބިން ދޫކޮށްފައިނުވާކަމަށާއި މިއީ ރައްޔިތުންނަށް، ޚާއްސަކޮށް ދަނޑުވެރިންނަށް ލިބޭ ބޮޑު ގެއްލުމެއްކަން އޭނާ ފާހަގަކުރިއެވެ.

"އަޅުގަނޑުމެން ކުރީ ދުވަހެއްގައި ބައްދަލުކުރީމައި ރައީސް ވަނީ ލިޔުމެއް ދީފައި ރޭގައި ރައްޔިތުންގެ ބައްދަލުވުމެއް ހަދާނަމޭ. ރައްޔިތުންގެ ބައްދަލުވުމަށް ކިޔާނަމޭ ކިޔާފަ އަޅުގަނޑުމެންނަށް ލިޔުމެއް ރައީސް ސޮއިކޮށްފަ ދީފަ ދެން ފަހުން އަނެއްކާ މި ބުނަނީ އެއީ ތިމަންނަ މަޖަލަކަށް ކުރި ކަމެކޭ. ތިމަންނަ މި ފޮނުވާލަނީ ދެން ލިޔުމެކޭ. ދެން ކައުންސިލްގެ ލެޓަރ ހެޑުގައި ކައުންސިލްގެ ސްޓޭމްޕް ޖަހާފައި ސޮއިކޮށްފައި ލިޔުން ރައްޔިތުންނަށް މި ދެނީ ކުޅޭ ކުޅޭ އެއްޗަކަށް ހަދާފައި. ދެން އެހެންވީމާ ދަނޑުވެރިންވެސް މި ރުޅިގަދަވެގެން ނުކުތީ. އިއްޔެއަކު ރެޔަކު ރައްޔިތުންގެ ބައްދަލުވުމެއް ނުހަދާ."

ރަށުން ވާހަކަ ދެއްކި މީހަކު ބުންޏެވެ.

ދަނޑުވެރިންގެ ބޮޑުބަޔެއް މި މުޒާހަރާ އަށް ނުކުމެފައިވާއިރު، ކައުންސިލް ދޮރު ލައްޕާފައި ހުރުމުން މީހުން ފަހަތުން ވިއްދުމާއި ގުޅިގެން އެ އިދާރާގެ ދޮރު ވަނީ ފަޅައިގެން ގޮސްފައެވެ. ދޮރުގެ ބިއްލޫރި ގަނޑު ފަޅައިގެން ދިޔަ ވަގުތު އެތަނުގައި ހުރި ފުލުހަކަށް ވަނީ އަނިޔާވެފައެވެ.

މިކަމާއި ގުޅިގެން ފުލުހުން ބުނީ، މިއަދު މެންދުރު 13:00 އެހާކަންހާއިރު އއ. ތޮއްޑޫ ކައުންސިލް އިދާރާ ކުރިމަތީގައި މުޒާހަރާކޮށް އާންމު މަސްލަހަތު ނަގާލުމަށް މަސައްކަތްކުރަމުން ދިއުމާއި ގުޅިގެން އެސަރަހައްދުގައި ފުލުހުން ހަރަކާތްތެރިވަމުން އަންނަ ކަމަށާއި، އެސަރަހައްދުގައި މުޒާހަރާ ކުރަމުންދާ މީހުންގެ ތެރެއިން ކައުންސިލް އިދާރާގެ ފުރާޅު މައްޗަށް ގައު އުކަމުންދާތީ އާއި މަސްލަހަތު ގެއްލުވާލުމަށް މަސައްކަތްކުރަމުންދާ ދާތީ އެގޮތަށް އެކަންކަން ނުކުރުމަށް ތަކުރާރުކޮށް ނަސޭހަތްދީފައިވާ ކަމަށެވެ.

މި މުޒާހަރާގެ ތެރެއިން އަނިޔާވި ފުލުހަށް މީހާއަށް މިހާރު ފަރުވާދެމުންދާ ކަމަށް ފުލުހުން ބުނެއެވެ.

މި މުޒާހަރާގެ ބައިވެރިން އަންނަނީ ލޭންޑް ޔޫސް ޕްލޭން ރައްޔިތުންގެ ބައްދަލުވުމެއްގައި ފާސްކުރުމަށްފަހު، އެއަށް އަމަލު ކުރުމަށް ގޮވާލަމުންނެވެ.