މިދިޔަ މަހުގެ ނިޔަލަށް ކަސްޓަމްސް އިން 13.9 ކިލޯގެ މަސްތުވާތަކެތި އަތުލައިގެންފައި ވޭ

މިދިޔަ މަހުގެ ނިޔަލަށް 13.9 ކިލޯ މަސްތުވާތަކެތި އަތުލައިގެންފައިވާ ކަމަށް މޯލްޑިވްސް ކަސްޓަމްސް ސާވިސް އިން ބުނެފިއެވެ.

މިއަދު ކަސްޓަމްސްއިން ކުރެއްވި ޕޯސްޓެއްގައި ވަނީ މިއަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެން މަރޗް މަހުގެ 31 ވަނަ ދުވަހުގެ ނިޔަލަށް، ރާއްޖެއަށް އެތެރެ ކުރަން އުޅެނިކޮށް އަތުލައިގަނެވިފައިވާ މަސްތުވާތަކެތީގެ ތަފާސްހިސާބު ހާމަކުރައްވާފައެވެ.

ޖުމުލަ 13.916 ކިލޯގެ މަސްތުވާތަކެތި އަތުލައިގަނެފައި ވާއިރު އެންމެ ގިނައިން އަތުލައިގަނެވިފައި ވަނީ ސިންތެޓިކް ކެތިނޯން އެވެ. އެގޮތުން 6.5 ކިލޯގެ ސިންތެޓިކް ކެތިނޯން އަތުލައިގަނެފައިވާ ކަމަށް ކަސްޓަމްސްގެ ތަފާސްހިސާބުން ދައްކައެވެ.

ކަސްޓަމްސްއިން ހާމަ ކުރެއްވި ތަފާސްހިސާބުގައި ވާ ގޮތުން އަތުލައިގަނެފައިވާ މަސްތުވާ ތަކެތީގެ ތެރޭގައި ހިމެނެނީ:

- 6،544 ގުރާމު ސިންތެޓިކް ކެތިނޯން

- 5،300 ގުރާމު ހިރޮއިން

- 1،152 ގުރާމު އެމްޑީއެމްއޭ

- 570 ގުރާމު މެތަމްފެޓަމިން

- 350 ގުރާމު އެމްފެޓަމިން

ރާއްޖެއަށް މަސްތުވާތަކެތި އެތެރެކުރުން ހުއްޓުވުމަށް ކަމާ ގުޅުން ހުރި އިދާރާތަކުން އަންނަނީ ގިނަ ފިޔަވަޅު ތަކެއް އަޅުއްވަމުންނެވެ. އެގޮތުން ޕޯސްޓު މެދުވެރިކޮށް ރާއްޖެއަށް މަސްތުވާތަކެތި އެތެރެކުރުން ގިނަވެފައި ވާކަން ފާހަގަ ކުރެވިފައިވާތީ، ޕޯސްޓުގެ ނިޒާމު ހަރުދަނާ ކުރުމަށް މަޝްވަރާ ކުރަމުންދާކަމަށް މިދިޔަ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ސުޕައިންޓެންޑެންޓް އޮފް ޕޮލިސް އަހުމަދު ޝާކިރު ވިދާޅުވިއެވެ.