ޢުމްރާވެރިންނަށް ލުއިފަސޭހަ ކޮށްދިނުމަށް ވީއައިއޭގައި ހިންގި ޚާއްޞަ އޮޕަރޭޝަން ނިންމާލައިފި

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ޢުމްރާވެރިންނަށް ޚާއްޞަކޮށް ވެލާނާ އިންޓަރނޭޝަނަލް އެއަރޕޯޓުގައި ހިންގި އޮޕަރޭޝަން މިއަދު ފަހު ގްރޫޕް ފުރުމާއެކު ކާމިޔާބުކަމާއެކު ނިންމާލައިފިއެވެ.

ޖުލައި މަހު ރާއްޖެއިން ޢުމްރާއަށް ދިޔަ 5,565 އަށްވުރެ ގިނަ މީހުން ފުރުވާލުމަށްޓަކައި އެ ކުންފުނީގެ ތިން ޑިޕާޓްމެންޓެއް ގުޅިގެން ވެލާނާ އިންޓަރނޭޝަނަލް އެއަރޕޯޓުގައި (ވީއައިއޭ) ޚާއްޞަ އިންތިޒާމުތަކެއް ރޭވި ކަމަށް އެމްއޭސީއެލް އިން ބުނެފައިވެއެވެ. އެގޮތުން ޕެސެންޖާ ސާވިސަސް ޓާމިނަލް ސާވިސަސް އަދި އެސްޓޭޓް ސެކިޔުރިޓީ ސާވިސަސް ގުޅިގެން މި މަސައްކަތް ކުރިއަށް ގެންދިޔައެވެ.

މި އޮޕަރޭޝަންގެ އެންމެ ފާހަގަކޮށްލެވޭ އެއް ފިޔަވަޅެއްގެ ގޮތުގައި 100 އަށްވުރެ ގިނަ މީހުން ހިމެނޭ ގްރޫޕްތަކަށް ފުރުމުގެ އެއް ދުވަސް ކުރިން ޕްރީ-ޗެކިން ހެދެވޭ ގޮތް ހަމަޖެއްސި ކަމަށް އެ ކުންފުނިން ބުނެފައިވެއެވެ.

އެ ގޮތުން ޢުމްރާވެރިންގެ ލަގެޖް ކުރިއާލައި ޗެކިންކޮށް ބޯޑިންގ ޕާސް ދޫކުރުމުގެ މަސައްކަތް ޓާމިނަލް ސަޕޯޓް ސާވިސަސްގެ އެހީތެރިކަމާއެކު ކުރިއަށް ގެންދެވުނެވެ. ހަމައެހެންމެ މޯލްޑިވްސް އިމިގްރޭޝަނާ ގުޅިގެން ޕާސްޕޯޓުތައް ކުރީބައިގައި ކްލިއާ ކުރުމުގެ އިންތިޒާމުވެސް ހަމަޖެހުނެވެ.

ޢުމްރާވެރިން އެއަރޕޯޓަށް ދިޔުމުން އެ ފަރާތްތަކަށް ވަކި ޚާއްޞަ ދޮރަކުން ޓާމިނަލަށް ވަދެވޭ ގޮތް ހެދި ކަމަށް ބަޔާނުގައި ބުނެފައިވެއެވެ. އޭގެ އިތުރުން އިމިގްރޭޝަނާއި ސެކިޔުރިޓީ ސްކްރީނިންގ އަވަސްކުރުމަށް ވަކި ކައުންޓަރުތަކާއި އެކްސް-ރޭ މެޝިންތައް ޚާއްޞަކުރެވުނެވެ. ހަމައެއާއެކު އެއަރޕޯޓުގެ ބޭރު ސަރަޙައްދުގެ ޓެކްސީ ކިޔޫ ބެލެހެއްޓުމާއި އުޅަނދުފަހަރަށް ފަސޭހައިން ވަދެ ނިކުމެވޭނެ މަގުތައް ހެދުމުގެ ޒިންމާ ނެގީ އެސްޓޭޓް ސެކިޔުރިޓީ ސާވިސަސް ކަމަށް އެ ކުންފުނިން ބުނެފައިވެއެވެ.

މި ހުރިހާ އިންތިޒާމެއްގެ ނަތީޖާއެއްގެ ގޮތުން ޗެކިން އިން ފެށިގެން ބޯޑިންގއާ ހަމައަށް ޢުމްރާވެރިންނަށް ބޮޑު ދަތިކަމެއް ކުރިމަތިނުވެ ފުރުމުގެ ޚިދުމަތް ލިބުނު ކަމަށް އެމްއޭސީއެލް އިން ފާހަގަކޮށްފައިވެއެވެ.

މި އޮޕަރޭޝަން ކާމިޔާބުކަމާއެކު ނިންމުމަށް އެހީތެރިވި މޯލްޑިވްސް އިމިގްރޭޝަނާއި އެއަރލައިންތަކާއި ޓްރެވެލް އެޖެންސީތަކާއި ޢުމްރާ ގްރޫޕްތައް އަދި ކަމާ ގުޅުންހުރި އެންމެހައި ފަރާތްތަކުގެ އެއްބާރުލުމަށް އެ ކުންފުނިން ޝުކުރު އަދާކޮށްފައިވެއެވެ.

ބާރުބޮޑު ދުވަސްވަރުތަކުގައިވެސް ޢުމްރާވެރިންނާއި އެހެނިހެން ފަސިންޖަރުންނަށް ބުރޫއެރުމެއް ނެތި ފުރިހަމަ އަދި އޮމާން ޚިދުމަތެއް ފޯރުކޮށްދިނުމަކީ އެމްއޭސީއެލްގެ މައިގަނޑު މަޤުޞަދު ކަމަށް އެ ކުންފުނީގެ ބަޔާނުގައި ބުނެފައިވެއެވެ.