އައްޑޫސިޓީ ކައުންސިލުން މިލިއަނުން ހަރަދުކޮށް މެލޭޝިއާ އަދި ސިންގަޕޫރަށް ކުރި ދަތުރު ގޯސް: އޮޑިޓް

އައްޑޫސިޓީ ކައުންސިލުން ތަޖުރިބާ ހޯދުމުގެ ނަމުގައި މިލިއަނުން ހަރަދުކޮށް މެލޭޝިއާ އަދި ސިންގަޕޫރަށް ކުރި ދަތުރު ދައުލަތުގެ އޮޑިޓަރ ޖެނެރަލަށް ގޯސްވެއްޖެއެވެ.

އައްޑޫސިޓީ ކައުންސިލުން ވަނީ، 2023 ވަނަ އަހަރާއި 2024 ވަނަ އަހަރު ތަޖުރިބާ ހޯދުމުގެ ގޮތުން ޖުމްލަ 1.2 މިލިއަން ރުފިޔާ ހަރަދުކޮށް ސިންގަޕޫރު އަދި މެލޭޝިއާއަށް ދަތުރެއް ކޮށްފައެވެ. އެ ދަތުރުތައް ކުރުމުގެ ކުރިން ފިނޭންސް މިނިސްޓްރީން ވަނީ  ދައުލަތުގެ ހަރަދުތައް ކުޑަކުރެއްވުމަށް ރައީސުލްޖުމްހޫރިއްޔާ ނިންމެވުމުން ކައުންސިލްތަކުގެ ރިކަރަންޓް ހަރަދުތައް ކުޑަކުރުމަށް ހާއްސަ އިސްކަމެއްދީ، ކޮންމެހެން ކުރަންޖެހޭ ހަރަދުތައް ނޫނީ ނުކުރުމަށާއި، ކޮންމެހެން ކުރަންޖެހޭ ހަރަދުތައް ނޫނީ ނުކުރުމަށް ހައްސަ ސަމާލުކަމެއް ދިނުމަށް އެދި ސާކިއުލާއެއް ނެރެފައެވެ.

އައްޑޫސިޓީ ކައުންސިލުން ކުރި އެ ދަތުރުތަކާ ބެހޭގޮތުން އޮޑިޓަރ ޖެނެރަލް މިއަދު ނެރުއްވި އެކައުންސިލްގެ އޮޑިޓް ރިޕޯޓްގައި ބުނެފައިވަނީ، ކައުންސިލުން އެ ދަތުރުތަކަށް ހަރަދުކޮށްފައިވަނީ، ސާކިއުލާގައި އަންގާފައިވާ އެންގުމާ އެއްގޮތަށް ކޮށްފައިވާ ހަރަދުތަކެއް ކަމަށް ބެލެވެން ނެތްކަމަށެވެ.

އައްޑޫސިޓީ ކައުންސިލް އިދާރާ ތަމްސީލްކުރާ 8 މެމްބަރުންނާއި ކައުންސިލްގެ އިދާރީ ދެ މުއައްޒަފުން ހިމެނޭހެން 2023 ވަނަ އަހަރު މެލޭޝިއާ އަދި ސިންގަޕޫރަށް ކޮށްފައިވާ ތަޖުރިބާ ދަތުރަށް ވަނީ 515،101 ރުފިޔާ ހޭދަކޮށްފައެވެ. މި ދަތުރުގައި ބައިވެރިވި ޓްރެއިނިން ޕްރޮގްރާމަކަށް 65،381 ރުފިޔާ ހޭދަކޮށްފައިވާއިރު މިއީ ދަތުރު ރިޕޯޓްގައި ހިމަނާފައިވާ ދަތުރުގެ މަގްސަދާއި ގުޅުންހުރި ޓްރެއިނިންނެއް ނޫންކަން އޮޑިޓް ރިޕޯޓްގައި ވަނީ ފާހަގަކޮށްފައެވެ.

ސިންގަޕޫރުގެ މެރިޓައިމް ގެލަރީ ފަދަ ތަންތަނަށް ޒިޔާރަތްކޮށްފައިވާއިރު، އެއީވެސް ދަތުރުގެ މަގްސަދާ ގުޅުންހުރިކަމެއް ނޫންކަމަށް އޮޑިޓްގައި ވަނީ ބުނެފައެވެ.

އޮޑިޓްގައި ފާހަގަކޮށްފައިވާ ދެވަނަ ދަތުރަކީ އައްޑޫސިޓީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ 9 މެމްބަރަކާއި ކައުންސިލް މެމްބަރެއްގެ އިތުރުން ސެކެރެޓަރީ ޖެނެރަލް ހިމެނޭހެން 2024 ވަނަ އަހަރު ކުރި ދަތުރެކެވެ. މެލޭޝިއާ އަދި ސިންގަޕޫރަށް ކުރި 8 ދުވަހުގެ މި ދަތުރަށް އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ ބަޖެޓުން ވަނީ، 685،509 ރުފިޔާ ހަރަދުކޮށްފައެވެ އޮޑިޓަރ ޖެެނެރަލްގެ ރިޕޯޓްގައި ބުނެފައިވަނީ، މި ދަތުރުން ދައުލަތަށް ލިބުނު ފައިދާއެއް ނެތްކަމަށެވެ.

އައްޑޫސިޓީ ކައުންސިލުން ތަޖުރިބާ ހޯދުމަށް ކުރި އެ ދަތުރުތަކާ ބެހޭ ގޮތުން އޮޑިޓަރ ޖެނެރަލް ވަނީ، ފިނޭންސް މިނިސްޓްރީން ނެރޭ މާލިއްޔަތާ ބެހޭ ސާކިއުލާގައި އިރުޝާދުދޭ ގޮތަށް ހަރަދުކުރުމަށް ލަފާދީފައެވެ.