ގެއްލުންވަމުން އާއި ޕީއެސްއެމް އަދި ފެނަކައަށް ފައިދާވެއްޖެ!

ސަރުކާރު ހިއްސާވާ ކުންފުނިތަކުގެ ތެރެއިން އެންމެ ބޮޑު ގެއްލުމެއްގައި ހިންގަމުން އަންނަ ޕަބްލިކް ސާވިސް މީޑިއާ އާއި ފެނަކަ ކޯޕަރޭޝަނަށް މިދިޔަ އަހަރުގެ ދެވަނަ ކުއާޓަރުގައި ފައިދާ ވެފައިވާކަމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ބުނެފިއެވެ.

ޕީސީބީން ނެރެފައިވާ ސަރުކާރު ކުންފުނިތަކުގެ ވިޔަފާރި ހިނގާދިޔަގޮތުގެ މައްޗަށް ތައްޔާރުކޮށްފައިވާ ރިޕޯޓުން ދައްކާގޮތުގައި 2024 ވަނަ އަހަރުގެ ދެވަނަ ކުއާޓަރުގައި ޕީއެސްއެމަށް ވަނީ 27 މިލިއަން ރުފިޔާގެ ފައިދާއެއް ވެފައެވެ. އެ ކުއާތަރުގައި ޕީއެސްއެމަށް ފައިދާވިނަމަވެސް އޭގެ ކުރީ 4 ކުއާޓަރުގައިވެސް ޕީއެސްއެމަށް ވަނީ ގެއްލުންވެފައެވެ. މިގޮތުން 2024 ވަނަ އަހަރުގެ ފުރަތަމަ ކުއާޓަރުގައި ޕީއެސްއެމަށް 5 މިލިއަން ރުފިޔާގެ ގެއްލުން ލިބުނުއިރު، އޭގެކުރީ 2023 ވަނަ އަހަރުގެ ފަހު ކުއާޓަރުގައި ވަނީ 7 މިލިއަން ރުފިޔާ ގެއްލުންވެފައެވެ.

ޕީއެސްއެމްގެ މާލީ ހާލަތާ ގުޅޭގޮތުން މިދިޔަ އަހަރުގެ މެއިމަހުގެ ތެރޭގައި އެކުންފުނީގެ އޭރުގެ މެނޭޖިންގ ޑިރެކްޓަރު ޒީނާ ޒާހިރު ވިދާޅުވެފައިވަނީ މި ސަރުކާރު ވެރިކަމާ ހަވާލުވިއިރު ޕީއެސްއެމްގެ ދަރަނި 261 މިލިއަން ރުފިޔާއަށް އަރާކަމަށެވެ.

ފެނަކަ ކޯޕަރޭޝަނުގެ މާލީބަޔާންތަކަށް ބަލާއިރު، 2024 ވަނަ އަހަރުގެ ދެވަނަ ކުއާޓަރުގައި އެކުންފުންޏަށް 7 މިލިއަން ރުފިޔާގެ ފައިދާ ލިބިފައިވާއިރު އޭގެ ކުރީ ފުރަތަމަ ކުއާޓަރުގައި ވަނީ 4 މިލިއަން ރުފިޔާގެ ފައިދާއެއް ނެރެފައެވެ. ނަމަވެސް 2023 ވަނަ އަހަރުގެ ފަހު ކުއާތަރުގައި ފެނަކައަށް 25 މިލިއަން ރުފިޔާ ގެއްލުން ލިބުނުއިރު، އޭގެ ކުރީ ކުއާޓަރުގައި ވަނީ 18 މިލިއަން ރުފިޔާ ގެއްލުންވެފައެވެ.

ސަރުކާރު ކުންފުނިތަކުގެ ތެރެއިން ފެނަކައަކީ ދަރަނީގެ ހާލަތު އެންމެ ބޮޑު ކުންފުންޏެވެ. ފެނަކައިން އިސްތިއުފާދެއްވި އެކުންފުނީގެ ކުރީގެ މެނޭޖިންގ ޑިރެކްޓަރު މުއާޒް މުހައްމަދު ރަޝީދުގެ އިސްތިއުފާގެ ސިޓީގައި ވިދާޅުވެފައިވަނީ ފެނަކައިގެ ދަރަނި 4.3 ބިލިއަން ރުފިޔާއަށް އަރާކަމަށެވެ.