ވަޒީފާއިން ވަކިވާއިރު މުއްދަތު ގުނުމުގައި ކުންފުނިތަކުގައި ހިދުމަތް ކޮށްފައިވާ މުއްދަތަށް ބަލަނީ

މުވައްޒަފު ވަޒީފާއިން މުސްކުޅިކޮށް ވަޒީފާއިން ވަކިކުރާ އިރު ހިދުމަތް ގުނުމުގައި، ސިވިލް ސާވިސްގައި ނުހިމެނޭ ދައުލަތުގެ އެހެން މުއައްސަސާތަކުގައި ހިދުމަތްކޮށްފައިވާ މުއްދަތު ހިމެނުމަށް ނިންމައިފި އެވެ.

ސިވިލް ސާވިސް ކޮމިޝަނުން ބުނީ އެ ކޮމިޝަންގެ މުވައްޒަފުން ވަޒީފާއިން މުސްކުޅިކޮށް ވަޒީފާއިން ވަކިކުރާ އިރު، ހިދުމަތުގެ މުއްދަތު ގުނުމުގައި ސަރުކާރުގައި ހިދުމަތްކޮށްފައިވާ މުއްދަތުގެ އިތުރުން، ސިވިލް ސާވިސްގައި ނުހިމެނޭ، ދައުލަތުގެ އެހެން މުއައްސަސާތަކުގައި -- ސަރުކާރުގެ މައި ހިއްސާ ހިމެނޭ ކުންފުނިތައް ހިމެނޭހެން ހިދުމަތް ކޮށްފައިވާ މުއްދަތު ހިމެނުމަށް ކޮމިޝަނުން ނިންމާފައިވާ ކަމަށެވެ.

އެހެން ކަމުން މިހާރު ވަޒީފާގައި ދެމިތިބި މުވައްޒަފުން އެފަދަ ތަޖުރިބާގެ ރެކޯޑެއްވާ ނަމަ، ތަޖުރިބާގެ ލިޔުމުގައި ދިވެހިރާއްޖޭގެ ބާ ކައުންސިލްގެ ގަވާއިދުގައިވާ ގޮތަށް "އަސްލާ އެއްގޮތްކަމުގެ ތައްގަނޑުޖެހުމާބެހޭ ގަވާއިދު" ގައި ބަޔާންކޮށްފައިވާ މިންގަނޑާ އެއްގޮތްވާ ގޮތުގެމަތިން ތައްގަނޑު ޖެހުމަށް ފަހު، ވަޒީފާ އަދާކުރާ އިދާރާ މެދުވެރިކޮށް ސީއެސްވިއުގައިގެ އެކްސްޕީރިއަންސް ބަޔަށް އެ ލިޔުން އަދާހަމަކުރުމަށް އެދޭ ކަމަށެވެ.

އަދި ސިވިލް ސާވިސްގެ ވަޒީފާތަކަށް މީހުން ހޮވުމާއި އައްޔަންކުރުމުގެ މިންގަނޑުތަކާއި އުސޫލުގައި ލާޒިމުކުރާ މައުލޫމާތުތައް ހިމެނޭހެން، ތަޖުރިބާ އަންގައިދޭ ލިޔުން ތައްޔާރު ކުރެވިދާނެ ގޮތުގެ ނަމޫނާއެއް، ވެސް ވަނީ އާންމުކޮށްފަ އެވެ.