ބައްސާމް ކޯޓަށް ހާޒިރުވާން ޖެހޭނީ ޖަލު ހެދުމުގައިތަ؟

އެފްއޭއެމްގެ ކުރީގެ ރައީސް ބައްސާމް އަދީލް ޖަލީލު މިއަދުކޯޓަށް ހާޒިރުކުރިއިރު ބައެއް މީޑިއާތަކުން އެންމެބޮޑަށް ފާހަގަކުރި އެއްކަމަކީ ބައްސާމް ޖަލު ހެދުން ލާން ދެކޮޅު ހެދި ވާހަކައެވެ. ކޯޓަށް ހާޒިރުކުރަންވެގެން ޖަލު ހެދުން ލައްވަން އުޅުމުން ދެކޮޅުހެދުމުން އެންމެފަހުން އާދައިގެ ހެދުން ލައްވައިގެން ކޯޓަށް ހާޒިރުކުރުވިކަމަށް ބައެއް މީޑިއާތަކުން ވަނީ ރިޕޯޓްކޮށްފައެވެ.

ރާއްޖޭގެ ނަންހިނގާ އިތުބާރުހުރި މީޑިއާތަކުން އެގޮތަށް ރިޕޯޓް ކުރާނީ ހަމަ ޔަގީނުންވެސް އެގޮތަށް އެކަން ހިނީމައެވެ. އެހެންވީމައި އެކަން މީޑިއާތަކަށް ތިލަވާނީ ޖަލުބަލަހައްޓާ އޮފިސަރުގެ ތެރެއިން ނުވަތަ ފުލުހުންގެ ފަރާތުން ނަމަވެސް އެކަން ނޫސްވެރިންނަށް އެނގުނީމައެވެ.

ގައިދީން ނުވަތަ ބަންދުމީހުން ޔުނީފޯމްލާގޮތަށް ހަމަޖައްސާފައިވާ ޖަލުތަކުގައި ޔުނީފޯމު ލެއްވުމުގައި އަމަލުކުރާނޭ ގޮތުގެ ގަވާއިދުގެ 7 ވަނަ މާއްދާގެ 4 ނަމްބަރަށް ބަލާއިރު ޝަރުއީ ކޯޓަކަށް ނުވަތަ ރަސްމީ އިދާރާއަކަށް ގައިދީން ނުވަތަ ބަންދުމީހުން ހާޒިރުކުރާއިރު ހާޒިރުކުރަން ވާނީ، އެ އިދާރާއަކުން ގަބޫލުކުރާ މޯލްޑިވްސް ކަރެކްޝަނަލް ސާވިސް އިން ފޯރުކޮށްދޭ ރަސްމީ ހެދުމެއްގައެވެ. މި ނަމްބަރުގައި އެބުނާ ރަސްމީ ހެދުމަކީ ގައިދީން ލުމަށް ކަނޑައެޅިފައިވާ ޖަލު ހެދުމެވެ.

މިކަމާ ގުޅޭގޮތުން މޯލްޑިވްސް ކަރެކްޝަނަލް ސާވިސްގައި މީގެކުރިން އިސް މަގާމްތަކެއް ފުރުއްވި ބޭފުޅަކު ނަން ހާމަކުރަން ނޭދެމުން ވިދާޅުވެފައިވަނީ، އެ މާއްދާގައި އެގޮތަށް ބަޔާންކުރިނަމަވެސް ސެކިއުރެޓީ ހާލަތަށް ރިޔާއަތްކޮށް އެފަދަ ކަންކަމަށް އަމަލުކުރުމުގެ ފަރަގުތަކެއް ގެންގުޅުމުގެ އިހުތިޔާރު ކަރެކްޝަނަށް ލިބިގެންވެއެވެ.

" ކަރެކްޝަން އިން ކަނޑައަޅާ ސެކިއުރިޓީގެ ގިންތިއެއް ގޮތެއްގެ މައްޗަށް އެކަން ބަރޯސާވަނީ" އޭނާ ވިދާޅުވިއެވެ.

ބައްސާމް ކުލަ ހެދުމުގައި ކޯޓަށް ހާޒިރުކުރުމާ ގުޅޭގޮތުން ވޮއިސްއަށް މައުލޫމާތު ހިއްސާކުރަމުން ކަރެކްޝަނަލް ސާވިސްގެ އޮފިޝަލަކު ވިދާޅުވީ މިއަދުގެ ޝަރީއަތުގެ މަޖިލީހަށް ބައްސާމް ހާޒިރުވީ އެތަނުގެ ހެދިފައިވާ އުސޫލްތަކާ އެއްގޮތަށްކަމަށެވެ. އެގޮތުން އުސޫލުން ބޭރުން ބައްސާމް ކޯޓަށް ހާޒިރުކޮށްފައި ނުވާނޭކަމަށް އޮފިޝަލް ވިދާޅުވިއެވެ.

ޝަރީއަތުގެ މަޖިލީހަށް ބައްސާމް ހާޒިރުކުރަން ތާވަލްކޮށްފައި އޮތީ މިއަދު ހެނދުނު 08:15 އަށެވެ، ނަމަވެސް ޝަރީއަތަށް ބައްސާމް ހާޒިރުކުރެވުނީ 11:00 ޖެހިފަހުންނެވެ. ބައެއް މީޑިއާތަކަށް މައުލޫމާތު ދިންކަމަށް ކްރިމިނަލް ކޯޓުން ބުނެފައިވަނީ، ކޯޓަށް ބައްސާމް ހާޒިރުކޮށްފައިވަނީ ކުލަ ހެދުމުގައި ބިޑިއަޅުވައިގެން ކަމަށެވެ.

ކްރިމިނަލް ކޯޓުގައި މިހާރު ކުރިއަށްދަނީ ބައްސާމުގެ މައްޗަށް ކުރެވިފައިވާ މަނީ ލޯންޑަރިން ދައުވާއާ ގުޅޭ އަޑުއެހުންތަކެވެ. އެއީ ފީފާއިން އެފްއޭއެމަށް ދިން 1.2 މިލިއަން ޑޮލަރު އުސޫލްތަކާ ހިލާފަށް ބައްސާމް އަމިއްލަ ކަންކަމުގައި ބޭނުންކުރުމާ ގުޅިގެން ކުރި ދައުވާއެވެ.