ސްޕިރިޓް އެއާލައިންސްގެ ހުރިހާ އޮޕަރޭޝަންތަކެއް ހުއްޓާލައި އުވާލަނީ

އެމެރިކާގެ މަޝްހޫރު ބަޖެޓް އެއާލައިނެއް ކަމުގައިވާ، ސްޕިރިޓް އެއާލައިންސްގެ ދުނިޔޭގެ ހުރިހާ އޮޕަރޭޝަންތަކެއް އިއްޔެ އިން ފެށިގެން ހުއްޓާލައި، ކުންފުނީގެ ވިޔަފާރި އުވާލުމުގެ މަސައްކަތް ފަށައިފިއެވެ.

މި ނިންމުމާއެކު އެ އެއާލައިންގެ ހުރިހާ ފްލައިޓްތަކެއް ވަނީ ކެންސަލްކޮށްފައެވެ. އަދި ކަސްޓަމަރުން އެއާޕޯޓަށް ނުދިއުމަށް އެ ކުންފުނިން ވަނީ އިރުޝާދު ދީފައެވެ.

ސްޕިރިޓް އެއާލައިންގެ ވިޔަފާރި ހުއްޓާލަން މަޖުބޫރުވީ، ދަރަނި ރީސްޓްރަކްޗާ ކުރުމަށާއި، ސަރުކާރުގެ ފަރާތުން ލިބޭނެ ކަމަށް ބެލެވުނު 500 މިލިއަން ޑޮލަރުގެ އެހީގެ ޕެކޭޖު ނުލިބުމާ ގުޅިގެންނެވެ. އެމެރިކާ ސަރުކާރާއެކު ކުރިއަށްދިޔަ މަޝްވަރާތައް ކާމިޔާބު ނުވުމުން، އިތުރު ފައިސާ ހޯދޭނެ އެއްވެސް މަގެއް ނެތް ކަމަށް ކުންފުނީގެ ސީ.އީ.އޯ ޑޭވް ޑޭވިސް ވަނީ ވިދާޅުވެފައެވެ.

ވޭތުވެދިޔަ ދެ އަހަރުގެ ތެރޭގައި ދެ ފަހަރެއްގެ މަތިން ބެންކްރަޕްސީއަށް ހުށަހެޅި މި އެއާލައިންއަށް ދިމާވި އެންމެ ބޮޑު ގޮންޖެހުމަކީ ތެލުގެ އަގު އިންތިހާއަށް އުފުލުމާއި، ޖެޓްބްލޫ އެއާލައިންސްއާ އެކު ކުރަން އުޅުނު މާޖާ މުއާމަލާތް ކޯޓުން ހުއްޓުވުމެވެ. މީގެ އިތުރުން ދުނިޔޭގެ މަސްރަހަށް އައި ބަދަލުތަކާއެކު ހަރަދުތައް އިތުރުވެ، ދަރަނިތައް އަދާނުކުރެވޭ މިންވަރަށް ކުންފުނީގެ މާލީ ހާލަތު ވަނީ ގޯސްވެފައެވެ.

ސްޕިރިޓް އެއާލައިނުގެ ވިޔަފާރި ހުއްޓާލަން ނިންމުމާ ގުޅިގެން ގާތްގަނޑަކަށް 17,000 މުވައްޒަފުންގެ ވަޒީފާ ގެއްލޭނެ ކަމަށް ބެލެވެއެވެ. އަދި 33 އަހަރަށްވުރެ ގިނަ ދުވަސްވީ މި އެއާލައިން ހުއްޓާލުމަކީ ފާއިތުވި ދިހަވަރަކަށް އަހަރުގެ ތެރޭގައި އެމެރިކާގެ އޭވިއޭޝަން ދާއިރާއަށް ކުރިމަތިވި އެންމެ ބޮޑު ނާކާމިޔާބީ ކަމަށް ތަޖުރިބާކާރުން ފާހަގަކުރެއެވެ.

ސްޕިރިޓް އެއާލައިނުން ބުނެފައިވަނީ، އެއާލައިން މެދުވެރިކޮށް ސީދާ ޓިކެޓް ބުކްކޮށްފައިވާ ފަރާތްތަކަށް ރިފަންޑް ދިނުމުގެ މަސައްކަތް ކުރިއަށްދާނެ ކަމަށެވެ. އެހެންނަމަވެސް، ޓްރެވަލް އޭޖެންޓުން މެދުވެރިކޮށް ޓިކެޓް ނަގާފައިވާ ފަރާތްތަކުން އެ އޭޖެންޓުންނާ ގުޅުމަށް އެ ކުންފުނިން ވަނީ އެދިފައެވެ.