ހަނގުރާމައިގެ ކުރިމަގާ ބެހޭ ދިރާސާއެއް ހެދުމަށް މަސްކް އަލުން ޓްރަމްޕްގެ ސަރުކާރުގެ މަގާމަކަށް

ދުނިޔޭގެ މަޝްހޫރު ބިލިއަނަރު އީލޮން މަސްކް، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރަށް ރަސްމީކޮށް ލަފާއެރުވުމުގެ މަސައްކަތަށް އަލުން އެނބުރި އަތުވެއްޖެއެވެ. މަސްކް މިފަހަރު ހަވާލުވީ އެމެރިކާގެ ޕެންޓަގަން އިން ކުރިއަށްގެންދާ ހަނގުރާމަތަކުގެ ކުރިމަގާ ބެހޭ ޚާއްސަ ދިރާސާއެއްގެ އިސް ވެރިއެއްގެ ޒިންމާއާއެވެ.

މީގެ ކުރިން ޑިޕާޓްމަންޓް އޮފް ގަވަރމަންޓް އެފިޝެންސީ (ޑޯޖް) ގެ ވެރިޔާގެ މަގާމުގައި ހުރި މަސްކް އެ މަގާމުން ވަކިވީ 2025 ވަނަ އަހަރުގެ މެއި މަހު ޓްރަމްޕާ ދެމެދު ޚިޔާލުތަފާތުވުންތަކެއް އުފެދިގެންނެވެ. ނަމަވެސް، ޕެންޓަގަންގެ މި އައު މަޝްރޫއާއެކު އޭނާ މިވަނީ އަނެއްކާވެސް ޓްރަމްޕްގެ ސަރުކާރުގެ މަސައްކަތްތަކާ ގުޅިފައެވެ.

ކުއަންޓިކޯ މިލިޓަރީ ބޭސްގައި ވާހަކަދައްކަމުން ޕެންޓަގަންގެ ވެރިޔާ ޕީޓް ހެގްސެތު ބުނީ، "ޕްރޮޖެކްޓް މެރީޑިއަން" ގެ ނަން ދީފައިވާ މި މަޝްރޫއަކީ ހަނގުރާމަތަކުގެ މުސްތަގުބަލު ދިރާސާކުރުމަށް އެމެރިކާގެ އެންމެ މޮޅެތި ސިކުނޑިތައް ބޭނުންކޮށްގެން ހިންގާ މަސައްކަތެއް ކަމަށެވެ. އަދި މި މަސައްކަތުގެ މަގްސަދަކީ ކުރިމަގުގައި އެމެރިކާއިން ކާމިޔާބުކުރަންޖެހޭ ދާއިރާތަކާއި، ހޯދަންޖެހޭ ގާބިލުކަން ދެނެގަތުން ކަމަށްވެސް އޭނާ ބުންޏެވެ.

މި ޕްރޮޖެކްޓްގެ ކޯ-ލީޑަރުންގެ ގޮތުގައި މަސްކްގެ އިތުރުން ހަރަކާތްތެރިވާނީ ޑިފެންސް ޓެކްނޮލޮޖީ ކުންފުންޏެއް ކަމަށްވާ އެންޑޫރިލް އިންޑަސްޓްރީޒްގެ ކޯ-ފައުންޑަރ ޕާމަރ ލަކީ އާއި އެމެރިކާގެ ހައުސްގެ ކުރީގެ ރައީސް ނިއުޓް ގިންގްރިޗް އެވެ. މީގެއިތުރުން ޕްރައިވެޓް ސެކްޓަރާއި އެކެޑެމިކް ދާއިރާގެ ގިނަ ތަޖުރިބާކާރުންތަކެއް މި ޓީމުގައި ބައިވެރިވާނެއެވެ.

ޓްރަމްޕް ވެރިކަމަށް ގެނައުމުގައި މަސްކް ބޮޑު ދައުރެއް އަދާކުރި ނަމަވެސް، ޚަރަދުތަކާ ގުޅޭ ގާނޫނަކާ މެދު ދެމީހުންގެ ދެމެދުގައި ބޮޑެތި މައްސަލަތަކެއް ޖެހުނެވެ. އެހެން ނަމަވެސް ފަހުން މަސްކް ވަނީ ރިޕަބްލިކަން ޕާޓީގެ ކެންޑިޑޭޓުންނަށާއި ސިޔާސީ ގްރޫޕްތަކަށް އަލުން އެހީތެރިކަން ދޭން ފަށާފައެވެ.

ޕެންޓަގަންގެ ވެރިޔާ ހެގްސެތު ވަނީ ޕްރޮޖެކްޓް މެރީޑިއަންގެ ދިރާސާ ރިޕޯޓް 120 ދުވަހުގެ ތެރޭގައި އެއްކޮށް ނިންމައި ހުށަހެޅުމަށް އަންގާފައެވެ.