މަރުގެ އަދަބާ ދެކޮޅުހަދާ އެމެރިކާގައި މީހަކަށް މަރުގެ އަދަބު ދޭތަން ލައިވްކުރަން ނިންމައިފި؛ ޓްރަމްޕްވެސް ރުހުންދިން

އެމެރިކާގެ އަސްކަރީ މަރުކަޒެއްގައި ބަޑީގެ ހަމަލާތަކެއް ދީ ސިފައިންތަކެއް މަރާލި މީހަކަށް، ބަޑިޖަހައިގެން މަރުގެ އަދަބު ދޭ މަންޒަރު ވަގުތުން ދެއްކުމަށް، ލައިވްކުރުމަށް އެ ގައުމުގެ ސަރުކާރުން ނިންމައިފިއެވެ.

މި ނިންމުން ބަދަލުކުރުމަށް އެދި ރިޓަޔާޑް ޖެނެރަލުންނާއި އެޑްމިރަލުން ހިމެނޭހެން އަސްކަރިއްޔާގެ އިސް 72 އޮފިސަރަކު ވަނީ ގޮވާލައިފިއެވެ.

މި އަހަރުގެ ޑިސެމްބަރު މަހުގެ 3 ވަނަ ދުވަހު މަރުގެ އަދަބު ތަންފީޒު ކުރުމަށް ހަމަޖެހިފައިވަނީ، ފޯޓް ހުޑް އަސްކަރީ މަރުކަޒުގައި ހަތިޔާރެއް ނެތް 13 ސިފައިންނަށް ބަޑިން ހަމަލާދީ މަރާލި އެމެރިކާ އަސްކަރިއްޔާގެ ކުރީގެ ސައިކިއޭޓްރިސްޓެއް ކަމަށްވާ ނިދާލް ހަސަންގެ މައްޗަށެވެ. އެމެރިކާގެ ޑިފެންސް ޑިޕާޓްމަންޓް (ޕެންޓަގަން) އިން މިދިޔަ ހަފުތާގައި ވަނީ، ޑިފެންސް ސެކްރެޓަރީ ޕީޓް ހެގްސެތު އިސްވެ ހުރެގެން، މި އަދަބު ދޭ މަންޒަރު އާންމުކޮށް ލައިވްކޮށް ދެއްކުމަށް ނިންމާފައިވާކަން އިއުލާނުކޮށްފައެވެ.

ރައީސް ޑޮނަލްޑް ޓްރަމްޕްވެސް މި ޕްލޭނަށް ފުރިހަމައަށް ތާއީދުކުރިއެވެ. ނަމަވެސް އެމެރިކާގެ ސިޔާސީ ދެ ޕާޓީގެ މެންބަރުންނާއި، ދީނީ އިލްމުވެރިން އަދި އެކަޑަމިކް މާހިރުންގެ އަންނަނީ މިކަމަށް ފާޑުކިޔަމުންނެވެ.

ސީބީއެސް ނިއުސް އިން ރިޕޯޓްކޮށްފައިވާ ގޮތުގައި، ސަރުކާރުގެ ބައެއް އިސް ވެރިން ވެސް މިހާރު ތިބީ މިކަން ލައިވްކުރުމާ ދެކޮޅަށެވެ. އެއާއެކު ޓްރަމްޕްވެސް މިހާރު ބުނަނީ މަރުގެ އަދަބު ދިނުމުގެ ހުއްދަ ދިން ނަމަވެސް، ލައިވްކުރުމާ މެދު އަދި ފަހުގެ ނިންމުމެއް ނުނިންމަވާ ކަމަށެވެ.

މިކަމާ ދެކޮޅަށް ނެރުނު ސިޓީއެއްގައި އަސްކަރިއްޔާގެ ކުރީގެ ވެރިން ބުނެފައިވާ ގޮތުގައި، އެމީހުން މަރުގެ އަދަބު ދިނުމާ ދެކޮޅެއް ނޫނެވެ. ނަމަވެސް އެކަން މިގޮތަށް އާންމުކޮށް ދެއްކުމަކީ އަނިޔާވެރި އަދަބު ދިނުމާ ދެކޮޅަށް އެމެރިކާގެ ގާނޫނުއަސާސީން ލިބިދޭ ރައްކާތެރިކަމާ ހިލާފު ކަމެއް ކަމަށެވެ. އަދި ސީރިއަސް އަދަބެއް ދިނުމުގެ ބަދަލުގައި، މިއީ "ބަލަން ތިބޭ މީހުންނަށް ކުޅިވަރެއް ދެއްކުން ފަދަ" ކަމަކަށް ވެގެން ހިނގައިދާނެ ކަމަށް ވެސް ސިޓީގައި ބަޔާންކޮށްފައިވެއެވެ.

ނިދާލް ހަސަން ކޯޓުގައި ބުނެފައިވަނީ އޭނާ އެ ހަމަލާ ދިނީ އެމެރިކާ ސިފައިންގެ ކިބައިން މުސްލިމުން ސަލާމަތް ކުރުމުގެ ނިޔަތުގައި ކަމަށެވެ. އެ ހަމަލާގެ ތެރޭގައި ލިބުނު އަނިޔާތަކާ ގުޅިގެން އޭނާ މިހާރު ދިރިއުޅެނީ ފުރޮޅުލީ ގޮނޑިއެއްގައެވެ.

މި ޕްލޭނާ އެއްގޮތަށް ކަންކަން ކުރިއަށް ގޮސްފިނަމަ، މިއީ ފާއިތުވި ގާތްގަނޑަކަށް 100 އަހަރުގެ ތެރޭގައި އެމެރިކާގައި އާންމުކޮށް ފެންނަ ގޮތަށް މީހަކަށް މަރުގެ އަދަބު ދޭ ފުރަތަމަ ފަހަރަށް ވެގެންދާނެއެވެ.

އެމެރިކާއިން މިފަދަ ނިންމުމެއް ނިންމާފައިވާއިރު، އެ ގަައުމަކީ އިސްލާމްދީނުގައި މަރުގެ އަދަބު ދިނުން އޮންނާތީ އެކަމާ އެންމެ ބޮޑަށް ދެކޮޅު ހަދައި، އަޑު އުފުލާ ގައުމެވެ.