ޓެސްލާއިން ”އުދުހޭ ކާރެއް“ ދައްކާލައިފި

މީގެ ކުރިން ހަމައެކަނި ސައިންސް ފިކްޝަން ފިލްމުތަކުންނާއި ކާޓޫނުތަކުން ފެންނަ ފަދަ އުދުހޭ ކާރެއް، ޓެސްލާ ކުންފުނީގެ ސީއީއޯ އީލޮން މަސްކް ބުރާސްފަތި ދުވަހު ދައްކާލައިފިއެވެ.

އެމެރިކާގެ ޓެކްސަސްގައި ހުންނަ ސްޕޭސްއެކްސްގެ ޓެސްޓު މަރުކަޒުގައި ބޭއްވި މި ހަރަކާތުގައި ދައްކާލާފައިވަނީ ދެ މީހުންގެ ޖާގައިގެ ސްޕޯޓްސް ކާރެއް ކަމަށްވާ ޓެސްލާގެ އައު "ރޯޑްސްޓަރ" އެވެ. މި ކާރަކީ އެއް ސިކުންތަށް ވުރެ ކުރު މުއްދަތެއްގެ ތެރޭގައި ގަޑިއަކު 0 އިން 60 މޭލުގެ ބާރުމިނަށް ދުވެލި އަރުވާލެވޭ، ރެކޯޑް މިންވަރަކަށް ހަލުވި އުޅަނދެކެވެ.

މި ޙަފްލާގައި ދެއްކި ޑެމޮންސްޓްރޭޝަންގައި، އެ ކާރު ވަނީ ޚާއްޞަ ސަކްޝަން ސިސްޓަމެއް ބޭނުންކޮށްގެން އުސް ރޭމްޕަކަށް އަރައި، ބަންޑުން އޮތުމަށްފަހު، ވައިގެ ތެރޭގައި އެނބުރިލުމަށްފަހު، އެއާ ޖެޓްތަކުގެ އެހީގައި ރައްކާތެރިކަމާއެކު ބިމަށް ޖައްސާފައެވެ. އަދި އޭގެ ފަހުން، އެއްވަރަކަށް ޕާކުކޮށްފައި ހުރި އެހެން ޓެސްލާ ކާރުތަކެއްގެ މަތިން ފުންމައިގެން ގޮސް، ވަރަށް ބާރު ދުވެއްޔެއްގައި ދުއްވާލި މަންޒަރުވެސް ވަނީ ދައްކާލާފައެވެ. ސަލާމަތީ ގޮތުން ރައްކާތެރިވުމުގެ ގޮތުން މި ޑެމޮންސްޓްރޭޝަން ކުރިއަށް ގެންދިޔައީ ކާރުގައި ޑްރައިވަރަކު ނެތިއެވެ.

މަސްކް ހާމަކުރި ގޮތުގައި މި ކާރުގައި ބޭނުންކޮށްފައިވަނީ 10 ނޮޒުލް އާއި ވަރަށް މަތީ ޕްރެޝަރުގެ އެއާ ޓޭންކުތަކެކެވެ. މިއީ ވައިގެ ތެރޭގައި އުދުހުމަށާއި، ބިމުގައި ހަލުވިކަމާއެކު ދުއްވުމަށް ބާރުދޭ ޓެކްނޮލޮޖީއެކެވެ. އޭނާ މި ޓެކްނޮލޮޖީ ސިފަކުރީ ދުނިޔޭގެ އެންމެ މޮޅު ކާރު ކުންފުންޏާއި، އެންމެ މޮޅު ރޮކެޓް ކުންފުނި ގުޅިގެން ނެރުނު ނަތީޖާއެއްގެ ގޮތުގައެވެ. މަސްކް ވިދާޅުވީ މި ކާރު އުފައްދަން ފަށާނީ 2028 ވަނަ އަހަރު ކަމަށެވެ.

މި ކާރު ދައްކާލި ނަމަވެސް، މިއީ ހަގީގަތުގައިވެސް އާންމުކޮށް ދުއްވާ މަގުތަކުގައި ދުއްވައި، ގިނަ ވަގުތު އުދުހޭ ގޮތަށް އުފެއްދިދާނެ އެއްޗެއްތޯ ގިނަ މާހިރުން އަންނަނީ ސުވާލު އުފައްދަމުންނެވެ. މި ޑެމޮންސްޓްރޭޝަނުން ފެނިގެންދިޔައީ ދިގު ދަތުރުތަކަށް އުދުހުމުގެ ބަދަލުގައި، މައްޗަށް އަރައި ވަކި ހިސާބަކަށް ފުންމައިލެވޭ މަންޒަރެވެ.

މި ދާއިރާގެ މާހިރުން ފާހަގަކުރާ ގޮތުގައި، ވައިގެ އުޅަނދުތަކަކީ ބަރުދަން ވަރަށް ލުއިވާންޖެހޭ އެއްޗެހި ކަމަށްވާއިރު، އެއްގަމު އުޅަނދުތަކަކީ ސަލާމަތީ ސަބަބުތަކަށްޓަކައި ބަރުކޮށް ހަދަންޖެހޭ އެއްޗެއްސެވެ. އެހެންކަމުން މި ދެބައި އެއްކޮށްލައިގެން ފުރިހަމައަށް މަސައްކަތްކުރާ ކާރެއް އުފެއްދުމަކީ އިންޖިނިއަރިންގ ގޮތުން އަދިވެސް ބޮޑެތި ގޮންޖެހުންތަކެއް ހުރި ކަމެކެވެ.