ގެދޮރު ލޯނުގެ އިކުއިޓީއަށް ކޮންމެ މީހަކަށް ދެ ލައްކަ ރުފިޔާ ލިބޭނެ ގޮތް ހަދަނީ
ގެދޮރު ލޯނުގެ އިކުއިޓީއަށް ކޮންމެ މީހަކަށް ދެ ލައްކަ ރުފިޔާ ލިބޭނެ ފަދަ ސްކީމެއް ތައާރަފުކުރަން މަސައްކަތް ކުރަމުންދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ "ރައްޔިތުންގެ އަޑު" ސިލްސިލާގެ 10 ވަނަ ޕްރަގްރާމްގައި ވާހަކަފުޅު ދައްކަވަމުންނެވެ. މީޑިއާތަކުން މިރޭ ބްރޯޑްކާސްޓް ކުރި މި ޕްރަގްރާމްގައި ބައިވެރިވި ދެ ފަރާތަކުން ވަނީ ގެދޮރު އަޅަން ލޯނު ލިބުމުގައިވާ ދަތިތައް ފާހަގަ ކުރައްވާފަ އެވެ. ހާއްސަކޮށް ވަޒީފާގައި ނޫޅޭތީ ލޯނު ނުލިބުމާއި ލޯނުގެ އިކުއިޓީއަށް ދައްކަން ޖެހޭ ފައިސާގެ މައްސަލަ ފާހަގަކުރި އެވެ.
ރައީސް ވިދާޅުވީ ގެދޮރު އެޅުމަށް ލޯނު ލިބޭނެ ފަސޭހަ ނިޒާމެއް ގާއިމުކުރުމަކީ ވަރަށް އިސްކަން ދެއްވާ ކަމެއް ކަމަށެވެ. އެކަމަށް މިހާރު މަސައްކަތް ކުރަމުންދާ ކަމަށް ވިދާޅުވި އެވެ. އަލަށް ތައާރަފުކުރަން ގަސްތުކުރާ ސްކީމާއި ގުޅޭ ބައެއް ތަފްސީލު ވެސް ވަނީ ދެއްވާފަ އެވެ.
ވިދާޅުވީ އެ ސްކީމުން ގެދޮރު ލޯނުގެ އިކުއިޓީއަށް ކޮންމެ މީހަކަށް ދެ ލައްކަ ރުފިޔާ ދިނުމަށް ނިންމާފައިވާ ކަމަށެވެ. އެއީ ލޯނެއް ނޫން ކަމަށާ އެހީ ކަަމުގައި ވިދާޅުވި އެވެ. އޭރުން އިކުއިޓީ ހަމަޖެހި ލޯން ލިބުމަށް ފަސޭހަވެގެންދާނެ ކަަމަށް ރައީސް ވިދާޅުވި އެވެ.
ސަރުކާރުން ދެނީ އިކުއިޓީ ކޮންޕޯނަންޓަށްދޭ އަނބުރާ ދައްކަން ނުޖެހޭ އެއްޗެއް. ދެ ލައްކަ ރުފިޔާވަރު ކޮންމެ މީހަކަށް. ދެން ގޭގެ ތިން ހަތަރު މީހުން އެއްކޮށްލައިގެން ޖުމްލަ މިލިއަނެއްހާ ރުފިޔާވެސް ލިބިދާނެ ފަސް މީހަކު ތިބެއްޖެއްޔާ،" ރައީސް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
