އާ ހޮސްޕިޓަލް އަޅާތީ، ވިލިމާލޭ ހޮސްޕިޓަލްގެ ހިދުމަތްތައް އަމާން ހިޔާއަށް ބަދަލުކޮށްފި

ވިލިމާލޭގައި ޒަމާނީ ފެންވަރުގެ 100 އެނދުގެ ޓާޝަރީ ހޮސްޕިޓަލެއް ޤާއިމުކުރުމުގެ މަޝްރޫޢަށް މަގުފަހިކުރުމުގެ ގޮތުން، ވިލިމާލެ ހޮސްޕިޓަލުން ދެމުން އައި ޚިދުމަތްތައް ވަގުތީ ގޮތުން "އަމާން ހިޔާ" އިމާރާތަށް ބަދަލުކޮށް މިއަދު ޚިދުމަތް ދޭން ފަށައިފިއެވެ.

ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާ ޙަވާލުކޮށްގެން ވަގުތީ އިމާރާތަށް ޚިދުމަތްތައް ބަދަލުކުރުމުގެ މަސައްކަތް ކުރިއަށް ގެންގޮސްފައިވާއިރު، މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ޕީއެސްއެމްނިއުސްއާ ވާހަކަދައްކަވަމުން ވިދާޅުވެފައިވަނީ، ކުއްލި ފަރުވާގެ ޚިދުމަތާއި އާންމު ބަލިތަކުގެ ޑޮކްޓަރުންނަށް ދެއްކުމުގެ އިންތިޒާމު މިހާރު އެ އިމާރާތުގައި ހަމަޖެހިފައިވާ ކަމަށެވެ.

ނަމަވެސް، ދަތުގެ ފަރުވާ، ފިޒިއޮތެރަޕީ އަދި ޑަޔަލިސިސް ފަދަ ޚާއްޞަ ޚިދުމަތްތައް އެ ތަނަށް ބަދަލުކުރެވޭނީ އިމާރާތުގައި ލިފްޓު ހަރުކުރުމުގެ މަސައްކަތް ނިމުމުން ކަމަށާއި، އެ މުއްދަތުގެ ތެރޭގައި އެ ޚިދުމަތްތައް އައިޖީއެމްއެޗް މެދުވެރިކޮށް ލިބޭނެ އިންތިޒާމު ހަމަޖައްސަވާފައިވާކަމަށް ވަނީ ވިދާޅުވެފައެވެ.

މި މަޝްރޫޢުގެ ދަށުން މިހާރު ބޭނުންކުރަމުންދާ އިމާރާތް ތަޅާލައި، ޗައިނާ ސަރުކާރުގެ ހިލޭ އެހީގެ ދަށުން ޒަމާނީ ވަސީލަތްތަކާ އެކު 100 އެނދުގެ އައު ހޮސްޕިޓަލެއް ބިނާކުރުމަށް ވަނީ ހަމަޖެހިފައެވެ. ދެ އިމާރާތުގެ މައްޗަށް އެކުލެވޭ މި އައު ހޮސްޕިޓަލުގައި، އެނދުމަތިކޮށްގެންނާއި ބޭރުން ދައްކާ ބަލިމީހުންނަށް ފަރުވާދޭނެ ބައިތަކުގެ އިތުރުން، އެމަޖެންސީ، ޑައިގްނޯސްޓިކް، އައިސީޔޫ އަދި ހީމޯޑަޔަލިސިސް ޚިދުމަތަށް ޚާއްޞަ އެނދުތައް ހިމެނޭނެއެވެ.

މިހާރު ހިންގަމުންދާ ހޮސްޕިޓަލަކީ އެންމެ ތިން ކޮންސަލްޓޭޝަން ރޫމާއި އިމަޖެންސީ ފަސް އެނދުގެ ޖާގައެއް އޮތް ތަނަކަށްވާއިރު، މުޅިން އައު ފެންވަރަކަށް ތަރައްޤީކުރާ މި ހޮސްޕިޓަލުގެ ޑީޓެއިލް ޑިޒައިނިންގގެ މަސައްކަތް މިހާރު ވަނީ ފެށިފައެވެ.