ވެމްކޯއަށް 2022 ވަނަ އަހަރު އެކަނިވެސް 127.9 މިލިއަން ރުފިޔާގެ ގެއްލުމެއް ލިބުނު: އޮޑިޓް

ވޭސްޓް މެނޭޖްމަންޓް ކޯޕަރޭޝަން (ވެމްކޯ) އަށް 2022 ވަނަ އަހަރު އެކަނިވެސް 127.9 މިލިއަން ރުފިޔާގެ ބޮޑު ގެއްލުމެއް ވެފައިވާކަން އޮޑިޓަރ ޖެނެރަލްގެ އޮފީހުން ނެރުނު އެ ކުންފުނީގެ މާލީ އޮޑިޓް ރިޕޯޓުން ހާމަވެއްޖެއެވެ.

އޮޑިޓަރ ޖެނެރަލްގެ އޮފީހުން އާންމުކޮށްފައިވާ އެ ކުންފުނީގެ މާލީ ބަޔާންތަކުގެ އޮޑިޓް ރިޕޯޓަށް ބަލާއިރު، 2021 ވަނަ އަހަރުވެސް ވެމްކޯއަށް ވަނީ 82 މިލިއަނަށްވުރެ ގިނަ ރުފިޔާގެ ގެއްލުން ވެފައެވެ. މިގޮތުން ވޭތުވެދިޔަ އަހަރުތަކުގައި ކުންފުންޏަށް ބޮޑެތި މާލީ ގެއްލުންތަކެއް ވަމުންދާއިރު، އެ ދެ އަހަރުވެސް ކުންފުނީގެ މާލީ ރެކޯޑްތައް ބެލެހެއްޓުމުގައި ބޮޑެތި މައްސަލަތަކެއް ހުރިކަން އޮޑިޓް ރިޕޯޓުގައި ވަނީ ފާހަގަކޮށްފައެވެ.

އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، ކުންފުނީގެ އާމްދަނީ އާއި، ވިޔަފާރީގެ މުއާމަލާތްތަކުން ލިބެންޖެހޭ ފައިސާ އަދި ނަގުދު ފައިސާގެ ހިސާބުތަކުގެ އިތުރުން، އެކި ފަރާތްތަކަށް ދައްކަންޖެހޭ ފައިސާ އާއި މުދަލާއި ވަސީލަތްތަކާ ގުޅޭގޮތުން އެކަށީގެންވާ އޮޑިޓް ހެކި ލިބިފައެއް ނުވެއެވެ. މީގެ ނަތީޖާއެއްގެ ގޮތުން، 1 ޖެނުއަރީ 2022 އާ ހަމައަށް އެ އެކައުންޓްތަކުގައި ހުރި ބާކީ ފައިސާގެ އަދަދުތަކާ ގުޅޭގޮތުން އެކަށީގެންވާ ހެކި ހޯދުމަށް އޮޑިޓަރުންނަށް ބޮޑެތި ހުރަސްތަކެއް ވަނީ ކުރިމަތިވެފައެވެ.

މީގެއިތުރުން، 2022 ވަނަ އަހަރުގެ ނިޔަލަށް ވެމްކޯއަށް ލިބެންޖެހޭ ފައިސާގެ ތެރޭގައި އާންމު ވިޔަފާރީގެ މުއާމަލާތްތަކުން ލިބެންޖެހޭ 84.5 މިލިއަން ރުފިޔާ އާއި، ގުޅުންހުރި އެކި ފަރާތްތަކުން ލިބެންޖެހޭ 44.2 މިލިއަން ރުފިޔާ ހިމެނެއެވެ. ނަމަވެސް، ތިންވަނަ ފަރާތްތަކުގެ ކޮންފަމޭޝަން މެދުވެރިކޮށް ނުވަތަ އެނޫންވެސް އޮޑިޓް އިޖުރާއާތެއްގެ ތެރެއިން މި އަދަދުތަކުގެ ސައްހަކަން ކަށަވަރުކުރެވޭނެ އެކަށީގެންވާ އެއްވެސް ހެއްކެއް އޮޑިޓަށް ލިބިފައި ނުވާކަމަށް ރިޕޯޓުގައި ބަޔާންކޮށްފައިވެއެވެ.

އަދި ހަމައެއާއެކު، އެ ފައިސާ އަނބުރާ ނުލިބިދާނެ ކަމަށް ބަލައި އުނިކޮށްފައިވާ 75.6 މިލިއަން ރުފިޔާ އާއި، އެ އަހަރުގެ ގެއްލުމުގެ ގޮތުގައި ހިމަނާފައިވާ 7,031,457 ރުފިޔާގެ ސައްހަކަން ކަށަވަރުކުރެވޭނެ އެއްވެސް ލިޔެކިޔުމެއް ނެތް ކަމަށްވެސް އޮޑިޓަރ ޖެނެރަލްގެ ރިޕޯޓުގައި ވަނީ ފާހަގަކުރައްވާފައެވެ. ވެމްކޯގެ މާލީ ހިސާބުތަކަށް ބަލާއިރު 2022 ވަނަ އަހަރު ނިމުނުއިރު ވިޔަފާރީގެ މުއާމަލާތްތަކާ ގުޅިގެން ދައްކަންޖެހޭ ފައިސާގެ އަދަދު 103,9 ރުފިޔާއަށް އަރައެވެ.