އިންޑޮނީޝިއާއިން ވައި ސާފުކުރުމަށް ޑްރައި އައިސް ބޭނުންކުރަނީ

އިންޑޮނީޝިއާގެ ޖަންގަލިތަކާއި ޕީޓްލޭންޑުތަކުގައި ރޯވެފައިވާ އަލިފާނުން އެރި ވިހަ ދުމުގެ ސަބަބުން ޖައްވު ތަގައްޔަރުވި ދުންގަނޑު ފޮނުވާލުމަށް ޑްރައި އައިސް ބޭނުންކުރަން ފަށައިފިއެވެ.

ވައިގެ ނުރައްކާ ކުޑަކުރުމަށް އިންޑޮނީޝިއާއާއި އަވައްޓެރި މެލޭޝިއާއިން ވެސް ކްލައުޑް ސީޑިން ފަދަ މޫސުން ބަދަލުކުރުމުގެ އެކި އުކުޅުތައް ބޭނުންކުރަމުން ގެންދެއެވެ. ކްލައުޑް ސީޑިންގައި ވިލާގަނޑުގެ ތެރޭގައި ފެން ގަނޑުވާ މިންވަރު އަވަސްކުރުމަށް ސިލްވާ އޮޔޮޑައިޑް ފަދަ މާއްދާތައް ވިލާ ތެރެއަށް ބުރުވައެވެ. މި ބާވަތުގެ އޮޕަރޭޝަންތައް ހަފުތާތަކެއް ވަންދެން ކުރިއަށް ގެންގޮސްފައިވެއެވެ.

ނަމަވެސް، ބުރާސްފަތި ދުވަހު ޕަލެމްބަންގާއި އެ ސިޓީ ވަށައިގެންވާ ސަރަހައްދުތަކަށް އަމާޒުކޮށް ހިންގި ޑްރައި އައިސް ތަޖުރިބާ ތަފާތެވެ. ވާރޭ ވެއްސުމުގެ ބަދަލުގައި، ޖައްވުގެ ތިރީ ފަށަލައިގައި ހެދިފައިވާ ދުންގަނޑު ބައިބައިކޮށްލައި މައްޗަށް އެރުވޭ ގޮތް ހެދުމަކީ މި ތަޖުރިބާގެ މަގުސަދެވެ. ސިޔާސީ ކަންކަމާއި ސެކިއުރިޓީއާ ގުޅޭ ކޯޑިނޭޓިން މިނިސްޓަރު ދުދުންގް އަބްދުއްރަހްމާން ވިދާޅުވީ މި ތަޖުރިބާ ކާމިޔާބުވެއްޖެ ނަމަ، ސެންޓްރަލް ކަލިމަންޓާން ފަދަ ދުންގަނޑުގެ މައި ސަރަހައްދުތަކުގައި ވެސް މި މަސައްކަތް ކުރިއަށް ގެންދާނެ ކަމަށެވެ.

މި ތަޖުރިބާގައި 1.5 ޓަނުގެ ޑްރައި އައިސް ބޭނުންކުރާނެ ކަމަށް ކަމާ ބެހޭ ފަރާތްތަކުން ބުނެފައިވެއެވެ. ރައީސް ޕްރަބޯވޯ ސުބިއާންޓޯ ވަނީ އަލިފާން ނިއްވައި ވިހަ ދުމުގެ އަސަރު ކުޑަކުރުމުގެ މަސައްކަތް އިތުރަށް ހަލުއިކުރުމަށް އެކި އިދާރާތަކަށް ގޮވާލައްވައިފައެވެ. ސެންޓްރަލް ކަލިމަންޓާންގައި ވެސް ބުރާސްފަތި އަދި ހުކުރު ދުވަހު ކްލައުޑް ސީޑިން ހިންގުމަށް ވަނީ ރާވައިފައެވެ. ބިންމަތީގައި ފަޔާ ފައިޓަރުން ކޮންޓްރޯލުން ނެއްޓިފައިވާ އަލިފާންގަނޑުތައް ނިއްވުމުގެ މަސައްކަތް ކުރަމުންދާ އިރު، އެތައް ހެލިކޮޕްޓަރެއް ވެސް ބޭނުންކޮށްފައިވެއެވެ. އެހެން ނަމަވެސް ދުމުގެ ސަބަބުން ވިޒިބިލިޓީ ދަށްވެ، ބައެއް ފަހަރު މި އޮޕަރޭޝަންތަކަށް ހުރަސް އެޅިފައިވެއެވެ.

ކަލިމަންޓާނާއި ދެކުނު ސުމަޓްރާގެ އެތައް ސިޓީއެއްގެ ވައި ވިހަ ދުމުން ބޯވެ، ރައްޔިތުންނަށް ބޮޑެތި ތަކުލީފުތަކެއް ކުރިމަތިވެފައިވެއެވެ. މީގެ އިތުރުން، ޖެހިގެން އޮތް ސިންގަޕޫރާއި މެލޭޝިއާއަށް ވެސް ވިހަ މާއްދާތައް ފެތުރި، ސިއްހީ ކަންބޮޑުވުންތައް ވަނީ އިތުރުވެފައެވެ. ކުއާލަ ލަމްޕޫރާއި ޖޮހޯ ބާރޫ ހިމެނޭ ގޮތުން މެލޭޝިއާގެ ބައެއް ސަރަހައްދުތަކުގައި އެ ގައުމުގެ ކަމާ ބެހޭ ފަރާތްތަކުން ވެސް އަމިއްލައަށް ކްލައުޑް ސީޑިން ހިންގާފައިވެއެވެ. ފާއިތުވި މަހު އިންޑޮނީޝިއާއިން ވަނީ ދެ ގައުމުގެ ބޯޑަރު ކައިރީގައި ކްލައުޑް ސީޑިން ކުރުމަށް މެލޭޝިއާގެ އެޖެންސީތަކަށް އެ ގައުމުގެ ވައިގެ ސަރަހައްދަށް ވަނުމުގެ ހުއްދަ ދީފައެވެ.

މިނިވަން ފޮރެސްޓް މޮނިޓަރިން ޕްލެޓްފޯމެއް ކަމުގައިވާ ނޫސާންޓާރާ އެޓްލަސް އިން ބުނި ގޮތުގައި މި އަހަރު އިންޑޮނީޝިއާގައި އެއް މިލިއަނަށް ވުރެ ގިނަ ހޮޓް ސްޕޮޓް ރެކޯޑުކޮށްފައިވާ އިރު، ގާތްގަނޑަކަށް 900,000 ހެކްޓަރުގެ ބިން ވަނީ އަނދައިގެން ގޮސްފައެވެ.