އިންޑޮނޭޝިއާގައި އަލަށް އެޅި ބްރިޖެއް ހުޅުވުމުގެ ރަސްމިޔާތު ނިމުނު ވަގުތު މުޅި ބްރިޖު ވެއްޓިއްޖެ

އިންޑޮނޭޝިއާގައި އަލަށް އެޅި ސަސްޕެންޝަން ބްރިޖެއް ހުޅުވުމަށް ބޭއްވި ރަސްމިއްޔާތު ނިމުނު ވަގުތު މުޅި ބްރިޖު ކުއްލިއަކަށް ވެއްޓި ނުރައްކާތެރި ހާދިސާއެއް ހިނގައިފިއެވެ.

މި ހާދިސާ ހިނގާފައިވަނީ އިންޑޮނޭޝިއާގެ ވެސްޓް ޖާވާގެ އަވަށެއްގައެވެ. ބްރިޖު ހުޅުވުމުގެ ރަސްމިއްޔާތަށްފަހު، އެ ސަރަޙައްދުގެ ޑިސްޓްރިކްޓް ވެރިޔާއާއި، ސަރުކާރުގެ އިސް އޮފިޝަލުން އަދި އާންމު ރައްޔިތުން ހިމެނޭހެން ގިނަ އަދަދެއްގެ ބަޔަކު އެއްފަހަރާ އެ ބްރިޖު ހުރަސްކުރުމަށް ސަފުހަދައިގެން އެރިއެވެ.

ރިޕޯޓްތައް ބުނާގޮތުގައި ގާތްގަނޑަކަށް 50 އެއްހާ މީހުން އެއްފަހަރާ ބްރިޖަށް އެރި ވަގުތު، ކުއްލިއަކަށް ބްރިޖު ވަރަށް ބޮޑަށް ތެޅެން ފެށިއެވެ. އަދި އެއަށްފަހު އެއްފަރާތަކަށް އަރިއަޅާލައި، ސީދާ ތިރިއަށް ވެއްޓުނެވެ.

ކޯރުގެ ސަތަހައިން ފެށިގެން 40 މީޓަރު އުހުގައި އަޅާފައިވާ މި ބްރިޖު ވެއްޓުނު ވަގުތު، އޭގެ މަތީގައި ތިބި އެތައް ބަޔަކު ބްރިޖުގެ ކައިރިފަށުގައިވާ ރެއިލިންގްތަކުގައި ހިފަހައްޓައިގެން ތިބެ ބިރުން ހަޅޭއްލަވަން ފަށާ މަންޒަރު ފެނެއެވެ.

ކަމާބެހޭ އިދާރާތަކުން ލަފާކުރާ ގޮތުގައި މި ހާދިސާ ހިނގަން މެދުވެރިވީ ބްރިޖު ހަރުކުރުމަށް ބޭނުންކޮށްފައިވާ ބައެއް މުހިންމު ބައިތަކަށް (އެންކަރިންގ ޑިވައިސްތަކަށް) ގެއްލުންވުމުގެ ސަބަބުންނެވެ. ކަމާބެހޭ ފަރާތްތަކުން މިހާރު ދަނީ މި ހާދިސާ ހިނގަން މެދުވެރިވި އަސްލު ސަބަބު ދެނެގަތުމަށްޓަކައި އިތުރަށް ތަޙުޤީޤު ކުރަމުންނެވެ.