އިންޑޮނޭޝިއާގެ ބޯޓެއް ބަންޑުންޖަހާލައި 6 މީހުން މަރުވެ، 129 މީހުން ގެއްލިއްޖެ

އިންޑޮނޭޝިއާގެ ޖާވާ ކަނޑުގައި ދަތުރުކުރަމުންދިޔަ ފަސިންޖަރު ބޯޓެއް ބަންޑުންޖަހާލުމުގެ ސަބަބުން މަދުވެގެން 6 މީހުން މަރުވެ، 129 މީހުން ގެއްލިއްޖެއެވެ.

އެ ޤައުމުގެ ސަރޗް އެންޑް ރެސްކިއު އެޖެންސީން މަޢުލޫމާތު ދޭ ގޮތުގައި، އާދީއްތަ ދުވަހުގެ ފަތިހުގެ ވަގުތެއްގައި ހިނގި މި ހާދިސާގައި ބަންޑުންޖަހާލާފައިވަނީ "ވާގޯ ޓްރާންސްޕޯޓް 8" ނަމަކަށް ކިޔާ ބޯޓެކެވެ. މި ހާދިސާ ހިނގުމާއެކު ރެސްކިއު ޓީމުތަކުން ކުރި މަސައްކަތުން މިހާތަނަށް 108 މީހުން ވަނީ ސަލާމަތްކޮށްފައެވެ. އަދި ގެއްލުނު މީހުން ހޯދުމުގެ މަސައްކަތް އަދިވެސް މެދުކެނޑުމެއްނެތި ދަނީ ކުރަމުންނެވެ.

މި ބޯޓަކީ 30 ފަޅުވެރިންނާއެކު ޖުމްލަ 243 މީހުން ގޮވައިގެން، އީސްޓް ޖާވާގެ ސުރަބާޔާ ސިޓީން ހޮނިހިރު ދުވަހު ފުރި ބޯޓެކެވެ. ބޯޓު ދަތުރުކުރަމުން ދިޔައީ ސައުތު ކަލިމަންތާންގެ ބަންޖަރުމާސިން ސިޓީއަށެވެ. އެ ސަރަޙައްދުން ދަތުރުކުރި ހެލިކޮޕްޓަރަކަށް ބޯޓު ބަންޑުންޖަހާލާފައިވާ މަންޒަރު ފެނިގެން ރިޕޯޓްކޮށްފައިވާ ކަމަށް އިންޑޮނޭޝިއާގެ ޓްރާންސްޕޯޓް މިނިސްޓަރު ދުދީ ޕުރްވާގަންދީ ވިދާޅުވިއެވެ. މި ހާދިސާ ހިނގަން މެދުވެރިވި ސަބަބު ދަނީ އިތުރަށް ތަޙުޤީޤު ކުރަމުންނެވެ.

ހާދިސާއިން ސަލާމަތްވި ރިންޓޯ އަރަހަބް ނަމަކަށް ކިޔާ ފަސިންޖަރަކު ބުނި ގޮތުގައި، ބޯޓު ބަންޑުންޖަހާލުމާއެކު އޭނާ ހިފެހެއްޓީ ބޯޓުގެ ރެއިލިންގައެވެ. އަދި ބޯޓު ކަނޑު އަޑިއަށް ދާން ފެށުމުން މަސައްކަތުން އޭގެ މައްޗަށް އެރި ކަމަށާއި، އެ ވަގުތު ހަމައެކަނި ކުރެވުނު ކަމަކީ ސަލާމަތްތެރިކަމަށް އެދި ދުޢާކުރުން ކަމަށް އޭނާ ކިޔައިދިނެވެ.

ބޯޓުން ދަތުރުކުރި މީހުންގެ އާއިލާތަކުން މިހާރު ދަނީ ޚަބަރެއް ލިބޭތޯ ބަންޖަރުމާސިން ސިޓީއަށް އެއްވަމުންނެވެ. އެގޮތުން ޕުތުރީ ނަމަކަށް ކިޔާ އަންހެނަކު ބުނީ، ފޯނު ކެނޑުމުގެ ކުރިން ބޯޓުގައި އިން އޭނާގެ ފިރިމީހާ ހަރމަންއާ ވާހަކަދެއްކުނު ކަމަށާއި ނަމަވެސް އޭގެ ފަހުން އެއްވެސް ވަރަކަށް ނުގުޅޭ ކަމަށެވެ.

ބަންޖަރުމާސިން ސަރޗް އެންޑް ރެސްކިއު އޮފީހުގެ ވެރިޔާ އައި ޕުޓު ސުދަޔާނާ ވިދާޅުވީ، ސަލާމަތްކުރެވުނު މީހުން ކައިރީގައި ހުރި އެހެން އުޅަނދުފަހަރަށް ނަގާފައިވާ ކަމަށާއި، އޭގެ ތެރެއިން ބައެއް މީހުން އީސްޓް ޖާވާގެ ބަނދަރަކަށް ގެންދިއުމުގެ މަސައްކަތް ކުރަމުންދާ ކަމަށެވެ.

17،000 އަށް ވުރެ ގިނަ ރަށްތައް އެކުލެވޭ އިންޑޮނޭޝިއާގައި އެއްތަނުން އަނެއްތަނަށް ދަތުރުފަތުރު ކުރުމަށް އާންމުކޮށް ބޭނުންކުރަނީ ފެރީއާއި ބޯޓުފަހަރެވެ. އެއީ ވައިގެ ދަތުރުފަތުރާ އަޅާބަލާއިރު ކަނޑުދަތުރުގެ ޚަރަދު ކުޑަވެފައި ފަސޭހައިން ލިބެން ހުންނާތީއެވެ. ނަމަވެސް މޫސުން ގޯސްވުމާއި ސަލާމަތީ މިންގަނޑުތައް ދަށްވުމުގެ ސަބަބުން މިފަދަ ނުރައްކާތެރި ހާދިސާތައް އެ ޤައުމުގައި ހިނގުމަކީ އާންމު ކަމެކެވެ.